“Chak maten lè m ap prepare m pou jounen an, m ap fè mizik. Lè m nan machin, m ap fè mizik. Lè m ap pran detant lakay mwen, lè m ap fè netwayaj e menm lè m ap li, m ap fè mizik. M toujou ap tande mizik.” — Carla.

 Èske w renmen mizik menm jan ak Carla? Si se wi, atik sa ap ede w pwofite avantaj ki gen nan sa, l ap ede w evite danje yo e l ap ede w byen chwazi mizik w ap tande.

•  Avantaj yo

•  Danje yo

•  Sa lòt jèn di

 Nou ka konpare yon moun k ap tande mizik ak yon moun k ap manje yon bagay. Nan toude ka yo, si moun nan pran san l pou l chwazi ni kalite, ni kantite mizik oswa manje a, sa ap bon pou li. Konsidere sa:

•   Mizik ka fè kè w kontan anpil.

   “Lè m ap pase yon move jounen, m konn annik kòmanse tande mizik m pi renmen an epi, menm kote a, m vin santi m byen.” — Mark.

•   Mizik ka fè w sonje yon bèl moman.

   “Byen souvan, yon chante an patikilye konn fè m sonje yon bèl moman. Konsa, kè m kontan chak fwa m ap tande l.” — Sheila.

•   Mizik ka kontribye pou gen inite.

   “Pandan m te nan yon kongrè entènasyonal Temwen Jewova yo, m te kòmanse kriye lè tout moun nan asistans lan t ap chante dènye kantik la. Se vre n pa t pale menm lang, men, mizik la te ini nou.” — Tammy.

•   Mizik ka ede w devlope bèl kalite.

   “Ou dwe gen disiplin ak pasyans pou w rive aprann jwe yon enstriman mizik. Se pa yon bagay ou ka metrize byen vit. Sèl fason pou w pwogrese se fè pratik.” — Anna.

 Èske w te konnen? Liv Sòm nan, liv ki pi gwo nan Bib la, se yon liv ki gen 150 chante.

 Menm jan ak manje ki gate, gen kèk mizik ki tankou pwazon pou ou. Ann wè sa k fè sa.

•   Gen anpil mizik ki chaje ak vye pawòl sou sèks.

   “Sanble tout mizik ki popilè yo se mizik ki pale de sèks. Yo pa menm eseye kache sa ankò.” — Hannah.

   Bib la di: “Depi se fònikasyon, salte sou kèlkeswa fòm nan, oswa avaris, nou pa dwe menm pale de yo nan mitan nou.” (Efezyen 5:3). Mande tèt ou: ‘Èske mizik m konn tande yo anpeche m suiv konsèy sa a?’

•   Gen kèk mizik ki ka fè tristès anvayi w.

   “Pafwa, m konn reveye lannuit epi m kòmanse tande mizik ki fè m panse ak bagay k ap dekouraje m. Mizik ki tris yo ka fè m kòmanse gen move panse nan lespri m.” — Tammy.

   Bib la di: “Plis pase tout lòt bagay, pwoteje kè w.” (Pwovèb 4:23). Mande tèt ou: ‘Èske mizik m konn tande yo fè m ret ap panse ak bagay negatif?’

•   Gen kèk mizik ki ka fè w vin an kòlè.

   “Gen kèk mizik agresif ki pouse moun rayi tèt yo, mizik sa yo se yon danje anba anba pou mwen. M rann mwen kont santiman m toujou chanje apre m fin tande stil mizik sa yo. Fanmi m remake sa tou.” — John.

   Bib la di: “Kanta pou kòlè, raj, mechanste, jouman, voye tout bagay sa yo jete lwen nou toutbonvre, e mo sal pa dwe soti nan bouch nou.” (Kolosyen 3:8). Mande tèt ou: ‘Èske mizik m konn tande yo fè m vin agresif e yo fè m vin ensansib devan santiman lòt moun?’

 Sa w dwe sonje? Byen chwazi mizik w ap tande. Se sa yon jèn ki rele Julie eseye fè. Men sa l di: “M toujou analize stil mizik m ap tande yo e m efase nenpòt bagay m rann mwen kont ki pa apwopriye. Sa pa toujou fasil, men, m konnen se sa m dwe fè.”

 Gen yon jèn fi, ki rele Tara, ki dakò ak sa. Men sa l di: “Pafwa, yo konn ap pase yon mizik ki chofe anpil nan radyo a, men, apre m fin tande pawòl yo m konn rann mwen kont m dwe chanje pòs la. Lè m aji konsa, se kòmsi m te sispann manje yon bon ti gato apre yon sèl kout dan! Sepandan, m konnen si m gen ase fòs pou m rejte yon mizik ki pale de sèks, sandout, m ap gen fòs pou m evite fè sèks anvan maryaj. M pa vle souzestime efè mizik m ap tande yo ka gen sou mwen.”