Ee, Dabloosi tumuppe deˈiyaaba. I iita gididi Xoossaa bolli makkalidanne ‘ha saˈaa haariya’ ayyaana mereta. (Yohaannisa 14:30; Efisoona 6:11, 12) Kaallidi deˈiya sunttatuuninne qonccissotun Dabloosi oonakko Geeshsha Maxaafay yootees:

• Seexaanaa, “Eqettiyaagaa” giyoogaa.—Iyyooba 1:6.

• Dabloosa, “Sunttaa Mooriyaagaa” giyoogaa.—Ajjuutaa 12:9.

• SHooshshaa, Geeshsha Maxaafan deˈiya “Balettiyaagaa” giyo birshshettay deˈiyo suntta.—2 Qoronttoosa 11:3.

• Paacciyaagaa.—Maatiyoosa 4:3.

• Worddotiyaagaa.—Yohaannisa 8:44.

Iitatetta eeshshaa gidenna

Seexaanaa Dabloosi nu giddon deˈiya iitatettaa eeshsha giidi issoti issoti qoppoosona. SHin, Xoossay Seexaanaara haasayidoogaa Geeshsha Maxaafay yootees. Xoossay wottiyoobi baynnaagaa gidiyo gishshawu, I ba giddon deˈiya iitabaara haasayiis gaana danddayettenna. (Zaarettido Wogaa 32:4; Iyyooba 2:1-6) Hegaadankka, an nagari mule baynna Yesuusa Seexaanay paacciis. (Maatiyoosa 4:8-10; 1 Yohaannisa 3:5) Yaatiyo gishshawu, Dabloosi tumuppe deˈiyaabaappe attin asa milatissi qonccissido iitatetta gidennaagaa Geeshsha Maxaafay qonccissees.

Dabloosi tumuppe deˈiyoogaa daro asay ammanennaagan nuuni maalaalettana koshshii? CHii, koshshenna. Ayssi giikko, Seexaanay ba halchchuwaa polanawu asaa cimmiyoogaa Geeshsha Maxaafay yootees. (2 Tasalonqqe 2:9, 10) I deˈiyoogaa asay ammanennaadan oottiyoogee, I asaa keehi cimmiyo ogetuppe issuwaa.—2 Qoronttoosa 4:4.

Tumaa: Issi issi Geeshsha Maxaafaa birshshettatun “Lusifer” geetettida Ibraawetto qaalay, “pooˈiyaagaa” giyoogaa. (Isiyaasa 14:12) Keehippe otorettido gishshawu Xoossay kawushshana Baabiloone haaruwaa he qaalay qonccissiyoogaa yuushuwan deˈiya qofaappe akeekoos. (Isiyaasa 14:4, 13-20) Baabiloone haaroy kunddi simmin eta baceessanawu, “pooˈiyaagaa” giya qaalaa asay goˈettiis.

Tumaa: Dabloosi Xoossawu morkkeppe attin, ayyo oottiyaagaa gidenna. Seexaanaa Dabloosi Xoossawu oottiya asaa eqettees, qassi wordduwan mootees.—1 PHeexiroosa 5:8; Ajjuutaa 12:10.