U KAʼAPʼÉEL KʼÁATCHIʼ
¿Baʼax jeʼel u yáantkech a kʼaj óolt Dioseʼ?
«Le baʼax ku yaʼalik u libroil le Leyoʼ maʼ unaj u lukʼul ta chiʼiʼ, bul kʼiin yéetel bul áakʼab unaj a xokik yéetel unaj a tuukul tiʼ baʼax ku yaʼalik, tumen leloʼ yaan u yáantkech a beet tuláakal baʼax tsʼíibtaʼaniʼ. Beyoʼ yaan u bintech utsil ichil a kuxtal yéetel yaan u yantal a naʼat, le naʼat túunoʼ yaan u nuʼuktikech tiʼ tuláakal baʼax ken a beete».
«Letiʼobeʼ seguernaj u kʼaʼam xokikoʼob u libroil u Ley u jaajil Diosoʼ, jach maʼalob kaʼach xan u tsolkoʼob yéetel u yaʼalikoʼob baʼax u kʼáat u yaʼale. Letiʼobeʼ tu yáantoʼob le kaaj utiaʼal u naʼatik le baʼax táan u xoʼokloʼ».
«Kiʼimak u yóol le máax maʼatech u bin teʼ bej ku yaʼalaʼaltiʼ tumen le kʼasaʼan máakoʼoboʼ [...]. Baʼaxeʼ jach u yaabiltmaj u ley Jéeoba, bul kʼiin yéetel bul áakʼab ku xokik le leyoʼ yéetel ku tuukul tiʼ baʼax ku yaʼalik. [...] Tuláakal baʼax ken u beet ichil u kuxtaleʼ maʼalob kun jóokʼol».
«Felipe túuneʼ áalkabnaj tu tséel le carretaoʼ ka tu yuʼubeʼ le máakoʼ táan u kʼaʼam xokik u tsʼíib profeta Isaías, ka tu kʼáatajtiʼ: ‹¿Jach wa tu jaajil ka naʼatik le baʼax ka xokikoʼ?›. Le máakoʼ tu núukaj: ‹¿Bix túun jeʼel in naʼatik wa minaʼan máax tsolikteneʼ?›».
«Le u jatsʼuts modos Dios maʼ tu páajtal u yilaʼaloʼ chíikaʼan u yilaʼal desde ka beetaʼab yóokʼol kaab, tumen yoʼolal le baʼaxoʼob u beetmoʼ jeʼel u páajtal u tsʼaʼabal cuentaeʼ le páajtalil yaantiʼoʼ minaʼan u xuul, tsʼoʼoleʼ le baʼaloʼobaʼ ku yeʼeskoʼob letiʼ u jaajil Dios; le oʼolal maʼ tu páajtal u yaʼalaʼal wa maʼ jaajtakoʼobiʼ».
«Chʼik a tuukul tiʼ le baʼaloʼobaʼ, jach tsʼáa a wóol a beetoʼob utiaʼal ka jach ilaʼak tumen tuláakal máak bix a bin táanil».
«Koʼoneʼex ilik bix jeʼel k-paklan áantikbaʼex utiaʼal ka yanak yaabilaj ichiloʼoneʼex bey xan utiaʼal ka k-beeteʼex baʼaloʼob maʼalobtakeʼ. Tsʼoʼoleʼ maʼ unaj u xuʼulul k-muchʼikbaʼex[iʼ]».
«Le oʼolaleʼ wa yaan tiʼ teʼex ku bineltik naʼat tiʼeʼ seguernak u kʼáatik tiʼ Dios, bey túunoʼ yaan u tsʼaʼabaltiʼ, tumen Dioseʼ uts tu tʼaan u síik baʼaloʼob tiʼ tuláakal máak yéetel maʼatech u chʼinik tu yich máak».
