Ngāue ʻa e Kau ʻApositolo 5:1-42
5 Kae kehe, ko ha tangata ko hono hingoá ko ʻAnanaia mo hono uaifí ko Sāfaila, naʻá na fakatau atu ha konga ʻapi.
2 Ka naʻá ne tuku fakafufū ha konga ʻo e totongí, ʻo ʻilo ki ai mo hono uaifí, peá ne ʻomi hano konga pē ʻo ne tuku atu ia ki he vaʻe ʻo e kau ʻapositoló.+
3 Ka naʻe pehē ange ʻe Pita: “ʻAnanaia, ko e hā kuo fakalotolahiʻi ai koe ʻe Sētane ke ke loi+ ki he laumālie māʻoniʻoní+ peá ke tuku fakafufū ʻa e konga ʻo e totongi ʻo e kelekelé?
4 ʻI heʻene kei ʻiate koé, ʻikai naʻe kei hoko pē ia ko hoʻo meʻa? Pea ʻi he hili hono fakatau atu iá, ʻikai naʻá ke kei pule pē ki ai? Ko e hā kuó ke fakakaukauʻi ai ha ngāue peheni ʻi ho lotó? Kuó ke loi, ʻo ʻikai ki he tangatá, ka ki he ʻOtuá.”
5 ʻI he fanongo ki he ngaahi leá ni, naʻe hoholo hifo ʻa ʻAnanaia ʻo mate. Pea naʻe hoko ha fuʻu manavahē ki he faʻahinga kotoa naʻe fanongo aí.
6 Pea naʻe mālanga hake ha kau talavou ʻo kofu ia ʻaki ha ngaahi tupenu, pea nau fata atu ia ʻo tanu.
7 Pea ʻi he hili atu ha vahaʻa taimi ko ha houa nai ʻe tolu naʻe hū mai hono uaifí, naʻe ʻikai te ne ʻilo ki he meʻa kuo hokó.
8 Naʻe pehē ange ʻe Pita kiate ia: “Tala mai kiate au, naʻá mo fakatau atu ʻa e konga kelekelé ki he lahi ko ē?” Naʻá ne pehē: “ʻIo, ki he lahi ko iá.”
9 Ko ia naʻe pehē ange ʻe Pita kiate ia: “Ko e hā naʻá mo felotoi ai ke ʻahiʻahiʻi ʻa e laumālie ʻo Sihová?* Vakai! Ko e vaʻe ʻo e faʻahinga ko ia naʻa nau tanu ho husepānití ʻoku ʻi he matapaá, pea te nau fata atu mo koe.”
10 Tuai-e-kemo naʻá ne hoholo hifo ʻi he vaʻe ʻo Pitá ʻo mate. ʻI he hū mai ʻa e kau talavoú, naʻa nau ʻilo ia kuó ne mate pea nau fata atu ia ʻo tanu ʻi he tafaʻaki ʻo hono husepānití.
11 Ko ia naʻe hoko ha fuʻu manavahē ʻi he kotoa ʻo e fakatahaʻangá pea ʻi he faʻahinga kotoa naʻe fanongo fekauʻaki mo e ngaahi meʻá ni.
12 ʻIkai ngata aí, fakafou ʻi he nima ʻo e kau ʻapositoló naʻe hokohoko atu ai ʻa e hoko ʻa e ngaahi mana mo e ngaahi meʻa fakaofo lahi ʻi he lotolotonga ʻo e kakaí;+ pea naʻa nau fakatahataha kotoa ʻi he Hala Fakafale ʻo Solomoné.+
13 Ko e moʻoni, naʻe ʻikai ha taha ʻi he niʻihi kehé naʻe loto-toʻa ke kau mo kinautolu; ka neongo ia, naʻe fakavīkivikiʻi kinautolu ʻe he kakaí.
14 Mahulu atu aí, naʻe tupulekina ai pē ʻa e kau tui ki he ʻEikí, ko ha fuʻu tokolahi ʻo e kakai tangata mo e kakai fefine.+
15 Naʻe aʻu ʻo nau ʻomi ki tuʻa ʻa e kau mahakí ki he ngaahi hala lalahí pea fakatākoto kinautolu ai ʻi he fanga kiʻi mohenga mo e ngaahi meʻa-fata, koeʻuhi ʻi ha ʻalu hake ʻa Pita, heiʻilo naʻa lave hono ʻatá ʻi ha niʻihi ʻo kinautolu.+
16 Pehē foki, naʻe hanganaki omi ha fuʻu kakai mei he ngaahi kolo takatakai ʻi Selusalemá, ʻo nau fata mai ʻa e kakai naʻe puke mo e faʻahinga naʻe uesia ʻe he ngaahi laumālie ʻulí, pea naʻe fakamoʻui kātoa kinautolu.
17 Ka naʻe mālanga hake ʻa e taulaʻeiki lahí pea mo e faʻahinga kotoa naʻe ʻiate iá, ʻa ia naʻa nau kau ʻi he kulupu lotu ʻa e kau Sātusí, pea naʻa nau fonu ʻi he meheká.
18 Pea naʻa nau puke ʻa e kau ʻapositoló ʻo tuku ki he pilīsone fakapuleʻangá.+
19 Ka ʻi he lolotonga ʻa e poʻulí, naʻe fakaava ʻe he ʻāngelo ʻa Sihová* ʻa e ngaahi matapā ʻo e pilīsoné,+ ʻo ʻomai kinautolu ki tuʻa peá ne pehē:
20 “Mou ʻalu ʻo tuʻu ʻi he temipalé, pea hanganaki lea ki he kakaí ʻaki ʻa e kotoa ʻo e ngaahi lea fekauʻaki mo e moʻuí ni.”
21 ʻI he hili ʻa e fanongo ki he meʻá ni, naʻa nau hū ki he temipalé ʻi he maʻa hake ʻa e ʻahó ʻo kamata ke faiako.
ʻI he aʻu mai leva ʻa e taulaʻeiki lahí mo e faʻahinga naʻe ʻiate iá, naʻa nau ui fakatahataha mai ʻa e Sanetalimí* pea mo e fuʻu fakataha fakakātoa ʻo e kau mātuʻa ʻo e kau ʻIsilelí, pea naʻa nau fekau atu ki he pilīsoné ke ʻomai ʻa e kau ʻapositoló ki honau ʻaó.
22 Ka ʻi he aʻu atu ʻa e kau ʻōfisá ki aí, naʻe ʻikai te nau sio kiate kinautolu ʻi he pilīsoné. Ko ia naʻa nau foki mai ʻo nau fakamatala,
23 ʻo pehē: “Naʻa mau sio ki he pilīsoné naʻe lokaʻi mo malu ʻaupito, pea naʻe tuʻu pē ʻa e kau kaʻaté ʻi he ngaahi matapaá, ka ʻi hono fakaava iá, naʻe ʻikai te mau sio ki ha taha ʻi loto.”
24 Ko ia, ʻi he fanongo fakatouʻosi ʻa e kapiteni ʻo e kau leʻo ʻo e temipalé pea mo e houʻeiki taulaʻeikí ki he ngaahi leá ni, naʻa nau puputuʻu pe ko e hā ʻe iku ki ai ʻa e meʻá ni.
25 Ka naʻe haʻu ha taha ʻo ne fakahā kiate kinautolu: “Vakai! Ko e kau tangata naʻa mou tuku pilīsoné ʻoku nau ʻi he temipalé, ʻoku nau tuʻu ai ʻo faiako ki he kakaí.”
26 Naʻe ʻalu atu leva ʻa e kapitení mo ʻene kau ʻōfisá ʻo ʻomai kinautolu, kae ʻikai ʻi he fakamālohi, koeʻuhi naʻa nau manavahē ki hano tolomakaʻi kinautolu ʻe he kakaí.+
27 Ko ia naʻa nau ʻomai kinautolu ʻo fokotuʻu ʻi he ʻao ʻo e Sanetalimí. Naʻe fakafehuʻi leva kinautolu ʻe he taulaʻeiki lahí
28 peá ne pehē: “Naʻa mau mātuʻaki tuʻutuʻuni atu ke ʻoua te mou toe faiako ʻi he hingoa ko ení,+ pea vakai, kuo mou fakafonu ʻa Selusalema ʻaki hoʻomou akonakí, pea ʻoku mou tukupā ke hilifaki kiate kimautolu ʻa e toto ʻo e tangatá ni.”+
29 ʻI he tali ki aí naʻe pehē ʻe Pita mo e kau ʻapositolo kehé: “Kuo pau ke mau talangofua ki he ʻOtuá ko e pulé ia kae ʻikai ki he tangatá.+
30 Ko e ʻOtua ʻo ʻemau fanga kuí naʻá ne fokotuʻu hake ʻa Sīsū, ʻa ia naʻa mou tāmateʻi ʻo tautau ʻi he ʻakaú.+
31 Naʻe hakeakiʻi ʻe he ʻOtuá ʻa e tokotahá ni ʻi hono tuʻunga ko e Fakafofonga Tefito+ mo e Fakamoʻuí+ ki hono nima toʻomataʻú,+ ke ʻoange ʻa e fakatomalá ki ʻIsileli pea mo e fakamolemole ʻo e angahalá.+
32 Pea ko e kau fakamoʻoni kimautolu ki he ngaahi meʻá ni,+ pea pehē foki ki he laumālie māʻoniʻoní,+ ʻa ia kuo foaki ʻe he ʻOtuá ki he faʻahinga ʻoku talangofua kiate ia ko e pulé.”
33 ʻI heʻenau fanongo ki he meʻá ni, naʻa nau teketekelili pea nau loto ke tāmateʻi ʻa e kau ʻapositoló.
34 Ka naʻe mālanga hake ʻi he Sanetalimí ha Fālesi ko hono hingoá ko Kāmelieli;+ ko ha faiako Lao ia naʻe tokaʻi ʻe he kakaí kotoa, peá ne fai ʻa e tuʻutuʻuni ke kiʻi tuku atu ki tuʻa ʻa e kau tangatá.
35 Naʻá ne pehē ange leva kiate kinautolu: “ʻA e kau tangata ʻo ʻIsileli, mou tokanga ki he meʻa ʻoku teu ke mou fai ki he kau tangatá ni.
36 Ko e fakatātaá, ki muʻa ʻi he ngaahi ʻaho ko ení naʻe ʻasi hake ai ʻa Teutasi, ʻo pehē ko e tokotaha lahi ia, pea naʻe ʻi ai ʻa e kau tangata, ko e toko 400 nai, naʻe kau ki heʻene faʻahí. Ka naʻe tāmateʻi ia, pea ko e faʻahinga kotoa naʻe muimui kiate iá naʻa nau movete ʻo ʻikai ke toe ʻi ai.
37 ʻI he hili iá, naʻe ʻasi hake ʻa Siutasi ko e Kālelí ʻi he ngaahi ʻaho ʻo e lēsisitá, pea naʻá ne tohoakiʻi ha faʻahinga ke muimui ʻiate ia. Naʻe toe mate mo e tangata ko iá, pea ko e faʻahinga kotoa naʻe muimui kiate iá naʻa nau movete.
38 Ko ia ʻi he ngaahi tuʻungá ni, ʻoku ou lea atu kiate kimoutolu, ʻoua te mou kaunoa ʻi he kau tangatá ni, kae tukunoaʻi kinautolu. He kapau ko e faʻufaʻú ni pe ko e ngāué ni ʻoku mei he tangatá, ʻe liua ia;
39 ka ʻo kapau ʻoku mei he ʻOtuá ia, heʻikai malava ke mou liua kinautolu.+ Naʻa ʻiloangé te mou hoko ai ko e kau faitau ʻo fakafepaki ki he ʻOtuá.”+
40 ʻI he meʻá ni naʻa nau fai ki heʻene faleʻí, pea nau ui mai ʻa e kau ʻapositoló ʻo haha*+ pea tuʻutuʻuni ke tuku ʻenau lea ʻi he huafa ʻo Sīsuú, pea tuku ange leva kinautolu ke nau ō.
41 Ko ia naʻa nau ʻalu atu mei he ʻao ʻo e Sanetalimí ʻoku nau fiefia+ koeʻuhi kuo lau kinautolu ʻoku taau ke ngaohikoviʻi koeʻuhi ko hono huafá.
42 Pea ʻi he ʻaho kotoa pē ʻi he temipalé pea mei he fale ki he fale,+ naʻa nau hokohoko atu ʻo ʻikai tuku ʻa e faiako mo hono talaki ʻa e ongoongo lelei fekauʻaki mo e Kalaisí, ʻa Sīsū.+
Fakamatala ‘i Lalo
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Lea mo Hono ʻUhinga.
^ Pe “tā.”
