“Aua e te fia ese! E tatau ona e pei o matou, a leai, e leai ni au uō, maʻimau lou olaga, ma leai sou faamoemoe. O le iʻuga, e leai se isi e iloa oe ma o le a tuua na o oe.”—Carl.

 Pei a ua faatele e Carl le mataupu. A ea? Atonu. Ae o nisi tagata e latou te faia mea uma ina ia ʻalofia ai iʻuga e pei ona faamatalaina e Carl. Ae a oe? O le a fesoasoani lenei mataupu iā te oe e maua ai ni au uō lelei.

•  Aiseā e taumafai ai tagata ia pei o isi?

•  Mea e tatau ona e iloa

•  Tala a isi talavou

•   Ona e latou te lē mananaʻo e ʻalofia i latou e tagata. “Na ou vaai i le Initaneti i ata o tafaoga a aʻu uō ae ou te lē o iai. Na ou mafaufau ai, po o iai se mea o tupu iā te aʻu, ma ua tigā ai oʻu faalogona ona e pei e lē tāua aʻu iā i latou.”—Natalie.

   MEA E MAFAUFAU I AI: Pe na iai se taimi na e manatu ai ua ʻalofia oe e isi? O le ā na e faia ina ia latou taliaina ai oe?

•   Ona e latou te lē mananaʻo e faaesea i latou. “E lē faatagaina aʻu e oʻu mātua e fai saʻu telefoni. Pe a fesili mai isi tamaiti i laʻu numera, ou te fai i ai e leai saʻu telefoni ma latou faapea mai: ‘E a? O le ā lou matua na ua iai?’ Pe a ou tali atu ai ua 13 oʻu tausaga, e na o le vāai ma misi alofa mai.”—Mary.

   MEA E MAFAUFAU I AI: O ā mea e faasā e ou mātua ona e faia, ma e ono manatu ai ua ese oe mai i isi? E faapefea ona e taulimaina lenā faasāsāaga?

•   Ona e latou te lē mananaʻo e taufaifai mai isi: “E lē fiafia tamaiti i le aʻoga iā i latou e ese mea e latou te faia, e ese le auala e tautatala ai, pe e ese foʻi le auala e tapuaʻi ai. Pe a ese oe mai i na tamaiti, ua faigofie la ona avea oe ma taulaʻiga o a latou taufaifaiga.”—Olivia.

   MEA E MAFAUFAU I AI: Pe na iai se taimi na taufaifai ai nisi iā te oe ona e ese mai oe iā i latou? Na faapefea ona e taulimaina lenā tulaga?

•   Ona e lē mananaʻo e tiaʻi i latou e a latou uō. “Na ou taumafai e pei aʻu o tamaiti na matou faifaimea faatasi. Na ou tautala i se auala ou te lē masani ai. Na ou ata i se mea ae lē mālie. E ui na ou iloa lelei e tigā ae na matou ula foʻi ma na tamaiti i se isi tamaitiiti.”—Rachel.

   MEA E MAFAUFAU I AI: Aiseā e tāua ai iā te oe le fiafia o au uō iā te oe? Pe na e suia ou uiga ona o lou taumafai e pei o isi?

•   O le taumafai e pei o isi ina ia fiafia mai ai, e iai ona iʻuga lē lelei. Aiseā? Talu ai e faigofie ona iloa e tagata mea e lē moni. Na taʻua e Brian e 20 ona tausaga, “E leʻi fiafia tamaiti o laʻu vasega ina ua ou taumafai ou te pei o se isi tagata, na ou aʻoaʻoina mai ai, e sili atu le aua le faataʻitaʻi fua i isi, auā e iloagofie e tagata le lē moni o aʻu mea e fai.”

   AUALA LELEI: Ia toe iloilo mea e sili ona tāua iā te oe. O loo faapea mai le Tusi Paia: ‘Ia faamautinoa o mea e sili ona tāua.’ (Filipi 1:10) O lea ia fesili ifo, ‘O le ā le mea e sili ona tāua, po o loʻu faataʻitaʻi i tagata e lē tutusa a matou tapulaa ina ia latou talia ai aʻu, po o le avea pea o aʻu ma tagata moni e iai aʻu?’

   “E leai se aogā e te fia pei ai fua o isi. E atili lē fiafia ai tagata iā te oe, ma e lē avea ai foʻi oe ma tagata lelei.”—James.

•   O le fia pei o isi o le a taofia ai oe mai i le faaali atu o ou uiga moni. E avea ai oe ma “sē e faamalieina manaʻoga o isi,” ma faia mea e mananaʻo ai. Na taʻua e Jeremy e faapea, “Na masani ona ou faia so o se mea lava ina ia talia ai aʻu e isi, e tusa lava pe e aafia ai loʻu talaaga lelei. Na ou faatagaina foʻi isi e pulea mea ou te tautala ai ma aʻu gaoioiga.”

   AUALA LELEI: Ia iloa au tapulaa ma ola ai, nai lo o le pei o oe o se fee e fesuisuiaʻi ona lanu e fua i lona siʻomaga. O lea, e lelei la le māfuaaga ua faapea mai ai le Tusi Paia: “Aua e te faia se mea ona o loo faia e tagata uma.”—Esoto 23:2, Holy Bible—Easy-to-Read Version.

   “Na ou taumafai e fiafia i mea uma e latou te fiafia i ai, o musika, taaloga, lavalava, faafiafiaga ma ituaiga makeup  . . . Na ou taumafai e pei o i latou. Na latou iloa mai e faafoliga aʻu gaoioiga, na iloa uma e tagata e oo foʻi iā te aʻu. Na ou lagona ai le faanoanoa ma le tuua toʻatasi ma ou lē toe iloa ai le tagata moni e iai aʻu. Na ou lē toe iloa mea ou te fiafia i ai. Na ou aʻoaʻoina mai ai, e lē o tagata uma e te feiloaʻi ai e fia faauō pe fiafia foʻi iā te oe. E lē uiga atu lenā mea o le a e lē toe faauō ai i isi; nai lo o lea, ia atiaʻe le onosaʻi ma manatua e tele se taimi e alu ina ia faamasani ai i isi, ma ia atiaʻe oe e avea ma tagata matua.”—Melinda

•   O le fia pei o isi e aafia ai lau amio. Na faamaonia e Chris le moni o lenā manatu i lona tausoga. Na faapea mai Chris, “Na amata ona ia faia mea e lē masani ai ina ia fiafia ai isi iā te ia, e pei o le faaaogāina o fualaau faasāina, lea na iʻu ina pulea ai o ia ma toetoe uma ai lona ola.”

   AUALA LELEI: Ia ʻaloese mai i tagata e leaga auala e tautatala ai, ma leaga a latou tapulaa tauamio. Ua faapea mai le Tusi Paia: “O lē e savali ma tagata atamamai, e atamai ai o ia, a o lē e faifaimea faatasi ma tagata vālea, e leaga ai lava o ia.”—Faataoto 13:20.

   “O nisi taimi e lelei lou faamasani ma taumafai e faauō i isi. Peitaʻi, e lē tatau i na faauōga ona faaleagaina ai tapulaa ua e iloa e saʻo. E taliaina oe e tagata e mafai ona avea ma au uō lelei, ona o le tagata moni e iai oe.”—Melanie.

   Fesoasoani: A o e taumafai e feiloaʻi i tagata fou ma faauō atu i ai, aua e te faauō na o i latou e tutusa mea e tou te fiafia i ai. Ia saʻili tagata e tutusa a outou tapulaa i le itu faaleagaga, itu tauamio, talitonuga ma amioga tatau.