Ko e Kulupu Pulé ko ha kiʻi kulupu ia ʻo ha kau Kalisitiane matuʻotuʻa ʻoku nau tokonaki mai ʻa e tataki ki he Kau Fakamoʻoni ʻa Sihová ʻi māmani lahi. ʻOku tafaʻaki ʻe ua ʻenau ngāué:

•   ʻOku nau tokangaʻi hono teuteuʻi ʻo e ngaahi fakahinohino Fakatohitapu fakafou ʻi he ʻū tohí, ngaahi fakatahá, mo e ngaahi ako ʻa e Kau Fakamoʻoni ʻa Sihová.​​​—Luke 12:42.

•   ʻOku nau fokotuʻutuʻu ʻa e ngāue ʻa e Kau Fakamoʻoni ʻa Sihova ʻi māmani lahí ʻaki hono tataki ʻemau ngāue fakafaifekaú, tokangaʻi ʻa hono ngāueʻaki ʻa e ngaahi koloá.

 ʻOku muimui ʻa e Kulupu Pulé ki he sīpinga naʻe fokotuʻu ʻe he “kau ʻapositoló pea mo e kau mātuʻa ʻi Selusalemá” ʻi he ʻuluaki senitulí, naʻa nau fai ha ngaahi fili mahuʻinga maʻá e fakatahaʻanga Kalisitiané. (Ngāue 15:2) ʻI he hangē ko e kau tangata faitōnunga ko ení, ko e kau mēmipa ʻo e Kulupu Pulé ʻoku ʻikai ko e kau taki ia ʻo ʻemau kautahá. ʻOku nau hanga ki he Tohi Tapú ki ha tataki, ʻo lāuʻilo ko Sihova ko e ʻOtuá kuó ne fakanofo ʻa Sīsū Kalaisi ko e ʻUlu ʻo e fakatahaʻangá.​​​—1 Kolinitō 11:3; ʻEfesō 5:​23.

 Ko e kau mēmipa ʻo e Kulupu Pulé ko Kenneth Cook Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane mo Jeffrey Winder. ʻOku nau ngāue ʻi homau ʻuluʻi ʻapitanga ki he māmaní ʻi Warwick, Niu ʻIoke, U.S.A.

 Kuo fokotuʻu ʻe he Kulupu Pulé ha kōmiti ʻe ono ke tokangaʻi ʻa e ngaahi tafaʻaki kehekehe ʻemau ngāué, pea ʻoku tokangaʻi ʻe he mēmipa taki taha ha kōmiti ʻe taha pe lahi ange.

•   Kōmiti Faiako: Tataki hono teuteu ʻo e fakahinohino fakalaumālié ʻo fakafou ʻi he ngaahi fakatahá, akó, polokalama hiki-leʻo mo e vitioó.

•   Kōmiti Hiki-Tohi: Tataki hono teuteu ʻo e ngaahi fakahinohino fakalaumālie ʻoku hā ʻi he ngaahi meʻa ʻoku pulusí mo ʻemau uepisaití mo tokangaʻi ʻa e ngāue liliu leá.

•   Kōmiti Kau Ngāue: Tokangaʻi ʻa e ngaahi fokotuʻutuʻu ki he kau mēmipa ʻo e fāmili Pētelí.

•   Kōmiti Kouʻotineita: Tokangaʻi ʻa e ngaahi meʻa fakalaó mo tokoni ki he fakatamakí, ngaahi meʻa ʻoku hoko ki he Kau Fakamoʻoni ʻa Sihova ʻoku fakatangaʻi koeʻuhi ko ʻenau tui fakalotú mo ha meʻa fakatuʻupakē pē ʻokú ne uesia ʻa e Kau Fakamoʻoni ʻa Sihová.

•   Kōmiti Ngāue: Tokangaʻi ʻemau ngāue malangaʻi ʻo e ‘ongoongo lelei ʻo e Puleʻangá.’​​​—Mātiu 24:14.

•   Kōmiti Pulusi: Tokangaʻi hono faʻu mo fakafolau holo ʻa e ʻū tohi Fakatohitapú mo hono langa ʻo e ngaahi fale fakatahaʻanga, ʻōfisi liliu lea mo e vaʻa.

 Tānaki atu ki he ngāue ʻa e ngaahi kōmiti ko ení, ʻoku fakataha ʻa e Kulupu Pulé ʻi he uike taki taha ke talanoaʻi ʻa e ngaahi fiemaʻu ʻa e kautahá. ʻI he ngaahi fakataha ko ení, ʻoku lāulea ai ʻa e kau mēmipá ki he meʻa ʻoku leaʻaki ʻe he Folofolá, pea nau ʻulutukua ki he tataki ʻa e laumālie māʻoniʻoni ʻo e ʻOtuá pea feinga ke fai ha fili ʻi he loto-taha.​​​—Ngāue 15:25.

 Ko e kau Kalisitiane falalaʻanga eni ʻoku nau tokoni ki he ngaahi kōmiti ʻo e Kulupu Pulé. (1 Kolinitō 4:2) ʻOku nau maʻu ʻa e malava mo e taukei ʻi he ngāue ʻoku tokangaʻi ʻe he kōmiti ʻoku vaheʻi kinautolu ki aí pea nau maʻu ʻa e fakataha fakauiké. Neongo ʻoku ʻikai ke nau kau ki hono fai ʻa e ngaahi filí, ʻoku tokonaki ʻe he kau tokoní ha faleʻi mahuʻinga mo ha fakamatala ʻaonga, fakahoko ʻa e fili ʻa e ngaahi kōmití pea muimuiʻi ʻa e ngaahi ola ʻo e ngaahi fili ko ení. ʻE toe vaheʻi ʻe he Kulupu Pulé ke nau ʻaʻahi ki homau fanga tokoua ʻi he feituʻu kehekehe ʻo e māmaní pe ko hono fakahoko ha ngaahi konga ʻi he ngaahi fakataha lalahi ʻoku fakahoko hangē ko e fakataha fakataʻú pe maʻu tohi fakamoʻoni ako Kiliatí.