Engero 15:1-33
15 Okuddamu n’eggonjebwa* kukkakkanya ekiruyi,+Naye ekigambo eky’ekkayu* kireeta obusungu.+
2 Olulimi lw’ab’amagezi lukozesa bulungi okumanya,+Naye akamwa k’abasirusiru koogera eby’obusirusiru.
3 Amaaso ga Yakuwa gaba buli wamu,Nga gatunuulira ababi n’abalungi.+
4 Olulimi olukkakkamu* muti gwa bulamu,+Naye ebigambo ebinyooleddwanyooleddwa bireetera omuntu okuggwaamu essuubi.
5 Omuntu omusirusiru anyooma ebyo kitaawe by’amubuulirira,+Naye omuntu ow’amagezi akkiriza okugololwa.*+
6 Mu nnyumba y’omutuukirivu mubaamu eby’omuwendo bingi,Naye ebyo omubi by’akola bimuleetera emitawaana.+
7 Emimwa gy’ab’amagezi gibunyisa okumanya,+Naye omutima gw’abasirusiru si bwe gukola.+
8 Yakuwa akyayira ddala ssaddaaka z’ababi,+Naye essaala z’abagolokofu zimusanyusa.+
9 Yakuwa akyawa ekkubo ly’omubi,+Naye ayagala oyo agoberera obutuukirivu.+
10 Okukangavvulwa tekusanyusa* oyo aleka ekkubo ettuufu,+Era buli atayagala kunenyezebwa ajja kufa.+
11 Yakuwa alaba amagombe* n’ekifo eky’okuzikiririramu.*+
Kati ate olwo emitima gy’abantu?+
12 Omukudaazi tayagala oyo amuwabula.*+
Era teyeebuuza ku ba magezi.+
13 Omutima omusanyufu guleeta essanyu ku maaso,Naye ennaku emenya omwoyo.+
14 Omutima omutegeevu gunoonya okumanya,+Naye akamwa k’abasirusiru kalya* busirusiru.+
15 Ennaku zonna ez’omuntu abonaabona ziba mbi,+Naye ow’omutima omusanyufu* aba ng’ali ku mbaga ebbanga lyonna.+
16 Okuba n’ebitono ng’otya Yakuwa+Kisinga okuba n’eby’obugagga ebingi naye nga weeraliikirira.*+
17 Okulya enva endiirwa awali okwagalana+Kisinga okulya ennyama y’ente ensava awali okukyawagana.+
18 Omuntu asunguwala amangu asaanuula ennyombo,+Naye oyo alwawo okusunguwala amalawo ennyombo.+
19 Ekkubo ly’omugayaavu liringa olukomera olw’amaggwa,+Naye ekkubo ly’abagolokofu liringa oluguudo olw’omuseetwe.+
20 Omwana ow’amagezi asanyusa kitaawe,+Naye omuntu omusirusiru anyooma nnyina.+
21 Obusirusiru busanyusa atalina magezi,+Naye omuntu omutegeevu atambulira mu kkubo ettuufu.+
22 Awatali kuteesa enteekateeka zigwa butaka,Naye bwe wabaawo abawi b’amagezi* abangi wabaawo ekituukibwako.+
23 Omuntu asanyuka bw’addamu ekituufu,+Era ekigambo ekyogerwa mu kiseera ekituufu nga kiba kirungi!+
24 Eri omutegeevu ekkubo ly’obulamu lyambuka waggulu,+Okumuwonya okukka emagombe.*+
25 Yakuwa ajja kumenya ennyumba z’ab’amalala,+Naye ajja kukuuma ensalosalo za nnamwandu.+
26 Yakuwa akyawa enkwe z’omuntu omubi,+Naye ebigambo ebirungi biba birongoofu mu maaso ge.+
27 Oyo afuna amagoba mu makubo amakyamu aleetera ab’omu nnyumba ye emitawaana,*+Naye oyo akyawa enguzi ajja kusigala nga mulamu.+
28 Omutima gw’omutuukirivu gufumiitiriza nga tannaba kwanukula,*+Naye akamwa k’ababi kafubutukamu ebintu ebibi.
29 Ababi Yakuwa ababeera wala,Naye awulira essaala z’abatuukirivu.+
30 Amaaso amacamufu galeetera omutima okusanyuka;Amawulire amalungi gazzaamu amagumba amaanyi.*+
31 Oyo awuliriza okubuulirira okuwa obulamuAb’amagezi abagyaamu bulungi.+
32 Omuntu atayagala kukangavvulwa obulamu bwe tabutwala nga bwa muwendo,+Naye oyo awuliriza nga bamunenya afuna okutegeera.*+
33 Okutya Yakuwa kuyigiriza omuntu okweyisa mu ngeri ey’amagezi,+Era obwetoowaze buvaamu ekitiibwa.+
Obugambo Obuli Wansi
^ Oba, “ekiruma.”
^ Oba, “n’obukkakkamu.”
^ Oba, “Olulimi olw’okuwonya.”
^ Oba, “okunenyezebwa.”
^ Oba, “kulabika ng’okw’amaanyi ennyo eri.”
^ Oba, “ne Abaddoni.”
^ Oba, “amunenya.”
^ Oba, “kanoonya.”
^ Oba, “omulungi.”
^ Oba, “awamu n’okutabukatabuka.”
^ Oba, “abawabuzi.”
^ Oba, “okuswala.”
^ Oba, “gulowooza n’obwegendereza ku ngeri y’okuddamu; gusooka kulowooza nga tannayogera.”
^ Obut., “gagezza amagumba.”
^ Obut., “omutima.”
