INtshumayeli 7:1-29
7 Igama elihle* libhetele kuneoli yodidi,+ yaye umhla wokufa ubhetele kunomhla wokuzalwa.
2 Kubhetele ukuya endlini yokuzila kunokuya endlini yetheko,+ kuba sisiphelo sabo bonke abantu eso, yaye abaphilayo bamele bayikhumbule loo nto.
3 Kubhetele ukukhathazeka kunokuhleka,+ kuba ubuso obulusizi buyenza ixole intliziyo.+
4 Intliziyo yezilumko isendlini yabazilileyo, kodwa intliziyo yezidenge isendlini yobumnandi.*+
5 Kubhetele ukumamela ukukhalinyelwa ngumntu osisilumko+ kunokumamela ingoma yezidenge.
6 Kuba njengokunqanqaza komlilo wameva phantsi kwembiza, kunjalo kanye ukuhleka kwesidenge;+ naleyo into ililize.
7 Ingcinezelo ingasiphambanisa isilumko, yaye ukunyotywa kuyayonakalisa intliziyo.+
8 Kubhetele ukuphela kwento kunokuqalwa kwayo. Kubhetele ukuba nomonde kunokuba nekratshi.+
9 Sukukhawuleza* ukucaphuka,+ kuba ukucaphuka kuhlala esifubeni sezidenge.*+
10 Sukuthi, “Kutheni le nto imihla yakudala ibhetele kunale?” kuba ayibobulumko ukubuza loo nto.+
11 Yinto entle ubulumko xa budibene nelifa yaye buyabanceda abo babona ukukhanya kwemini.*
12 Kuba ubulumko buyakhusela+ njengokuba nemali ikhusela;+ kodwa nantsi into olunceda ngayo ulwazi: Ubulumko bumgcina ephila lowo unabo.+
13 Khawucinge ngomsebenzi kaThixo wokwenene, kuba ngubani onokukwazi ukuyolula into ayenze yagoso?+
14 Xa usuku lukuhambela kakuhle, cinga ngobo buhle,+ kodwa xa usuku lulubi,* khumbula ukuba uThixo uzenze zombini ezo zinto,+ ukuze abantu bangaqiniseki ncam ngento* eza kwenzeka kubo kwixesha elizayo.+
15 Akukho nto ndingayibonanga kobu bomi bam bulilize,+ ukususela kwilungisa elifela kobo bulungisa balo+ ukuya kumenzi-bubi ophila ixesha elide nangona esenza izinto ezimbi.+
16 Ungabi lilungisa kakhulu,+ yaye ungazibonakalisi usisilumko ngokugqithiseleyo.+ Kutheni umele uzonakalise?+
17 Ungenzi izinto ezimbi ngokugqithiseleyo, yaye ungabi sisidenge.+ Kutheni umele ufe ngaphambi kwexesha?+
18 Eyona nto ibhetele kukuzimamela zozibini ezi zilumkiso,+ kuba umntu owoyika uThixo uzimamela zozibini.
19 Ubulumko buyenza ibe namandla indoda enabo, ngaphezu kwamadoda alishumi anamandla esixekweni.+
20 Kuba akukho mntu ulilungisa emhlabeni ohlala esenza okulungileyo angaze one.+
21 Kwakhona, sukuyihoya yonke into ethethwa ngabantu;+ kuba uza kusuke uve isicaka sakho sikuqalekisa;*
22 kuba wazi kakuhle entliziyweni yakho ukuba nawe ubaqalekise kaninzi abanye.+
23 Yonke le nto ndiyivavanye ngobulumko, ndaza ndathi: “Ndiza kuba nobulumko.” Kodwa buye bakude kum.
24 Izinto ezenzekileyo zikude yaye zinzulu gqitha. Ngubani na onokuziqonda?+
25 Ndazimisela entliziyweni yam ukwazi, ukukhangela nokufuna ubulumko nesizathu sezinto, nokuze ndibuqonde ububi obenziwa zizidenge nobudenge obenziwa ngabaphambeneyo.+
26 Emva koko, ndafumanisa le nto: Eyona nto ikrakra ngaphezu kokufa ngumfazi ofana nomnatha wokuzingela, onentliziyo efana nomnatha orhuqwayo nonezandla ezinjengamatsheyini. Umntu okholisa uThixo wokwenene uza kumbaleka,+ kodwa umoni uyathinjwa nguye.+
27 “Jonga, nantsi into endiyifumanisileyo,” utsho umhlanganisi.+ “Ndiye ndahlola zonke izinto ukuze ndifikelele kwisigqibo sam,
28 kodwa into ebendisoloko ndiyikhangela, andiyifumananga. Ndifumene indoda* yanye kwabaliwaka, kodwa andimfumananga umfazi phakathi kwabo bonke.
29 Yile kuphela into endiyifumanisileyo: UThixo wokwenene wabenza balunga abantu,+ kodwa bona baye bazifunela amacebo amaninzi.”+
Umbhalo osemazantsi
^ Okanye “Ukuduma kakuhle.” Ngokoqobo, “Igama.”
^ Okanye “yokonwaba.”
^ Okanye kusenokwenzeka, “luphawu lwesidenge.”
^ Ngokoqobo, “Sukukhawuleza emoyeni wakho.”
^ Oko kukuthi, abo baphilayo.
^ Okanye “bangayifumanisi into.”
^ Okanye “ngosuku lwentlekele.”
^ Ngokoqobo, “sikuthuka.”
^ Okanye “indoda elungileyo.”
