Fakatatau kia Sione 20:1-31
20 ʻI he ʻuluaki ʻaho ʻo e uiké, naʻe haʻu pongipongia ai ʻa Mele Makitala ki he fonualotó,*+ lolotonga ia naʻe kei fakapoʻuli, pea naʻá ne sio atu kuo ʻosi toʻo ʻa e maká ia mei he fonualotó.*+
2 Ko ia naʻá ne lele kia Saimone Pita pea ki he ākonga ʻe taha, ʻa ia naʻe ʻofa ai ʻa Sīsuú,+ peá ne pehē kiate kinaua: “Kuo nau ʻave ʻa e ʻEikí mei he fonualotó,+ pea ʻoku ʻikai ke mau ʻilo pe kuo nau tuku ia ʻi fē.”
3 Naʻe ʻalu atu leva ʻa Pita mo e ākonga ʻe tahá ki he fonualotó.
4 Naʻe kamata lele fakataha ʻa e ongo tamá, ka ko e ākonga ʻe tahá naʻe lele oma ange ia ʻia Pita ʻo ne ʻuluaki aʻu ki he fonualotó.
5 ʻI heʻene tulolo atú, naʻá ne sio ki he ngaahi tupenu līnení ʻoku tuku mai ai,+ ka naʻe ʻikai te ne hū ki loto.
6 Pea naʻe muimui mai foki mo Saimone Pita ʻiate ia ʻo ne hū atu ki he fonualotó. Pea naʻá ne sio ʻoku tuku mai ai ʻa e ngaahi tupenu līnení.
7 Ko e tupenu ko ia naʻe ʻai ʻi hono ʻulú naʻe ʻikai ke tuku fakataha mai ia mo e ngaahi konga tupenu kehé ka naʻe takatakai kehe pē ia ʻi ha potu ʻe taha.
8 Pea naʻe toe hū atu mo e ākonga ko ia ʻe taha naʻe ʻuluaki aʻu ki he fonualotó, ʻo ne sio ki ai peá ne tui.
9 He naʻe teʻeki ke na mahinoʻi ʻa e potu folofola ʻa ia naʻe pehē kuo pau ke ne tuʻu hake mei he maté.+
10 Ko ia naʻe foki ʻa e ongo ākongá ki honau ʻapí.
11 Kae kehe, naʻe tuʻu ai pē ʻa Mele ʻi tuʻa ʻo ofi ki he fonualotó mo tangi. Lolotonga ʻene kei tangí, naʻá ne tulolo atu ke fakasio ki loto ki he fonualotó,
12 peá ne sio ai ki ha ongo ʻāngelo+ teunga hina ʻokú na tangutu ʻi he feituʻu naʻe fakatokoto ai ʻa e sino ʻo Sīsuú, ko e taha ʻi he ʻulú pea taha ʻi he vaʻé.
13 Pea naʻá na pehē kiate ia: “Fefine, ko e hā ʻokú ke tangi aí?” Naʻá ne pehē ange kiate kinaua: “Kuo nau ʻave hoku ʻEikí, pea ʻoku ʻikai te u ʻilo ʻa e feituʻu kuo nau tuku ai iá.”
14 ʻI he hili ʻene leaʻaki ʻa e meʻá ni, naʻá ne tafoki hake ʻo ne sio kia Sīsū ʻoku tuʻu mai, ka naʻe ʻikai te ne ʻiloʻi ko Sīsū ia.+
15 Naʻe pehē ange ʻe Sīsū kiate ia: “Fefine, ko e hā ʻokú ke tangi aí? Ko hai ʻokú ke fakasió?” ʻI heʻene fakakaukau ko e tauhi ngoué iá, naʻá ne pehē atu kiate ia: “Tangataʻeiki, kapau kuó ke ʻave ia, tala mai kiate au ʻa e feituʻu kuó ke tuku ai iá, pea te u ʻave ia.”
16 Naʻe pehē ange ʻe Sīsū kiate ia: “Mele!” ʻI heʻene tafoki haké, naʻá ne pehē kiate ia ʻi he lea faka-Hepeluú: “Lāponai!” (ʻa ia ʻoku ʻuhingá “Faiako!”)
17 Naʻe pehē ʻe Sīsū kiate ia: “ʻOua te ke piki mai kiate aú, he kuo teʻeki ai ke u ʻalu hake ki he Tamaí. Ka ke ʻalu ki hoku fanga tokouá+ ʻo pehē kiate kinautolu, ‘ʻOku ou ʻalu hake ki heʻeku Tamaí+ pea ko hoʻomou Tamai pea ki hoku ʻOtuá+ pea ko homou ʻOtua.’”
18 Naʻe haʻu ʻa Mele Makitala ʻo ne ʻomi ʻa e ongoongó ni ki he kau ākongá: “Kuó u mamata ki he ʻEikí!” Pea naʻá ne tala ange kiate kinautolu ʻa e meʻa naʻá ne leaʻaki kiate iá.+
19 ʻI he efiafi hifo ʻa e ʻaho ko iá, ʻa e ʻuluaki ʻaho ʻo e uiké, pea naʻe lokolokaʻi ʻa e ngaahi matapā ʻi he potu naʻe ʻi ai ʻa e kau ākongá koeʻuhi ko ʻenau manavahē ki he kau Siú, naʻe haʻu ʻa Sīsū ʻo ne tuʻu ʻi honau lotolotongá peá ne pehē kiate kinautolu: “Fakatauange ke mou maʻu ʻa e melinó.”+
20 ʻI he hili hono leaʻaki ení, naʻá ne fakaʻaliʻali kiate kinautolu ʻa hono ongo nimá mo hono vakavaká.+ Ko ia naʻe fiefia ʻa e kau ākongá ʻi he sio ki he ʻEikí.+
21 Naʻe toe pehē ʻe Sīsū kiate kinautolu: “Fakatauange ke mou maʻu ʻa e melinó.+ Hangē tofu pē ko hono fekauʻi mai au ʻe he Tamaí,+ ʻoku ou fekauʻi atu foki kimoutolu.”+
22 ʻI he hili hono leaʻaki ʻení naʻá ne hō kiate kinautolu peá ne pehē kiate kinautolu: “Mou maʻu ʻa e laumālie māʻoniʻoní.+
23 Kapau ʻoku mou fakamolemoleʻi ʻa e angahala ʻa ha taha, kuo fakamolemoleʻi ia; kapau ʻoku ʻikai te mou fakamolemoleʻi ʻa e angahala ʻa ha taha, ʻoku ʻikai fakamolemoleʻi ia.”
24 Ka ko Tōmasi,+ ko e taha ʻo e toko Hongofulu-mā-uá, ʻa ia naʻe ui ko e Māhangá, naʻe ʻikai ke ne ʻiate kinautolu ʻi he taimi naʻe haʻu ai ʻa Sīsuú.
25 Ko ia naʻe tala ange ʻe he kau ākonga kehé kiate ia: “Kuo mau mamata ki he ʻEikí!” Ka naʻá ne pehē ange kiate kinautolu: “Ka ʻikai ke u sio ki he ngaahi mataʻifaʻo ʻi hono ongo nimá peá u mono hoku tuhú ki he ngaahi mataʻifaʻó peá u mono hoku nimá ki hono vakavaká,+ heʻikai ʻaupito ke u tui au ki ai.”
26 Pea ʻi he hili mei ai ʻa e ʻaho ʻe valu naʻe toe nofo ai ʻi fale ʻa ʻene kau ākongá, pea naʻe ʻi ai ʻa Tōmasi mo kinautolu. Naʻe haʻu ʻa Sīsū, neongo naʻe lokolokaʻi ʻa e ngaahi matapaá, pea naʻá ne tuʻu ʻi honau lotolotongá peá ne pehē: “Fakatauange ke mou maʻu ʻa e melinó.”+
27 Ko hono hokó naʻá ne pehē kia Tōmasi: “ʻAi mai ho tuhú ki heni, pea vakai mai ki hoku ongo nimá, pea mono mai ho nimá ki hoku vakavaká, pea tuku hoʻo veiveiuá* ka ke tui.”
28 ʻI he tali ki aí naʻe pehē ange ʻe Tōmasi kiate ia: “Ko hoku ʻEiki mo hoku ʻOtua!”
29 Naʻe pehē ange ʻe Sīsū kiate ia: “Kuó ke tuí koeʻuhí ko hoʻo mamata kiate aú? Fiefia ē ko kinautolu kuo ʻikai mamata ka ʻoku nau tuí.”
30 Ke fakapapauʻí, naʻe toe fakahoko ʻe Sīsū ha toe ngaahi mana lahi ʻi he ʻao ʻo e kau ākongá, ʻa ia ʻoku ʻikai ke hiki ʻi he takainga tohí ni.+
31 Ka kuo hiki ʻa e ngaahi meʻá ni koeʻuhí ke mou tui ko Sīsū ʻa e Kalaisí, ko e ʻAlo ʻo e ʻOtuá, pea ko e meʻa ʻi hoʻomou tuí, te mou lava ai ʻo maʻu ʻa e moʻuí fakafou ʻi hono huafá.+
Fakamatala ‘i Lalo
^ Pe “fonualoto fakamanatú.”
^ Pe “fonualoto fakamanatú.”
^ Fakafoʻilea, “taʻetuí.”
