Ko e ngaahi ʻuhinga eni ʻoku ʻikai ʻalu ai ʻa e Kau Fakamoʻoni ʻa Sihová ʻi he taú:

1.   Talangofua ki he ʻOtuá. ʻOku pehē ʻe he Tohi Tapú ko e kau sevāniti ʻa e ʻOtuá te nau “tuki huo ʻaki ʻenau ngaahi heleta” pea ʻikai “kei fai ha akotau.”—ʻAisea 2:4.

2.   Talangofua kia Sīsū. Naʻe tala ange ʻe Sīsū ki he ʻapositolo ko Pitá: “Fakafoki hoʻo heletaá ki hono ʻaiʻangá, he ko kinautolu kotoa ʻoku nau toʻo ʻa e heletaá te nau ʻauha ʻi he heletaá.” (Mātiu 26:52) Naʻe fakahaaʻi ai ʻe Sīsū ko hono kau muimuí heʻikai ke nau toʻo meʻatau.

    Naʻe talangofua ʻa e kau ākonga ʻa Sīsuú ki heʻene fekau ke ‘ʻikai ko ha konga ʻo e māmaní,’ ʻaki ʻa e hanganaki tuʻu-ʻatā fakaʻaufuli mei he ngaahi meʻa fakapolitikalé. (Sione 17:16) ʻOku ʻikai ke nau fakafepaki ki he ngāue fakakautaú pe kaunoa ʻi he faʻahinga ʻoku nau fili ke kau ʻi he kau taú.

3.   ʻOfa ki he niʻihi kehé. Naʻe fekauʻi ʻe Sīsū ʻene kau ākongá ke nau “feʻofaʻaki.” (Sione 13:34, 35) Te nau faʻu ai ha fetokouaʻaki fakavahaʻapuleʻanga ʻa ia heʻikai ʻaupito kau ha taha ʻi ha faitau mo hono tokoua pe tuofefiné.—1 Sione 3:10-12.

4.   Ko e faʻifaʻitakiʻanga ʻa e muʻaki kau Kalisitiané. ʻOku pehē ʻe he Encyclopedia of Religion and War: “Ko e muʻaki kau muimui ʻo Sīsuú naʻa nau talitekeʻi ʻa e taú mo e ngāue fakakautaú,” ʻo ʻiloʻi ko e ngaahi tōʻonga ko iá “ʻoku ʻikai fehoanaki ia mo e ʻofa ʻa Sīsuú mo e fekau ke ʻofa ki hoto ngaahi filí.” Pehē foki, naʻe pehē ʻe he teolosia Siamane ko Peter Meinhold fekauʻaki mo e muʻaki kau ākonga ʻa Sīsuú: “Ko e hoko ko ha Kalisitiane pea mo ha sōtiá naʻe vakai ki ai ʻoku hōhoatamaki.”

 Ko e Kau Fakamoʻoni ʻa Sihová ko e kau mēmipa ʻaonga ki he sōsaietí pea ʻoku ʻikai ko ha fakamanamana kinautolu ki he malu ʻa e fonua ʻoku nau nofo aí. ʻOku mau fakaʻapaʻapaʻi ʻa e mafai fakapuleʻangá, ʻo fehoanaki mo e ngaahi fekau Fakatohitapu ko ení:

•   ‘Fakamoʻulaloa ki he ngaahi mafai māʻolungá.’—Loma 13:1.

•   “Ko ia, totongi fakafoki kia Sisa ʻa e ngaahi meʻa ʻa Sisá, ka ki he ʻOtuá ʻa e ngaahi meʻa ʻa e ʻOtuá.”—Mātiu 22:21.

 Ko ia ai, ʻoku mau talangofua ki he laó, totongi ʻemau tukuhaú pea ngāue fakataha mo e puleʻangá ʻi he feinga ke tokonaki ʻa e lelei maʻá e kakaí.