•   O ai o ou mātua e ono faigofie ona lua feeseeseaʻi?

  •  Tamā

  •  Tinā

•   O le ā le tele e te lua feeseeseaʻi ai?

  •  Seāseā

  •  Nisi taimi

  •  Taimi uma

•   O le ā le leaga e oo i ai lua feeseeseaʻiga?

  •  E vave ona foʻia ma le filemu.

  •  E foʻia ae seʻiloga ua uma taugāupu.

  •  E lē foʻia e tusa lava pe ua uma taugāupu.

 Pe afai e foliga mai e lē mafai lava ona lelei le tou va ma ou mātua, atonu o le a e mafaufau ai e tatau ona la faia se gaoioiga e faaleleia ai le faafitauli. Peitaʻi, e iai mea e mafai ona e faia ina ia faaitiitia ai ma tuuitiitia ai le leaga e oo i ai feeseeseaʻiga. Muamua, ia iloilo . . .

•   Auala e mafaufau ai. A o e tuputupu aʻe, e amata ona e mafaufau loloto i mea nai lo o le taimi a o e laʻitiiti. E amata foʻi ona e maumauaʻi i ou lava manatu, ma atonu i nisi taimi e lē tutusa ai ma manatu a ou mātua. E ui i lea, ua faapea mai le Tusi Paia: “Ia e āva i lou tamā ma lou tinā.”​—Esoto 20:12.

   Mea moni: E manaʻomia le faatagata matua o le mafaufau ma le tomai, ina ia ʻalofia ai le feeseeseaʻi e tusa lava pe e lē tutusa manatu.

•   Le uiga o le fia tutoʻatasi. A o faasolo ina avea oe ma tagata matua, atonu o le a tele le saʻolotoga e tuu atu e ou mātua iā te oe. Peitaʻi, atonu e te ono manatu e laʻitiiti lenā saʻolotoga, pe ua tuai foʻi le taimi ua mauaina ai. O lenā mea e mafai ona iʻu atu ai i ni feeseeseaʻiga. E ui i lea, ua faapea mai le Tusi Paia: “Ia usiusitaʻi i o outou mātua.”​—Efeso 6:1.

   Mea moni: E masani e faalagolago le tele o le saʻolotoga e tuuina atu e ou mātua iā te oe, i le auala e te faaaogāina ai le saʻolotoga o loo iai nei.

•   Ia fai lau vaega. Nai lo o le tuuaʻia na o ou mātua ona o se feeseeseaʻiga, ia mafaufau po o le ā e mafai ona e faia ina ia tausia ai le filemu. Ua faapea mai se alii talavou e igoa iā Jeffrey, “I nisi taimi e lē o faamatalaga a ou mātua e faateteleina ai se feeseeseaʻiga ae o le auala e te tali atu ai. O le talanoa atu i se auala toʻafilemu o le a fesoasoani lea i le toe faaleleia o se feeseeseaʻiga.”

   Manatu o le Tusi Paia: “Afai e mafai iā te outou, ia nonofo filemu.”​—Roma 12:18.

•   Faalogologo lelei. Ua taʻutino mai Samantha e 17 tausaga, “O le mea pito sili lea ona faigatā iā te aʻu ona fai. Ae ua ou iloa, pe a mātau mai e mātua o loo e faalogologo lelei atu, e telē foʻi le avanoa o le a la faalogo mai ai iā te oe.”

   Manatu o le Tusi Paia: ‘Ia faalogologo lelei, ae aua le vave ona tautala.’​—Iakopo 1:19.

•   Ia autasi i manatu. Ia taulima se feeseeseaʻiga e tai pei o se ʻaukamuta o loo taumafai e fausia se fale. Po o ā faafitauli e tulaʻi mai, ae e lē suia ai le manatu ua latou autasi ai ina ia tu le fale. I se tulaga talitutusa, ia autasi o outou manatu ma ou mātua, o le foʻia lea o le feeseeseaʻiga. Ua faapea mai se alii talavou e igoa iā Adam, “Pe a tulaʻi mai se feeseeseaʻiga, e mananaʻo mātua i mea e latou te manatu e mo le lelei o lo la alo ae e manaʻo le tamaitiiti i le mea e na te manatu e mo lona lava lelei. Pe a mafaufau lelei i ai, o loo latou taumafai uma e ausia le sini e tasi.”

   Manatu o le Tusi Paia: “Tausisi i mea e faatupu ai le filemu.”​—Roma 14:19.

•   Ia magafagafa. Ua faapea mai se talavou e igoa iā Sarah, “E fesoasoani iā te aʻu le manatuaina o loo feagai foʻi mātua ma o latou foʻi faafitauli, ia e taitutusa lava le faigatā ma o matou faafitauli.” Ae ua faapea mai se isi tamaʻitaʻi talavou e igoa iā Carla, “Ou te taumafai e tuu aʻu i le tulaga o oʻu mātua. O ā ni oʻu faalogona pe ana faapea o loo oʻu tausia aʻe se tamaitiiti ma feagai ma le faafitauli lava lea e tasi? O le ā le mea e sili ona lelei mo ia?”

   Manatu o le Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.”​—Filipi 2:4.

•   Ia usiusitaʻi. Po o le ā lava le tulaga, ae o le mea lenā o loo faatonuina oe e le Tusi Paia e fai. (Kolose 3:​20) Afai foʻi e te usitaʻi, o le a sologa lelei mea uma. Ua faapea mai se tamaʻitaʻi talavou e igoa iā Karen, “E faaitiitia popolega i loʻu olaga pe a ou usiusitaʻi i oʻu mātua. Ua tele mea na la faataulaga mo aʻu, o lea, e tatau ai ona ou usiusitaʻi iā i laʻua.” O le usiusitaʻi o se tasi lea o vaifofō sili mo le foʻia o feeseeseaʻiga.

   Manatu o le Tusi Paia: “E mate le afi pe a leai ni fafie.”​—Faataoto 26:20.

 Fesoasoani. Pe afai e faigatā iā te oe le talanoa atu, taumafai e tusi i lalo ou manatu pe lafo foʻi i se feʻau tusitusia. Ua faapea mai se talavou e igoa iā Alyssa: “O le mea lenā ou te faia pe afai e lē o lelei oʻu faalogona e talanoa ai. E fesoasoani iā te aʻu e faailoa atu ai oʻu lagona e aunoa ma le ʻeʻē pe faia foʻi se tala e mulimuli ane oʻu toe salamō ai.”