‘Oku ‘ikai ke vahe ‘a ‘emau kau faifekau ‘i he‘emau kautahá. ‘I hono kehé, hangē ko ia na‘e fai ‘i he taimi na‘e kamata ai ‘a e fakataha‘anga Kalisitiané, ‘oku fakanofo ‘a e kau ‘ovasia taau “ke tauhi ‘a e fakataha‘anga ‘a e ‘Otuá.” (Ngāue 20:28) Ko e kau mātu‘a ko ení ko e kau tangata matu‘otu‘a fakalaumālie ‘oku nau takimu‘a ‘i he fakataha‘angá mo fai ‘a e tauhí, “‘o ‘ikai fai fakafatongia pē, ka ‘i he loto-lelei ‘i he ‘ao ‘o e ‘Otuá; ‘o ‘ikai ‘i he ‘ofa ki ha me‘a ‘oku ma‘u ta‘efaitotonu, ka ‘i he loto-vēkeveke.” (1 Pita 5:1-3) Ko e hā ‘a e ngāue ‘oku nau fai ma‘amautolú?

‘Oku nau tokanga kiate kimautolu pea malu‘i kimautolu. ‘Oku tataki mo tokoni ‘a e kau mātu‘á ke malu‘i fakalaumālie ‘a e fakataha‘angá. ‘I hono ‘ilo‘i kuo tuku kiate kinautolu ‘e he ‘Otuá ‘a e fatongia mahu‘inga ko ení, ko e kau mātu‘á ‘oku ‘ikai te nau pule‘i ‘a hono kakaí, ka ‘i hono kehé, ‘oku nau tokoni ki ha‘amau lelei mo e fiefia. (2 Kolinitō 1:24) Hangē pē ko e tokanga fakamātoato ‘a ha tauhi-sipi ki he‘ene sipi taki taha, ‘oku feinga ‘a e kau mātu‘á ke nau ‘ilo‘i ‘a e mēmipa tāutaha kotoa pē ‘o e fakataha‘angá.​—Palōveepi 27:23.

‘Oku nau ako‘i kiate kimautolu ‘a e founga ke fai ai ‘a e finangalo ‘o e ‘Otuá. ‘I he uike kotoa pē, ‘oku tokanga‘i ai ‘e he kau mātu‘á ‘a e ngaahi fakataha ‘a e fakataha‘angá koe‘uhí ke ‘ai ke mālohi ‘emau tuí. (Ngāue 15:32) Ko e kau tangata lī‘oa ko ení ‘oku nau toe takimu‘a ‘i he ngāue faka‘evangelioó, ngāue fakataha mo kimautolu pea ako‘i kimautolu ‘i he tafa‘aki kotoa pē ‘o e ngāue fakafaifekaú.

‘Oku nau ‘omai kiate kimautolu ‘a e fakalototo‘a fakafo‘ituitui. Koe‘uhi ke tokanga‘i ‘a ‘emau ngaahi fiema‘u fakalaumālie tāutahá, ‘oku ‘a‘ahi mai nai ai ‘a e kau mātu‘a fakalotofonuá ki homau ‘apí pe ‘i he Fale Fakataha‘angá ke ‘omai ‘a e tokoni mo e fakafiemālie mei he Folofolá.​—Sēmisi 5:14, 15.

Tānaki atu ki he‘enau ngāue ‘i he fakataha‘angá, ko e tokolahi taha ‘o e kau mātu‘á ‘oku toe ‘i ai ‘enau ngaahi ngāue fakamāmani mo e ngaahi fatongia fakafāmili ‘oku fiema‘u ki ai ‘a honau taimí mo ‘enau tokangá. Ko e fanga tokoua ngāue mālohi ko ení ‘oku nau tuha mo ‘emau faka‘apa‘apá.​—1 Tesalonaika 5:12, 13.

• Ko e hā ‘a e fatongia ‘o e kau mātu‘a ‘i he fakataha‘angá?

• ‘I he ngaahi founga fē ‘oku fakahāhā ai ‘e he kau mātu‘á ‘a e mahu‘inga‘ia fakafo‘ituitui ‘iate kimautolú?