Saame 104:1-35
104 Tuku ke u fakahīkihikiʻi ʻa Sihova.+
ʻE Sihova ko hoku ʻOtua, ʻokú ke lahi ʻaupito.+
ʻOku fakakofuʻaki koe ʻa e lāngilangi* pea mo e fakaʻofoʻofa.+
2 ʻOku takatakaiʻi koe ʻe he māmá+ ʻo hangē ha kofú;ʻOkú ke folahi atu ʻa e langí ʻo hangē ha tupenu tēnití.+
3 ʻOkú ne fakatoka ʻa e pimi ʻo hono ngaahi loki ʻi ʻolungá ʻi he ngaahi vai ʻi he ʻataá,*+ʻOkú ne ʻai ʻa e ngaahi ʻaó ko ʻene saliote,+ʻOkú ne hāʻele ʻi he ngaahi kapakau ʻo e matangí.+
4 ʻOkú ne ʻai ʻene kau ʻāngeló ko e ngaahi laumālie,Ko ʻene kau talafekaú ko ha afi faifakaʻauha.+
5 Kuó ne fokotuʻu ʻa e māmaní ʻi hono makatuʻungá;+ʻE ʻikai ke ueʻi ia mei hono tuʻuʻangá* ʻo taʻengata pea taʻengata.+
6 Naʻá ke ʻufiʻufi ia ʻaki ʻa e ngaahi vai loloto ʻo hangē ko ha kofú.+
Naʻe māʻolunga ʻa e ngaahi vaí ʻi he ngaahi moʻungá.
7 ʻI hoʻo valokí naʻa nau hola;+ʻI he ongo mai hoʻo maná naʻa nau lele ʻi he ilifia
8 —Naʻe ʻalu hake ʻa e ngaahi moʻungá+ pea ʻalu hifo ʻa e ngaahi teleʻá—Ki he feituʻu naʻá ke fokotuʻu moʻonautolú.
9 Naʻá ke fokotuʻu ha kauʻā ke ʻoua naʻa nau fakalaka atu ai,+Ke ʻoua ʻaupito naʻa nau toe ʻufiʻufi ʻa e māmaní.
10 Naʻá ne ʻoatu ha ngaahi matavai ki he ngaahi teleʻá;*ʻOku nau tafe ʻi he vahaʻa ʻo e ngaahi moʻungá.
11 ʻOku nau tokonaki ʻa e vai ki he fanga manu fekai kotoa ʻo e vaó;Ko e fanga ʻasi kaivaó ʻoku fakanonga ai ʻenau fieinuá.
12 ʻOku nofo ʻi ʻolunga ai ʻa e fanga manupuna ʻo e ʻataá;ʻOku nau hiva ʻi he ngaahi vaʻa ʻo e ʻuluʻakau lau maʻuiʻuí.
13 ʻOkú ne fuʻifuʻi ʻa e ngaahi moʻungá mei hono ngaahi loki ʻi ʻolungá.+
ʻI he fua ʻo hoʻo ngaahi ngāué ʻoku fiemālie ai ʻa e māmaní.+
14 ʻOkú ne ʻai ke tupu ʻa e musié maʻá e fanga pulúPea mo e mohukú ke ngāueʻaki ʻe he faʻahinga ʻo e tangatá,+Ke tupu ha meʻakai mei he kelekelé
15 Mo e uaine ʻa ia ʻokú ne ʻai ke fiefia ʻa e loto ʻo e tangatá,+Mo e lolo ʻa ia ʻokú ne ʻai ke ngingila ʻa e matá,Mo e mā ʻa ia ʻokú ne ʻai ke mālohi ʻa e loto ʻo e tangata ko e meʻa noa peé.+
16 ʻOku fiemālie ʻa e ʻuluʻakau ʻa Sihová ʻi he lahi ʻo e vaí,ʻA e ʻulu sita ʻo Lepanoni ʻa ia naʻá ne toó,
17 ʻA ia ʻoku ngaohi ai ʻe he fanga manupuná ʻa honau punungá.
Ko e nofoʻanga ʻo e sitoaké+ ʻoku ʻi he ʻulu siunipá.
18 Ko e ngaahi moʻunga māʻolungá ʻoku maʻá e fanga kosi nofo moʻungá;+Ko e ngaahi makatuʻú ko ha hūfangaʻanga ia ki he fanga safaná.*+
19 Kuó ne ngaohi ʻa e māhiná ke ne fakaʻilongaʻi ʻa e ngaahi taimi kotofá;ʻOku ʻiloʻi lelei ʻe he laʻaá ʻa e taimi ke ne tō aí.+
20 ʻOkú ke ʻomi ʻa e fakapoʻulí, pea ʻoku poʻuli,+ʻA e taimi ʻoku ʻalu fano holo ai ʻa e fanga manu kaivao kotoa ʻo e vaotaá.
21 Ko e fanga laione muí ʻoku nau ngungulu ʻi heʻenau kumi kaí+Pea kumi ʻenau meʻakaí mei he ʻOtuá.+
22 ʻI he hopo ʻa e laʻaá,ʻOku nau mavahe ʻo tākoto ʻi honau ngaahi ʻaná.
23 ʻOku ʻalu ʻa e tangatá ki heʻene ngāué,Pea ʻokú ne ngāue mālohi ʻo aʻu ki he efiafí.
24 He lahi moʻoni ē ko hoʻo ngaahi ngāué, ʻe Sihova!+
Kuó ke ngaohi kotoa kinautolu ʻi ho potó.+
ʻOku fonu ʻa e māmaní ʻi he meʻa kuó ke ngaohí.
25 Ko ena ʻa e tahí, ʻoku mātuʻaki lahi mo fālahi,ʻOku ngaeve ʻi he ngaahi meʻamoʻui taʻefaʻalaua, fakatouʻosi ʻi he iiki mo e lalahi.+
26 ʻOku folau ai ʻa e ngaahi vaká,Mo Levaiatani,*+ ʻa ia naʻá ke ngaohi ke vaʻinga holo aí.
27 Ko kinautolu kotoa ʻoku nau tatali atu kiate koeKe ʻoange ʻa ʻenau meʻakaí ʻi hono taimi totonu.+
28 Ko e meʻa ʻokú ke ʻoange kiate kinautolú, ʻoku nau tānaki.+
ʻI hoʻo folahi ho nimá, ʻoku nau fiemālie ai ʻi he ngaahi meʻa lelei.+
29 ʻI hoʻo fufū ho fofongá, ʻoku nau hohaʻa.
Kapau te ke toʻo ʻenau mānavá,* ʻoku nau mate pea foki ki he efú.+
30 Kapau te ke fekauʻi atu ho laumālié, ʻoku fakatupu ai kinautolu,+Pea ʻokú ke fakafoʻou ʻa e funga kelekelé.
31 Ko e lāngilangi ʻo Sihová ʻe tolonga ʻo taʻengata.
ʻE fiefia ʻa Sihova ʻi heʻene ngaahi ngāué.+
32 ʻOkú ne hanga ki he māmaní, pea ʻoku tetetete;ʻOkú ne ala ki he ngaahi moʻungá, pea ʻoku nau kohutuʻu.+
33 Te u hiva kia Sihova+ ʻi he kotoa ʻo ʻeku moʻuí;Te u hiva fakahīkihiki* ki hoku ʻOtuá ʻi he lolotonga ʻeku kei moʻuí.+
34 Tuku ke fakahōifua kiate ia ʻa ʻeku ngaahi fakakaukaú.*
Te u fiefia ʻia Sihova.
35 ʻE mole atu ʻa e kau angahalá mei he māmaní,Pea ʻe ʻikai ke kei ʻi ai ʻa e fulikivanú.+
Tuku ke u fakahīkihikiʻi ʻa Sihova. Mou fakahīkihikiʻi ʻa Iā!*
Fakamatala ‘i Lalo
^ Pe “ngeia.”
^ Fakafoʻilea, “ʻi he ngaahi vaí.”
^ Pe “ʻe ʻikai ke sēlue.”
^ Sio ki he Lea mo Hono ʻUhinga.
^ Ko ha manu hangē ha lāpisí ʻoku nofo ʻi he ngaahi feituʻu makamaká.
^ Sio ki he Lea mo Hono ʻUhinga.
^ Pe “honau laumālié.”
^ Pe “tā fasi.”
^ Pe ngalingali, “Tuku ke fakahōifua ʻa ʻeku fakalaulauloto kiate iá.”
^ Pe “Haleluia!” Ko e “Iā” ko ha faʻunga fakanounou ia ʻo e huafa Sihová.
