ʻI he hoko ko e Kau Fakamoʻoni ʻa Sihová, ʻoku mau feinga ke pipiki ki he tuʻunga ko ha Kalisitiane ʻa ia naʻe akoʻi ʻe Sīsū ki heʻene kau ʻapositoló ke nau faí. Ko e kupu ko ení ʻoku fakahaaʻi nounou ai ʻemau ngaahi tefitoʻi tuí.

1.   ʻOtua. ʻOku mau lotu ki he ʻOtua moʻoni pē taha mo Māfimafi-Aoniu, ko e Tokotaha-Fakatupu, ko hono huafá ko Sihova. (Saame 83:18; Fakahā 4:​11) Ko e ʻOtua ia ʻo ʻĒpalahame, Mōsese mo Sīsū.​—ʻEkisoto 3:6; 32:11; Sione 20:17.

2.   Tohi Tapu. ʻOku mau tuipau ko e Tohi Tapú ko e pōpoaki fakamānavaʻi ia ʻa e ʻOtuá ki he tangatá. (Sione 17:17; 2 Tīmote 3:​16) ʻOku makatuʻunga ʻemau tuí ʻi he kotoa ʻo e ngaahi tohi ʻe 66 ʻi he Tohi Tapú, ʻa ia ʻoku kau fakatouʻosi ki ai ʻa e “Fuakava Motuʻa” mo e “Fuakava Foʻou.” Ko Palōfesa Jason D. BeDuhn naʻá ne fakamatalaʻi ʻi he loto-moʻoni ko e Kau Fakamoʻoni ʻa Sihová ko e “anga ʻo ʻenau tuí mo ʻenau tōʻongá ʻoku ʻi he fakamatala totonu tofu pē ko ia ʻo e Tohi Tapú ʻo ʻikai te nau tomuʻa fakapapauʻi ke ueʻi takai holo ʻa e meʻa ʻoku ʻi aí.” a

    Lolotonga ʻemau tali ʻa e kotoa ʻo e Tohi Tapú, ʻoku ʻikai ke mau fakaʻuhingaʻi fakahangatonu ia. ʻOku mau ʻiloʻi ko e ngaahi konga ʻi he Tohi Tapú ʻoku hiki ia ʻi he founga fakaefakatātā pe lea fakaefakatātā pea ʻoku ʻikai mahinoʻi fakahangatonu ia.​—Fakahā 1:1.

3.   Sīsū. ʻOku mau muimui ʻi he ngaahi akonaki mo e faʻifaʻitakiʻanga ʻa Sīsū Kalaisí pea fakaʻapaʻapaʻi ia ko homau Tokotaha-Faifakahaofi pea ko e ʻAlo ia ʻo e ʻOtuá. (Mātiu 20:28; Ngāue 5:​31) Ko ia ai, ko e kau Kalisitiane kimautolu. (Ngāue 11:26) Kae kehe, kuo mau ako mei he Tohi Tapú ko Sīsuú ʻoku ʻikai ko e ʻOtua Māfimafi-Aoniú ia pea ʻoku ʻikai ha makatuʻunga Fakatohitapu ki he tokāteline Tolu-Tahaʻi-ʻOtuá.​—Sione 14:28.

4.   Ko e Puleʻanga ʻo e ʻOtuá. Ko e founga-pule moʻoni eni ʻi hēvani, ka ʻoku ʻikai ko ha tuʻunga ia ʻi loto ʻi he kau Kalisitiané. Te ne fetongi ʻa e ngaahi founga-pule fakaetangata kotoa pē pea fakahoko ʻa e taumuʻa ʻa e ʻOtuá ki he māmaní. (Taniela 2:​44; Mātiu 6:​9, 10) ʻE vavé ni ʻene fakahoko ení, hangē ko ia ʻoku fakahaaʻi ʻi he kikite ʻa e Tohi Tapú ʻoku tau moʻui ʻi he “ngaahi ʻaho fakaʻosí.”​—2 Tīmote 3:​1-5; Mātiu 24:​3-​14.

    Ko Sīsū ʻa e Tuʻi ʻi he Puleʻanga ʻo e ʻOtuá ʻi hēvani. Naʻá ne kamata pule ʻi he 1914.​—Fakahā 11:15.

5.   Fakamoʻui. Ke fakahaofi mei he angahalá mo e maté ʻoku malava ia fakafou ʻi he feilaulau huhuʻi ʻa Sīsuú. (Mātiu 20:28; Ngāue 4:​12) Ke maʻu ʻaonga mei he feilaulau ko iá, ʻoku ʻikai ngata pē hono ngāueʻi ʻe he kakaí ʻenau tui kia Sīsuú ka ʻoku nau toe liliu ʻenau ʻalunga moʻuí pea papitaiso. (Mātiu 28:19, 20; Sione 3:​16; Ngāue 3:​19, 20) ʻOku fakahaaʻi ʻa e moʻoni ʻene tuí ʻi heʻene ngāué. (Sēmisi 2:​24, 26) Kae kehe, ʻoku ʻikai hokonoa mai pē ʻa e fakamoʻuí​—ʻoku fakafou ia ʻi he “ʻofa maʻataʻatā ʻa e ʻOtuá.”​—Kalētia 2:​16, 21.

6.   Hēvani. Ko Sihova ko e ʻOtuá, Sīsū Kalaisi mo e kau ʻāngelo faitōnungá ʻoku nau nofo ʻi honau nofoʻanga laumālié. b (Saame 103:19-​21; Ngāue 7:​55) Ko ha kiʻi kakai tokosiʻi ʻa ia ko e​—toko 144,000​—ʻe fokotuʻu hake kinautolu ke moʻui ʻi hēvani ke pule fakataha mo Sīsū ʻi he Puleʻangá.​—Taniela 7:​27; 2 Tīmote 2:​12; Fakahā 5:​9, 10; 14:​1, 3.

7.   Māmani. Naʻe fakatupu ʻe he ʻOtuá ʻa e māmaní ke hoko ko e ʻapi taʻengata ia ʻo e faʻahinga ʻo e tangatá. (Saame 104:5; 115:16; Koheleti 1:4) ʻE tāpuakiʻi ʻe he ʻOtuá ʻa e kakai talangofuá fakataha mo ha moʻui lelei haohaoa pea moʻui taʻengata ʻi he māmani palataisí.​—Saame 37:11, 34.

8.   Kovi mo e faingataʻa. Naʻe kamata eni ʻi he taimi naʻe angatuʻu ai ʻa e taha ʻo e kau ʻāngelo ʻa e ʻOtuá. (Sione 8:​44) Ko e ʻāngelo ko ení, ʻi he hili ʻene angatuʻú naʻe ui ia ko “Sētane” mo e “Tēvolo,” naʻá ne fakalotoʻi ʻa e ʻuluaki ongo mātuʻa fakaetangatá ke kau mo ia, pea ko hono nunuʻá naʻe fakatupu ʻauha ki hona hakó. (Sēnesi 3:​1-6; Loma 5:​12) Koeʻuhi ke fakaleleiʻi ʻa e ʻīsiu fakamōlale naʻe langaʻi ʻe Sētané, kuo fakaʻatā ai ʻe he ʻOtuá ʻa e koví mo e faingataʻá, ka heʻikai te Ne fakangofua ia ke hokohoko ʻo taʻengata.

9.   Mate. Ko e kakai kuo maté kuo ʻikai ke toe ʻi ai. (Saame 146:4; Koheleti 9:​5, 10) ʻOku ʻikai ke nau faingataʻaʻia ʻi ha afi ʻo heli.

    ʻE fakafoki mai ʻe he ʻOtuá ʻa e laui piliona mei he maté fakafou ʻi he toetuʻú. (Ngāue 24:15) Kae kehe, ko e faʻahinga ʻoku nau fakafisi ke ako ʻa e ngaahi founga ʻa e ʻOtuá ʻi he hili hono fokotuʻu hake kinautolu mei he maté ʻe fakaʻauha taʻengata kinautolu pea ʻe ʻikai ke ʻi ai haʻanau ʻamanaki ki ha toetuʻu.​—Fakahā 20:14, 15.

10.   Fāmili. ʻOku tau pipiki ki he muʻaki taumuʻa ʻa e ʻOtuá ki he nofo malí ko ha haʻi ʻo e tangata ʻe taha mo e fefine ʻe taha, ko e makatuʻunga pe ʻe taha ke fai ai ha vete ko e ʻulungaanga taʻetaau fakaefehokotaki fakasino. (Mātiu 19:​4-9) ʻOku mau tuipau ko e poto ʻoku maʻu ʻi he Tohi Tapú ʻoku tokoniʻi ai ʻa e ngaahi fāmilí ke nau lavameʻa.​—ʻEfesō 5:22–​6:1.

11.   Ko ʻemau lotú. ʻOku ʻikai ke mau fakalāngilangiʻi ʻa e kolosí pe ko ha ngaahi ʻīmisi kehe. (Teutalōnome 4:​15-​19; 1 Sione 5:​21) Ko e ngaahi tafaʻaki tefito ki heʻemau lotú ʻoku kau ki ai ʻa e:

    •   Lotu ki he ʻOtuá.​—Filipai 4:6.

    •   Lau mo ako ʻa e Tohi Tapú.​—Saame 1:​1-3.

    •   Fakalaulauloto ki he meʻa ʻoku mau ako mei he Tohi Tapú.​—Saame 77:12.

    •   Fakatahataha fakataha ke fai ha lotu, ako ʻa e Tohi Tapú, hiva, fakahāhaaʻi ʻemau tuí mo e fefakalototoʻaʻaki mo e kaungā Fakamoʻoní mo e niʻihi kehé.​—Kolose 3:​16; Hepelū 10:23-​25.

    •   Malangaʻi ʻa e “ongoongo lelei . . . ʻo e Puleʻangá.”​—Mātiu 24:14.

    •   Tokoniʻi ʻa e faʻahinga ʻoku masivá.​—Sēmisi 2:​14-​17.

    •   Langa mo tokangaʻi ʻa e ngaahi Fale Fakatahaʻangá mo e ngaahi langa kehe kuo ngāueʻaki ke fakalahi atu ai ʻemau ngāue fakaeako Tohi Tapú ʻi māmani lahi.​—Saame 127:1.

    •   Kaungākau ʻi he ngāue tokoni ki he ngaahi fakatamakí.​—Ngāue 11:27-​30.

12.   Ko ʻemau kautahá. ʻOku fokotuʻutuʻu kimautolu ki ha ngaahi fakatahaʻanga, ʻa ia ʻoku tokangaʻi tāutaha ia ʻe he kulupu ʻo e kau mātuʻá. Kae kehe, ko e kau mātuʻá ʻoku ʻikai ko ha haʻa faifekau, pea ʻoku ʻikai ke nau vahe. (Mātiu 10:8; 23:8) ʻOku ʻikai ke mau vahe-hongofulu pea ʻoku ʻikai ke fai ha tānaki paʻanga ʻi heʻemau ngaahi fakatahá. (2 Kolinitō 9:7) Ko ʻemau ngaahi ngāué kotoa ʻoku poupouʻi ia ʻe he ngaahi tokoni ʻofa.

     Ko e Kulupu Pulé, ko ha kiʻi kulupu tokosiʻi ʻo ha kau Kalisitiane matuʻotuʻa ʻoku nau ngāue ʻi heʻemau ʻuluʻi ʻapitangá, ʻoku nau ʻomai ʻa e ngaahi tataki ki he Kau Fakamoʻoni ʻa Sihova ʻi māmani lahí.​—Mātiu 24:45.

13.   Ko ʻemau fāʻūtahá. ʻI māmani lahi ʻoku fakafāʻūtahaʻi kimautolu ʻe heʻemau tuí. (1 Kolinitō 1:​10) ʻOku mau toe ngāue mālohi ke ʻoua ʻe kau ki ha tomuʻa fehiʻa fakamatakali, lau lanu pe ko ha faʻahinga fakafaʻafaʻahi pē. (Ngāue 10:34, 35; Sēmisi 2:4) Ko ʻemau fāʻūtahá ʻoku fakaʻatā ai kimautolu ke fai ha fili fakafoʻituitui. Ko e Fakamoʻoni taki taha ʻokú ne fai ha fili ʻo fehoanaki mo hono konisēnisi kuo ʻosi akoʻi ʻe he Tohi Tapú.​—Loma 14:​1-4; Hepelū 5:​14.

14.   Ko ʻemau tōʻongá: ʻOku mau feinga ke fakahāhaaʻi ʻa e ʻofa taʻesiokitá ʻi heʻemau ngāue kotoa pē. (Sione 13:34, 35) ʻOku mau fakaʻehiʻehi mei hono fai ha ngaahi tōʻonga ʻoku taʻefakahōifuaʻi ai ʻa e ʻOtuá, ʻo kau ai hono ngāuehalaʻaki ʻo e totó ʻi hono fai ha huhu toto. (Ngāue 15:28, 29; Kalētia 5:​19-​21) ʻOku mau nofo melino pea ʻikai kau ki ha tau. (Mātiu 5:9; ʻAisea 2:4) ʻOku mau tokaʻi ʻa e founga-pule ʻoku mau nofo aí pea talangofua ki he laó kapau ʻoku ʻikai fepaki mo e lao ʻa e ʻOtuá.​—Mātiu 22:21; Ngāue 5:​29.

15.   Ko homau vahaʻangatae mo e niʻihi kehé. Naʻe fekauʻi ʻe Sīsū: “Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé.” Naʻá ne toe pehē ko e kau Kalisitiané ʻoku “ʻikai ko ha konga . . . ʻo e māmaní.” (Mātiu 22:39; Sione 17:16) Ko ia ʻoku mau feinga ke fai ʻa e “ngāue ʻoku leleí ki he tokotaha kotoa,” lolotonga iá ʻoku mau hanganaki tuʻu-ʻatā mālohi mei he ngaahi meʻa fakapolitikalé pea fakaʻehiʻehi mei he feohi fakalotu mo e ngaahi lotu kehé. (Kalētia 6:​10; 2 Kolinitō 6:​14) Kae kehe, ʻoku mau tokaʻi ʻa e fili ʻoku fai ʻe he niʻihi kehé ʻi he ngaahi tuʻunga peheé.​—Loma 14:12.

 Kapau ʻoku ʻi ai haʻo toe fehuʻi ʻo fekauʻaki mo e tui ʻa e Kau Fakamoʻoni ʻa Sihová, ʻe lava ke ke lau lahi ange ʻo fekauʻaki mo kimautolu ʻi heʻemau uepisaití, fetuʻutaki ki he taha ʻo homau ʻōfisí, maʻu ha fakataha ʻi ha Fale Fakatahaʻanga ʻoku ofi atu, pe ko hoʻo talanoa ki ha Fakamoʻoni ʻi ho feituʻú.