E masani ona faaavanoa atu oe pe a fia talanoa mai sau uō. Ae ua tele a ina e talanoa i se tasi o au uō, a o le faafitauli o ia o se tasi o le isi itupā. E masani ona e faapea ifo, ‘E na o le uō a,’ ma e te manatu e faapena foʻi faalogona o le lenā tagata. Pe e afāina lenā mea iā te oe?

•  Le mea e mafai ona tupu

•  Le māfuaaga e tāua ai

•  Mea e mafai ona e faia

•  Fesoasoani

 E lē leaga le faauō atu i se tasi o le isi itupā. Peitaʻi, ae ā pe afai ua e atiaʻe se faauōga faapitoa ma lenā tagata nai lo o isi? I le tulaga lenā, e ono manatu ai le tagata lenā e iai se isi mea o loo e manaʻo i ai nai lo o le tau ina uō.

 Po o le manatu lenā o loo e manaʻo e momoli atu? Mātau nisi o auala e ono tupu ai lenā mea, ma o nisi taimi e te lē mafaufauina.

•   Ua e soona uaʻi atu i se tasi.

   “E ui e lē mafai ona e puleaina faalogona o se isi, ae e mafai ona faatupuina na lagona pe afai e te faapea atu e na ona lua uō, ae o taimi uma e te vili ai ma talanoa i lenā tagata.”​—Sierra.

•   Ua e tali atu i manaʻoga o se tasi.

   “E lē o aʻu na muamua lafo atu ni feʻau tusitusia, ae ou te tali i taimi uma i feʻau tusitusia a se teine. Mulimuli ane, e leʻi faigofie ona ou fai atu o ia ua na o se uō.”​—Richard.

•   Ua e taumafai e faauaʻi mai isi iā te oe.

   “E manatu nisi o le faatafai o se taaloga. E latou te taaloalo i faalogona o isi ae lē fia uō ai. Ua ou vaai soo o tupu lenā mea ma e masani ona tigā ai faalogona o se tasi.”​—Tamara.

 O le manatu autū: O le uaʻi ma le fesootaʻi i taimi uma, e taʻu atu ai o loo e fia uō i lenā tagata.

•   E tigā ai le isi tagata.

   Manatu o le Tusi Paia: “O le faamoemoe ua tuai ona taunuu e maʻi ai le loto.” (Faataoto 13:12) O le ā e te faatalitalia pe afai e te iloa atu i gaoioiga a se tasi lona fia uō iā te oe?

   “Ua faapea mai se tasi o faaupuga, ‘Ia faataʻataʻa.’ E faasino atu i se iʻa ua mau i le mātau, ae e te lē manaʻo e toso mai pe faamamulu foʻi. E mafai foʻi ona tupu lenā mea i se faigāuō. Afai e te lē o fia uō moni i se tasi ae e te ʻtaaloalo i ona faalogona,’ o le a e faapogaia ai le tele o tigā.”​—Jessica.

•   E faaleagaina ai lou talaaga.

   Manatu o le Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.” (Filipi 2:4) O ā amioga e mafai ona e faamatalaina ai se tasi e uaʻi atu iā te ia lava? E faapefea i lenā mea ona aafia ai le talaaga o lenā tagata?

   “Ou te lē fiafia i se tama e faatafai i se teine. O le faatafai o se faailoga lea o le lē faamaoni i le faaipoipoga. O lou faaaogāina lea o se isi ina ia taʻuleleia ai oe, ma o le manatu faapito lenā mea.”​—Julia.

 O le manatu autū: O se tasi e faafoliga e tosina atu i se isi ae leai sona faanaunauga moni e uō ma ia, e lē gata o le a faatigā ai i isi, ae faapea o ia lava.

•   Ua faapea mai le Tusi Paia ia feutagaʻi ma ‘tane talavou e pei o ni ou uso’ ma “fafine laiti e pei o ni ou tuafāfine i le amio mamā.” (1 Timoteo 5:​1, 2) Afai e te utagia nei tapulaa, o le a e puipuia la outou faauōga ma i latou o le isi itupā.

   “Pe ana ou faaipoipo, ou te lē faatafai i le toʻalua o se isi. O se lesona lelei mo aʻu i le taimi nei a o oʻu nofofua, ia iai se vaaiga paleni i feutagaʻiga ma isi o le isi itupā.”​—Leah.

•   Ua faapea mai le Tusi Paia: “O le tele o upu e lē asa ai ma se mea sesē.” (Faataoto 10:19) O lenā mataupu silisili e lē gata e faatatau i talanoaga, ae faapea foʻi le lafoina atu o feʻau tusitusia i le telefoni, e aofia ai le tele o taimi e lafo atu ai, ma faamatalaga o loo lafo atu.

   “E lē tatau ona e lafo atu ni feʻau tusitusia i se teine i aso uma, seʻi vaganā ua e fuafua e tuutala ma ia.”​—Brian.

•   Ua faapea mai le Tusi Paia: “O le atamai mai i lugā, e muamua ona mamā.” (Iakopo 3:​17) O le fusi atu e mafai ona faia i se auala mamā, ae e mafai foʻi ona avea ma faailoga o faalogona fetosinaaʻi.

   “Ou te taumafai ou te talanoa i se auala faaleuō ae faaaloalo.”​—Maria.

 O le manatu autū: Ia iloilo ma le faaeteete le auala o loo e feutagaʻi ai ma le isi itupā. Ua faapea mai se talavou e igoa ia Jennifer, “E lē faigofie ona maua faauōga lelei, ma e te lē manaʻo e faaleagaina e ala i le faia o ni gaoioiga e faaluafesasi ai mafaufauga o le isi itupā.”

•   Uaʻi totoʻa i faamatalaga a isi. Pe a fesili mai se tasi, “E te lua feoaʻi ma Pai?” e faailoa mai ai ua lua māfana tele.

•   Ia tutusa lau vaai i au uō uma o le isi itupā. Aua le taulaʻi atu i le na o se tagata e toʻatasi ae lē ano i isi.

•   Pe a lafo atu feʻau tusitusia, ia faaeteete i faamatalaga, o le taimi, ma le tele e lafo atu ai. Ua faapea mai Alyssa, “E lē tatau ona lafo atu sau feʻau tusitusia i se tasi o le isi itupā i le leva o le pō.”