ગીતશાસ્ત્ર ૭૨:૧-૨૦
સુલેમાન વિશે.
૭૨ હે ઈશ્વર, રાજાને તમારા નીતિ-નિયમો શીખવો,રાજાના દીકરાને તમારા ખરા માર્ગે ચાલવાનું વરદાન આપો.+
૨ તે સચ્ચાઈથી* તમારા લોકો માટે લડે,તમારા લાચાર લોકોનો અદ્દલ ઇન્સાફ કરે.+
૩ ઓ પર્વતો, લોકો માટે શાંતિ લઈ આવો,ઓ ટેકરીઓ, સત્યનો પ્રકાશ ફેલાવો.
૪ રાજા ગરીબ લોકોનું રક્ષણ* કરે,તે ગરીબના દીકરાઓનો બચાવ કરેઅને દગાખોરને કચડી નાખે.+
૫ જ્યાં સુધી સૂરજ-ચાંદ રહેશે,ત્યાં સુધી પેઢી દર પેઢી+તેઓ તમારો ડર રાખશે.
૬ રાજા તો કાપેલા ઘાસ પર પડતા વરસાદ જેવા થશે,ધરતીને સિંચતાં વરસાદનાં ઝાપટાં જેવા થશે.+
૭ તેમના દિવસોમાં નેક માણસ ખીલી ઊઠશે,*+ચંદ્ર રહેશે ત્યાં સુધી શાંતિ વધતી ને વધતી જશે.+
૮ રાજા સમુદ્રથી સમુદ્ર સુધી,અને નદીથી* લઈને પૃથ્વીના છેડા સુધી રાજ કરશે.*+
૯ રણમાં રહેનારાઓ તેમની આગળ નમન કરશે,તેમના વેરીઓ ધૂળ ચાટતા થઈ જશે.+
૧૦ તાર્શીશ અને ટાપુઓના રાજાઓ વેરો ભરશે.+
શેબા અને સેબાના રાજાઓ ભેટ-સોગાદો લાવશે.+
૧૧ બધા રાજાઓ તેમની આગળ નમન કરશેઅને બધી પ્રજાઓ તેમની સેવા કરશે.
૧૨ મદદનો પોકાર કરનાર ગરીબને તે છોડાવશે,લાચાર અને નિરાધારને તે બચાવશે.
૧૩ દીન-દુખિયાઓને તે કરુણા બતાવશે,ગરીબનો તે જીવ બચાવશે.
૧૪ તે તેઓને જુલમ અને હિંસામાંથી છોડાવશે,તેઓનું લોહી તેમની નજરમાં અનમોલ ગણાશે.
૧૫ તે જુગ જુગ જીવે અને તેમને શેબાનું સોનું આપવામાં આવે.+
તેમના માટે સતત પ્રાર્થના કરવામાં આવે,આખો દિવસ તેમના પર આશીર્વાદો વરસે.
૧૬ પુષ્કળ પાકથી ધરતી લહેરાઈ ઊઠશે,+મબલક પાકથી પર્વતોનાં શિખરો ઊભરાઈ જશે.
લબાનોનની જેમ રાજાના બાગ-બગીચાનાં ફળો લચી પડશે.+
ધરતી પરના ઘાસની જેમ શહેરોમાં લોકો વધશે.+
૧૭ રાજાનું નામ અમર થાય,+સૂર્ય રહે ત્યાં સુધી એ નામનો મહિમા વધે.
તેમનાથી લોકોને આશીર્વાદ મળે,+બધી પ્રજાઓ તેમને સુખી જાહેર કરે.
૧૮ ઇઝરાયેલના ઈશ્વર, યહોવા ઈશ્વરની સ્તુતિ થાઓ,+તે એકલા જ અજાયબ કામો કરે છે.+
૧૯ તેમના ગૌરવશાળી નામનો હંમેશ માટે જયજયકાર થાઓ,+આખી પૃથ્વી તેમના ગૌરવથી ભરપૂર થાઓ.+
આમેન અને આમેન.
૨૦ અહીં યિશાઈના દીકરા દાઉદની પ્રાર્થનાઓ પૂરી થાય છે.+
ફૂટનોટ
^ અથવા, “ન્યાયથી.” શબ્દસૂચિમાં “ન્યાયી” જુઓ.
^ મૂળ, “લોકોનો ન્યાય.”
^ મૂળ, “ફૂલશે-ફાલશે.”
^ અથવા, “તેમની પ્રજા હશે.”
^ એટલે કે, યુફ્રેટિસ.