Saluwaa Biyaageeti Oonee?

KAASSA

Geeshsha Maxaafay yootiyoobaa

Hayquwaappe denddiyo wode saluwan deˈanawu baana, qoodan amarida ammanettida Kiristtaaneta Xoossay doorees. (1 PHeexiroosa 1:3, 4) Eti he woytuwaa demmanawu ubbatoo Xoossawu azazettananne ammanuwan minni deˈana koshshees.—Efisoona 5:5; Piliphphisiyuusa 3:12-14.

Saluwaa biyaageeti yan ay oottanee?

Eti kawonne qeese gididi Yesuusaara issippe 1,000 layttawu haarana. (Ajjuutaa 5:9, 10; 20:6) Eti “ooratta sa7aa” woykko saˈan deˈiya asaa haariya ‘ooratta salo’ woykko saluwaa kawotettan ayssiyaageeta gidana. Eti saluwan uttidi haarana; qassi asay koyro Xoossay halchchidoogaadan deˈana mala maaddana.—Isiyaasa 65:17; 2 PHeexiroosa 3:13.

Saluwan deˈanawu denddiyaageeti aappunee?

Geeshsha Maxaafay, 144,000u asati saluwan deˈanawu denddanaagaa yootees. (Ajjuutaa 7:4) Ajjuutaa 14:1-3y, “Dorssai Xiyoone Deriyaa bolli” eqqidoogaanne, “issi xeetanne oitamanne oiddu sha7u asati aara issippe” deˈiyoogaa Yohaannisi ajjuutan beˈidoogaa yootees. Ha ajjuutan, ‘Dorssaa’ geetettiday hayquwaappe denddida Yesuusa. (Yohaannisa 1:29; 1 PHeexiroosa 1:19) ‘Xiyoone Deree,’ Yesuusawunne aara haarana 144,000 asatuyyo deˈiya gita maataa bessiyaaba.—Mazamure 2:6; Ibraawe 12:22.

Yesuusaara A Kawotettan haarana, “i xeegidoogeetinne dooridoogeeti” ‘amarida dorssa wudekka’ geetettidosona. (Ajjuutaa 17:14; Luqaasa 12:32) Hegee, Yesuusa dorssatu ubbaagaara gatti xeelliyo wode, eta qooday keehi guutta gidiyoogaa bessees.—Yohaannisa 10:16.

Saluwaa biya asatuura gayttidaagan odettiya bala qofata

Bala qofaa: Loˈˈo asa ubbay saluwaa bees.

Tumaa: Loˈˈo asaappe dariya baggay saˈan merinawu deˈanaagaa Xoossay qaalaa geliis.—Mazamure 37:11, 29, 34.

Yesuusi, “Saluwaa kiyidabi ooninne baawa” yaagiis. (Yohaannisa 3:13) Yaagiyoogan, I saˈaa yaanaappe kase hayqqida Abrahaama, Muusa, Iyyoobanne Daawita mala loˈˈo asati saluwaa bibeennagaa qonccissiis. (Oosuwaa 2:29, 34) SHin, eti saˈan merinawu deˈanawu duufuwaappe denddana.—Iyyooba 14:13-15.
Saluwan deˈanawu denddiyoogee ‘koyro dendduwaa’ geetettees. (Ajjuutaa 20:6) Hegee hara denddoykka deˈiyoogaa bessiyaaba. He denddoy saˈan deˈanawu denddiyoogaa.
Xoossaa Kawotettaa haaruwan ‘hayqoy deˈennaagaa’ Geeshsha Maxaafay yootees. (Ajjuutaa 21:3, 4) Saluwan hayqoy mule deˈi erenna gishshawu, ha hidootay polettanay saˈaana gidiyoogee qoncce.

Bala qofaa: Saluwan woy saˈan deˈanawu, issi izaawu bawu doorees.

Tumaa: “Bolla de7uwau xeesiyo woituwaa” woykko saluwaa deˈuwaa ekkana ammanettida Kiristtaaneta Xoossay doorees. (Piliphphisiyuusa 3:14) Nuuni Xoossaayyo haggaazanay saluwaanakko woy saˈanaakko kuuyana danddayokko.—Maatiyoosa 20:20-23.

Bala qofaa: Saluwaa deˈoy saˈaa deˈuwaappe keha. Saˈan deˈana asay saluwaa biyaageetu keena loˈˈo asa gidokkona.

Tumaa: Saˈan merinawu deˈanaageeta Xoossay “ta asaa,” ‘taani dooridoogeeta,’ qassi Yihoowan “anjjettida” asata yaagees. (Isiyaasa 65:21-23) Eti merinawu deˈana, qassi saˈaa gannate oottiyoogan ufayttana. Xoossay asawu halchchidobay hegaa.—Doomettaabaa 1:28; Mazamure 115:16; Isiyaasa 45:18.

Bala qofaa: Ajjuutaa maxaafan qonccida 144,000 paydoy leemisoppe attin coo qooda gidenna.

Tumaa: Ajjuutaa maxaafan leemiso paydoti deˈikkonne, amarida paydoti coo qooda. Leemisuwawu, “Dorssai kiittido tammanne naa77atu” sunttaabaa yootees. (Ajjuutaa 21:14) Hegaadankka, 144,000 paydoy coo qooda gaanaadan oottiya naqaashaa akeeka.

Ajjuutaa 7:4y yootiyoogaadan, “issi xeetanne oitamanne oiddu sha7aa som77uwan maatafai wodhdhiis [woykko, saluwan deˈiyo maataa ekkidosona].” He xiqisiyaappe kaallidi deˈiya qofay hegeetuppe dummatiya hara citaabaa, “Ooninne qoodanau danddayenna zawai bainna daro asaa” yaagees. “Zawai bainna daro” asaykka Xoossaappe atotettaa demmiis. (Ajjuutaa 7:9, 10) Issi xeetanne oytamanne oyddu shaˈay coo qooda gidennan, attana ubbaa bessiyaaba gidiyaakko, “ooninne qoodanau danddayenna” hara asaabaa yootana koshshenna. a

Hegaa bollikka, 144,000ti “sa7aa asa giddoppe wozettidaageeta” geetettidosona. (Ajjuutaa 14:4) “Baira” giya qaalay gita citawu guutta shaahuwaa qonccissiyaaba. Hegee saluwan uttidi saˈan deˈiya asaa haariyaageeta bessiyaaba.— Ajjuutaa 5:10.

a Hegaadankka, Robert L. Toomas giyo Profeseree Ajjuutaa 7:4n deˈiya 144,000 qoodaabaa hagaadan giis: “Hegee 7:9n deˈiya kuuyettida payduwaappe dummatiya kuuyettibeenna paydo. He payduwa leemiso giikko, maxaafaa giddon coo paydoy baawa.”—Ajjuutaa 1-7: An Eksejetikal Kommenteri, sinttaa 474.