પ્રેરિતોનાં કાર્યો ૭:૧-૬૦

ચાલુ કરો

યહૂદી ન્યાયસભા આગળ સ્તેફનનું પ્રવચન (૧-૫૩)
- કુળપિતાઓનો સમયગાળો (૨-૧૬)
- મૂસાની આગેવાની; મૂર્તિપૂજા કરતા ઇઝરાયેલીઓ (૧૭-૪૩)
- ઈશ્વર હાથે બનાવેલાં મંદિરોમાં રહેતા નથી (૪૪-૫૦)
સ્તેફનને પથ્થરે મારી નાખવામાં આવે છે (૫૪-૬૦)

૭ પછી પ્રમુખ યાજકે પૂછ્યું: “શું આ વાતો સાચી છે?” ^૨ સ્તેફને જવાબ આપ્યો: “ભાઈઓ અને પિતા સમાન વડીલો, સાંભળો. આપણા પૂર્વજ ઇબ્રાહિમ હારાનમાં+ રહેવા ગયા, એ અગાઉ તે મેસોપોટેમિયામાં રહેતા હતા. ત્યાં મહિમાવંત ઈશ્વરે તેમને દર્શન આપ્યું ^૩ અને કહ્યું: ‘તારો દેશ અને તારાં સગાં-વહાલાંને છોડીને એ દેશમાં જા, જે હું તને બતાવીશ.’+ ^૪ પછી તે ખાલદીઓના* દેશથી નીકળ્યા અને હારાનમાં જઈને વસ્યા. ત્યાં તેમના પિતાના મરણ બાદ+ ઈશ્વરે તેમને આ દેશમાં વસાવ્યા, જ્યાં તમે હાલમાં રહો છો.+ ^૫ પણ ઈશ્વરે તેમને એમાં કોઈ વારસો આપ્યો નહિ. અરે, પગ મૂકવા જેટલી જગ્યા પણ આપી નહિ. પણ ઈશ્વરે તેમને વચન આપ્યું કે આ દેશ તેમને અને તેમના વંશજને વારસા તરીકે આપશે.+ એ સમયે તો તેમને કોઈ બાળક ન હતું. ^૬ ઈશ્વરે તેમને જણાવ્યું કે તેમના વંશજ બીજા દેશમાં પરદેશીઓ તરીકે રહેશે. ત્યાંના લોકો તેઓને ગુલામ બનાવશે અને ૪૦૦ વર્ષ સુધી તેઓ પર જુલમ કરશે.*+ ^૭ પછી ઈશ્વરે કહ્યું: ‘તેઓ જે દેશની ગુલામી કરશે, એને હું સજા કરીશ+ અને ત્યાર પછી તેઓ એ દેશમાંથી નીકળી આવશે અને આ જગ્યાએ મારી પવિત્ર સેવા કરશે.’+ ^૮ “તેમણે ઇબ્રાહિમ સાથે સુન્‍નતનો* કરાર કર્યો.+ તે ઇસહાકના પિતા બન્યા+ અને તેમણે આઠમા દિવસે ઇસહાકની સુન્‍નત કરી.+ ઇસહાક યાકૂબના પિતા બન્યા* અને યાકૂબ ૧૨ દીકરાઓના પિતા બન્યા, જેઓ કુળપિતાઓ* બન્યા. ^૯ તેઓ પોતાના ભાઈ યૂસફની અદેખાઈ કરવા લાગ્યા+ અને તેઓએ તેમને ઇજિપ્તમાં વેચી દીધા.+ પણ ઈશ્વર યૂસફની સાથે હતા.+ ^૧૦ ઈશ્વરે બધી મુશ્કેલીઓમાંથી તેમને છોડાવ્યા અને તે ઇજિપ્તના રાજા ફારુનની* નજરમાં કૃપા મેળવે અને બુદ્ધિશાળી સાબિત થાય, એવું થવા દીધું. રાજાએ તેમને ઇજિપ્ત અને પોતાના આખા ઘર પર અધિકારી નીમ્યા.+ ^૧૧ પછી આખા ઇજિપ્ત અને કનાનમાં દુકાળ પડ્યો. આપણા બાપદાદાઓ પર મોટી મુસીબત આવી પડી અને તેઓ પાસે કંઈ ખાવાનું ન હતું.+ ^૧૨ પણ યાકૂબે સાંભળ્યું કે ઇજિપ્તમાં અનાજનો પુરવઠો છે. એટલે તેમણે પોતાના દીકરાઓને, એટલે કે આપણા બાપદાદાઓને પહેલી વાર ત્યાં મોકલ્યા.+ ^૧૩ તેઓ બીજી વાર ગયા ત્યારે, યૂસફે પોતાના ભાઈઓને પોતાની ઓળખ આપી અને ઇજિપ્તના રાજાને યૂસફના કુટુંબ વિશે ખબર પડી.+ ^૧૪ એટલે યૂસફે સંદેશો મોકલાવ્યો અને કનાનથી પોતાના પિતા યાકૂબ અને બધાં સગાંને બોલાવી લીધાં.+ તેઓ કુલ મળીને ૭૫ લોકો હતા.+ ^૧૫ યાકૂબ ઇજિપ્ત ગયા+ અને ત્યાં તે અને આપણા બાપદાદાઓ ગુજરી ગયા.+ ^૧૬ તેઓને શખેમ લઈ જવામાં આવ્યા. શખેમમાં ઇબ્રાહિમે ચાંદીના સિક્કા આપીને હમોરના દીકરાઓ પાસેથી જે કબર ખરીદી હતી, ત્યાં તેઓને દફનાવવામાં આવ્યા.+ ^૧૭ “ઈશ્વરે ઇબ્રાહિમને આપેલું વચન પૂરું થવાનો સમય નજીક આવતો ગયો તેમ, ઇજિપ્તમાં આપણા લોકો વધતા ગયા અને તેઓની સંખ્યા ઘણી થઈ. ^૧૮ સમય જતાં, ઇજિપ્તમાં બીજો એક રાજા ઊભો થયો. તે યૂસફને ઓળખતો ન હતો.+ ^૧૯ એ રાજા આપણી પ્રજા સાથે કપટથી વર્ત્યો. તે આપણા બાપદાદાઓ સાથે ક્રૂરતાથી વર્ત્યો અને તેઓને મજબૂર કર્યા કે તેઓ પોતાનાં નવજાત બાળકોને મરવા માટે છોડી દે.+ ^૨૦ એ સમયે મૂસાનો જન્મ થયો અને તે ઘણા સુંદર* હતા. ત્રણ મહિના સુધી મૂસાનો ઉછેર તેમના પિતાના ઘરમાં થયો.+ ^૨૧ પણ તેમને ત્યજી દેવામાં આવ્યા+ ત્યારે, ઇજિપ્તના રાજાની દીકરીએ તેમને અપનાવી લીધા અને પોતાના દીકરાની જેમ તેમનો ઉછેર કર્યો.+ ^૨૨ મૂસાને ઇજિપ્તનું સર્વ શિક્ષણ આપવામાં આવ્યું. હકીકતમાં, તે બોલવામાં ચપળ હતા અને મોટાં મોટાં કામ કરતા હતા.+ ^૨૩ “તે ૪૦ વર્ષના થયા ત્યારે, તેમના દિલમાં થયું* કે તે પોતાના ભાઈઓ, એટલે કે ઇઝરાયેલીઓને મળવા જાય.*+ ^૨૪ જ્યારે તેમણે જોયું કે ઇજિપ્તનો માણસ એક ઇઝરાયેલી પર જુલમ કરી રહ્યો છે, ત્યારે તેમણે પોતાના ભાઈને બચાવ્યો અને બદલો લેવા ઇજિપ્તના પેલા માણસને મારી નાખ્યો. ^૨૫ મૂસાને લાગ્યું કે તેમના ભાઈઓ સમજી જશે કે તેમના હાથે ઈશ્વર તેઓને આઝાદી અપાવી રહ્યા છે, પણ તેઓ એ સમજ્યા નહિ. ^૨૬ બીજા દિવસે બે ઇઝરાયેલીઓ લડતા હતા, એવામાં મૂસા આવ્યા અને તેઓ વચ્ચે સુલેહ કરાવવાનો પ્રયત્ન કર્યો. તેમણે કહ્યું: ‘તમે ભાઈઓ છો. તમે શા માટે એકબીજા સાથે લડો છો?’ ^૨૭ પણ જે માણસ પોતાના સાથી જોડે લડતો હતો, તેણે મૂસાને ધક્કો મારીને કહ્યું: ‘તને કોણે અમારા પર અધિકારી અને ન્યાયાધીશ બનાવ્યો છે? ^૨૮ ગઈ કાલે તેં ઇજિપ્તના પેલા માણસને મારી નાખ્યો તેમ, શું તું મને પણ મારી નાખવા માંગે છે?’ ^૨૯ એ સાંભળીને મૂસા ઇજિપ્તથી નાસી ગયા અને મિદ્યાન દેશમાં પરદેશી તરીકે રહ્યા, જ્યાં તે બે દીકરાઓના પિતા બન્યા.+ ^૩૦ “અને ૪૦ વર્ષ પસાર થયાં. પછી સિનાઈ પર્વતના વેરાન પ્રદેશમાં બળતા ઝાડવાની જ્વાળાઓમાં મૂસા આગળ એક દૂત પ્રગટ થયો.+ ^૩૧ મૂસાને એ દૃશ્ય જોઈને નવાઈ લાગી. પણ એ ઝાડવાને જોવા તે નજીક જતા હતા ત્યારે, તેમને યહોવાનો* અવાજ સંભળાયો: ^૩૨ ‘હું તારા બાપદાદાઓનો ઈશ્વર છું. હું ઇબ્રાહિમનો ઈશ્વર, ઇસહાકનો ઈશ્વર અને યાકૂબનો ઈશ્વર છું.’+ મૂસા ધ્રૂજવા લાગ્યા અને તેમણે વધારે આગળ જઈને જોવાની હિંમત ન કરી. ^૩૩ યહોવાએ* તેમને કહ્યું: ‘તારાં ચંપલ કાઢ, કેમ કે તું ઊભો છે એ જગ્યા પવિત્ર છે. ^૩૪ ઇજિપ્તમાં રહેતા મારા લોકો પર થતો અત્યાચાર મેં જોયો છે. મેં તેઓના નિસાસા સાંભળ્યા છે+ અને હું તેઓને છોડાવવા નીચે ઊતર્યો છું. હું તને ઇજિપ્ત મોકલીશ.’ ^૩૫ આ એ જ મૂસા હતા, જેમનો તેઓએ આમ કહીને નકાર કર્યો હતો: ‘તને કોણે અમારા પર અધિકારી અને ન્યાયાધીશ બનાવ્યો છે?’+ ઈશ્વરે ઝાડવામાં દર્શન આપનાર દૂત દ્વારા તેમને જ અધિકારી અને છોડાવનાર તરીકે મોકલ્યા.+ ^૩૬ એ જ મૂસાએ ઇજિપ્તમાં અને લાલ સમુદ્ર+ આગળ ચમત્કારો અને અદ્‍ભુત કામો કર્યાં+ અને તેઓને ઇજિપ્તમાંથી બહાર દોરી લાવ્યા.+ તેમણે વેરાન પ્રદેશમાં પણ ૪૦ વર્ષ+ દરમિયાન એવાં જ અદ્‍ભુત કામો કર્યાં. ^૩૭ “આ એ જ મૂસા હતા, જેમણે ઇઝરાયેલીઓને કહ્યું હતું: ‘ઈશ્વર તમારા ભાઈઓમાંથી મારા જેવો એક પ્રબોધક ઊભો કરશે.’+ ^૩૮ એ જ મૂસા વેરાન પ્રદેશમાં ઇઝરાયેલીઓ વચ્ચે હતા અને એ દૂત સાથે હતા,+ જેણે સિનાઈ પર્વત પર તેમની સાથે વાત કરી હતી.+ એ જ મૂસાએ આપણા બાપદાદાઓ સાથે વાત કરી હતી અને આપણને આપવા માટે પવિત્ર અને સદા ટકનારાં વચનો મેળવ્યાં હતાં.+ ^૩૯ આપણા બાપદાદાઓએ તેમની વાત માની નહિ અને તેમને ગણકાર્યા નહિ.+ તેઓ પોતાનાં દિલમાં ઇજિપ્ત પાછા જવાનાં સપનાં જોવા લાગ્યા.+ ^૪૦ તેઓએ હારુનને કહ્યું: ‘અમારા માટે દેવો બનાવ, જે અમને દોરે. કેમ કે અમને ઇજિપ્તમાંથી બહાર કાઢી લાવનાર મૂસાનું શું થયું છે, એ અમે જાણતા નથી.’+ ^૪૧ એટલે એ દિવસોમાં તેઓએ વાછરડાની એક મૂર્તિ બનાવી અને એની આગળ બલિદાન ચઢાવ્યું. તેઓ પોતાના હાથે બનાવેલી મૂર્તિને લીધે મોજમજા કરવા લાગ્યા.+ ^૪૨ તેથી ઈશ્વરે તેઓથી મોં ફેરવી લીધું અને તેઓને સૂર્ય, ચંદ્ર અને તારાઓની ભક્તિ કરવા છોડી દીધા.+ એ વિશે પ્રબોધકોના પુસ્તકમાં લખેલું છે: ‘હે ઇઝરાયેલના લોકો, ૪૦ વર્ષ દરમિયાન વેરાન પ્રદેશમાં શું તમે મારા માટે અર્પણો અને બલિદાનો ચઢાવ્યાં હતાં? ^૪૩ તમે તો મોલોખનો* મંડપ+ અને રમ્ફા દેવના* તારાની મૂર્તિઓ લઈને ફરતા હતા, જે તમે તેઓની ભક્તિ કરવા બનાવી હતી. એટલે હું તમને બાબેલોનને પેલે પાર ગુલામીમાં મોકલી દઈશ.’+ ^૪૪ “વેરાન પ્રદેશમાં આપણા બાપદાદાઓ પાસે સાક્ષીનો મંડપ* હતો. એ વિશે ઈશ્વરે મૂસાને આજ્ઞા આપી હતી કે તેમને બતાવેલા નમૂના પ્રમાણે મંડપ બનાવે.+ ^૪૫ પછી આપણા બાપદાદાઓના દીકરાઓને એ મંડપ વારસામાં મળ્યો. એ મંડપ લઈને તેઓ યહોશુઆ સાથે બીજી પ્રજાઓના દેશમાં ગયા.+ એ પ્રજાઓને ઈશ્વરે આપણા બાપદાદાઓ આગળથી હાંકી કાઢી હતી.+ દાઉદના દિવસો સુધી એ મંડપ અહીં જ હતો. ^૪૬ દાઉદે ઈશ્વરની નજરમાં કૃપા મેળવી અને યાકૂબના ઈશ્વર માટે મંદિર* બાંધવાનો લહાવો મળે એ માટે અરજ કરી.+ ^૪૭ પણ એ તો સુલેમાન હતા, જેમણે ઈશ્વર માટે મંદિર બાંધ્યું.+ ^૪૮ જોકે, સર્વોચ્ચ ઈશ્વર હાથે બનાવેલાં મંદિરોમાં રહેતા નથી,+ જેમ એક પ્રબોધકે કહ્યું હતું: ^૪૯ ‘યહોવા* કહે છે, આકાશ મારી રાજગાદી છે,+ પૃથ્વી મારા પગનું આસન છે.+ તમે મારા માટે કેવું મંદિર બાંધશો? મારી રહેવાની જગ્યા ક્યાં રાખશો? ^૫૦ શું એ બધું મારા હાથની રચના નથી?’+ ^૫૧ “ઓ હઠીલા માણસો, તમે તમારાં હૃદય અને કાન બંધ કરી દીધાં છે.* તમે હંમેશાં પવિત્ર શક્તિનો વિરોધ કરો છો. તમારા બાપદાદાઓએ કર્યું, એવું જ તમે કરો છો.+ ^૫૨ એવો કયો પ્રબોધક છે, જેની સતાવણી તમારા બાપદાદાઓએ કરી નથી?+ હા, નેક માણસના આવવા વિશે જેઓએ અગાઉથી જણાવ્યું, તેઓને તમારા બાપદાદાઓએ મારી નાખ્યા+ અને હવે તમે પણ એ નેક માણસને દગો કર્યો અને મારી નાખ્યા.+ ^૫૩ તમને દૂતો દ્વારા નિયમશાસ્ત્ર આપવામાં આવ્યું હતું,+ પણ તમે એ પ્રમાણે ચાલ્યા નહિ.” ^૫૪ આ વાતો સાંભળીને તેઓ મનમાં ને મનમાં ગુસ્સાથી સળગી ઊઠ્યા અને સ્તેફનની સામે દાંત કચકચાવવા લાગ્યા. ^૫૫ પણ તે પવિત્ર શક્તિથી ભરપૂર થઈને આકાશ તરફ એકીટસે જોવા લાગ્યો. તેણે ઈશ્વરનો મહિમા જોયો અને તેમના જમણા હાથે ઈસુને ઊભા રહેલા જોયા.+ ^૫૬ તેણે કહ્યું: “જુઓ! હું આકાશને* ખુલ્લું થયેલું જોઉં છું અને માણસના દીકરાને*+ ઈશ્વરના જમણા હાથે ઊભા રહેલા જોઉં છું.”+ ^૫૭ એ સાંભળીને તેઓએ મોટા અવાજે બૂમો પાડી અને પોતાના કાન પર હાથ મૂકી દીધા અને બધા તેના પર ધસી આવ્યા. ^૫૮ તેઓ તેને શહેરની બહાર લઈ ગયા અને પથ્થરે મારવા લાગ્યા.+ જૂઠા સાક્ષીઓએ+ પોતાના ઝભ્ભા શાઉલ નામના યુવાનના પગ આગળ મૂક્યા હતા.+ ^૫૯ તેઓ સ્તેફનને પથ્થરે મારતા હતા ત્યારે, તેણે અરજ કરી: “મારા માલિક ઈસુ, હું મારું જીવન* તમને સોંપું છું.” ^૬૦ પછી ઘૂંટણિયે પડીને તે મોટા અવાજે પોકારી ઊઠ્યો: “યહોવા,* આ પાપનો દોષ તેઓના માથે નાખશો નહિ.”+ આમ કહીને તે મરણની ઊંઘમાં સૂઈ ગયો.