Le Bibliaoʼ letiʼe baʼax u tsʼaamaj Dios utiaʼal u tʼankoʼonoʼ. Utiaʼal k-kʼaj óoltik Dioseʼ kʼaʼabéet k-xokik (Juan 17:3; 2 Timoteo 3:16). Le Bibliaoʼ ku yeʼesik baʼax u tukultmaj Dios utiaʼal wíinik bey xan utiaʼal le Luʼumaʼ (Génesis 3:15; Apocalipsis 21:3, 4).

Minaʼan uláakʼ libro jeʼex le Bibliaoʼ tumen jach ku yáantik máak ichil u kuxtal. Ku beetik k-tuukul tiʼ le jatsʼuts modos yaan tiʼ Jéeobaoʼ, jeʼex tiʼ u yaabilaj yéetel tiʼ bix u chʼaʼik óotsilil. Le Bibliaoʼ ku yáantkoʼon kex jach yaj le baʼax táan k-muʼyajtikoʼ. Ku yeʼesik bix u yilik Dios le baʼax ku beetaʼal teʼ yóokʼol kaabaʼ yéetel baʼax u kʼáat ka k-beete (Salmo 119:105; Hebreos 4:12; 1 Juan 2:15-17).

Le Bibliaoʼ tsʼíibtaʼab ich hebreo, arameo yéetel griego, chéen baʼaleʼ tu chúukaʼanil wa chéen junjaatseʼ tsʼoʼok u traducirtaʼal ich maas tiʼ 3,000 idiomaʼob. Le Bibliaoʼ letiʼe libro traducirtaʼan ich maas yaʼab idiomaʼoboʼ yéetel óoliʼ tiʼ tuláakal máak yaan junpʼéeliʼ. Lelaʼ maʼ jelaʼaniʼ tumen Dioseʼ u kʼáat ka ojéeltaʼak tumen tuláakal máak baʼax ken u beet u Reino. Le oʼolal tu beetaj u tsʼíibtaʼal teʼ Bibliaoʼ: «Le baʼaloʼob maʼalobtak ken u beet le Reinooʼ yaan u tsikbaltaʼal tiʼ tuláakal yóokʼol kaab utiaʼal ka ojéeltaʼak tumen u kajnáaliloʼob tuláakal kaajoʼob, le kéen tsʼoʼokkeʼ ku taal u xuul» (Mateo 24:14).

Toʼoneʼ k-ojel jach kʼaʼanaʼan le baʼax ku yaʼalik le Bibliaoʼ, le oʼolaleʼ jach t-ilaj maʼ k-kʼexik le baʼax u kʼáat u yaʼal le úuchben tsʼíiboʼoboʼ. T-ilaj xan maʼ u pʼáatal istikyaj u xoʼokol yéetel t-ilaj ka naʼataʼak baʼax ku yaʼalik. Le jaatsoʼob ku kʼaabaʼtik «Le baʼaxoʼob chʼaʼab en cuenta utiaʼal u traducirtaʼal le Bibliaaʼ», «Bix traducirtaʼanil le Bibliaaʼ», yéetel «Bix kʼuchik le Biblia teʼ kʼiinoʼobaʼ» ku tsolkoʼob baʼax chʼaʼab en cuenta utiaʼal u beetaʼal le Bibliaaʼ yéetel baʼaxoʼob ku taasik.

Le máaxoʼob jach u yaabiltmoʼob Dios yéetel u kʼáat u beetoʼob baʼax ku yaʼalikeʼ u kʼáatoʼob junpʼéel Biblia séeb u naʼataʼal yéetel maʼ kʼexaʼan baʼax ku yaʼalikiʼ (1 Timoteo 2:4). Le oʼolal tsʼoʼok k-jóoʼsik le Biblia ich maayaoʼ. Toʼoneʼ baʼax k-kʼáateʼ ka yanak le Biblia ichil tuláakal le idiomaʼob ku páajtaloʼ. K-kʼáat óoltik tiʼ Dios ka utschajak ta wich le Bibliaaʼ yéetel ka u yáantech a kʼaj óolt Dios, «tumen le máax ku tsʼáaik u yóol u kaxteʼ yaan u kʼuchul tu yiknal» (Hechos 17:27).