Engero 22:1-29
22 Okulondawo erinnya eddungi kisinga okulondawo eby’obugagga ebingi;+Okussibwamu ekitiibwa* kisinga ffeeza ne zzaabu.
2 Abagagga n’abaavu kino kye bafaananya:*
Bonna Yakuwa ye yabatonda.+
3 Omuntu ow’amagezi alaba akabi ne yeekweka,Naye atalina bumanyirivu agenda bugenzi mu maaso n’agwa mu mitawaana.
4 Obwetoowaze n’okutya YakuwaBivaamu obugagga n’ekitiibwa n’obulamu.+
5 Amaggwa n’emitego biri mu kkubo ly’abatali bagolokofu,Naye oyo ayagala obulamu bwe abyewala.+
6 Yigiriza omwana* ekkubo ly’asaanidde okutambuliramu;+Ne bw’aliba ng’akaddiye talirivaamu.+
7 Omugagga y’afuga omwavu,Era oyo eyeewola aba muddu w’oyo amuwola.+
8 Oyo asiga obutali butuukirivu akungula mitawaana,+Era omuggo gw’obusungu bwe gujja kuggwaawo.+
9 Omuntu omugabi* ajja kuweebwa emikisa,Kubanga abaavu abawa ku mmere ye.+
10 Gobawo omunyoomi,Ennyombo zijja kuggwaawo,Era enkaayana* n’okuvuma bijja kukoma.
11 Omuntu ayagala omutima omulongoofu era ayogeza ekisaAjja kufuuka mukwano gwa kabaka.+
12 Amaaso ga Yakuwa gakuuma okumanya,Naye asaanyaawo ebigambo by’ab’enkwe.+
13 Omugayaavu agamba nti: “Ebweru eriyo empologoma!
Ejja kunzitira mu luguudo!”+
14 Akamwa k’omukazi omwenzi kinnya kiwanvu.+
Oyo Yakuwa gw’asalidde omusango alikigwamu.
15 Obusirusiru buba mu mutima gw’omwana,*+Naye omuggo gubuggyamu.+
16 Oyo akumpanya omwavu ye yeegaggawaze,+N’oyo agabira abagagga ebirabo,Bajja kwavuwala.
17 Tega okutu owulire ebigambo ab’amagezi bye boogera,+Osobole okumanya bye nkuyigiriza,+
18 Kubanga kiba kirungi okubikuumira mu mutima gwo,+Osobole okubyogerangako.+
19 Nkunnyonnyodde ebintu leeroOsobole okussa obwesige mu Yakuwa.
20 NkuwandiikiddeOkukubuulirira n’okubaako bye nkuyigiriza,
21 Okukuyigiriza ebigambo ebituufu era ebyesigika,Osobole okuddayo n’obubaka obutuufu eri oyo eyakutuma.
22 Tonyaganga mwavu olw’okuba mwavu,+Era tonyigiririzanga munaku mu mulyango gw’ekibuga,+
23 Kubanga Yakuwa ajja kukakasa nti balamulwa mu bwenkanya,+Era ajja kuzikiriza abo ababanyaga.
24 Tokolagananga na muntu wa busungu,Oba oyo ow’ekiruyi,
25 Sikulwa ng’oyiga emize gyeN’ogwa mu kyambika.+
26 Tobanga mu abo abakwatagana mu ngalo okukakasa endagaano,Abeeyimirira abo ababa beewoze amabanja.+
27 Bw’oliremwa okusasula,Balitwala ekitanda kyo kw’osula!
28 Tojjululanga kabonero ak’edda akalamba olusalosaloBajjajjaabo ke bassaawo.+
29 Olabye omusajja eyakuguka mu mulimu gwe?
Ajja kuyimirira mu maaso ga bakabaka;+Tajja kuyimirira mu maaso g’abantu aba bulijjo.
Obugambo Obuli Wansi
^ Obut., “Okusiimibwa.”
^ Obut., “basisinkana.”
^ Oba, “omuvubuka.”
^ Obut., “Ow’eriiso eddungi.”
^ Oba, “emisango.”
^ Oba, “gw’omuvubuka.”