O le Tusi i le Faapotopotoga i Filipi 2:1-30
2 O lenei, afai e iai se faalaeiauga mai iā Keriso, afai e iai se faamāfanafanaga ona o le alofa, afai e iai se faatasitasiga faaleagaga,* pe afai foʻi e iai le alofa faapelepele ma le alofa mutimutivale,
2 ia faaatoatoa loʻu olioli e ala i le tutusa o outou mafaufauga, ma tutusa lo outou alofa, ma ia matuā autasi,* ma ia manatunatu i le mea e tasi.+
3 Ia aua lava neʻi faia se mea ma le finauvale+ po o le faasausili,+ ae ia faia ma le lotomaulalo, i le manatu ua sili isi iā te oe,+
4 a o e vaavaai ma le naunau e lē gata i au lava mea,+ ae i mea foʻi e lelei ai isi.+
5 Ia faaauau ona iā te outou le mafaufau o Keriso Iesu,+
6 o lē e ui ina sa foliga e pei o le Atua,+ ae e leʻi manatu lava o ia e taumafai ina ia tutusa ma le Atua.+
7 E leai, ae na tuua e ia o mea uma lava ma fai o ia ma pologa,+ ma avea ai o ia o se tagata.*+
8 E lē gata i lea, ina ua avea o ia o se tagata,* ua ia faamaulalo iā te ia lava, ma iʻu ai ina usiusitaʻi e oo i le oti,+ ioe, o le oti lea i le laau na faapuapuagatia ai*+ o ia.
9 O le māfuaaga lea ua faaeaina ai o ia e le Atua i se tulaga e sili ona maualuga,+ ma avatu ma le agalelei iā te ia le suafa e sili i isi igoa uma,+
10 ina ia tootutuli tulivae uma lava i le suafa o Iesu, o i latou o i le lagi, ma i latou o i le lalolagi, ma i latou o i lalo ifo o le eleele,+
11 ma ia taʻutaʻu atu e laulaufaiva uma o Iesu Keriso o le Alii,+ ina ia faamamaluina ai le Atua le Tamā.
12 O le mea lea, aʻu uō pele e, e pei ona sa masani ona outou usiusitaʻi, e lē na o taimi na ou faatasi ai ma outou, ae ua sili atu i le taimi ua ou lē iai, ia faaauau ona outou galulue mo lo outou lava faaolataga, i le mataʻu ma le gatete.
13 Auā o le Atua, o lē o loo faamalosia outou e tusa ma lona finagalo malie, e na te foaʻi atu iā te outou le faanaunauga faapea le malosi e galulue ai.
14 Ia outou faia mea uma lava e aunoa ma le muimui+ ma fefinauaʻiga,+
15 ina ia lē taʻuleagaina outou ma ia mamā, o fanau a le Atua+ e lē ponā i le tupulaga faapiʻopiʻo ma le taufaasesē,+ lea ua outou susulu atu ai e pei o molī e faamalamalama aʻi le lalolagi,+
16 a o taofimau i le upu o le ola.+ Ona iai lea o se mea ou te olioli ai i le aso o Keriso, i le iloaina e leʻi iʻuvale laʻu tamoʻe ma aʻu galuega mamafa.
17 Ae e ui lava ua liligiina aʻu e pei o se taulaga i meainu,+ i luga o la outou auaunaga paia* lea ua outou faia ona o lo outou faatuatua, ua ou fiafia ma ou olioli faatasi ma outou uma.
18 Ia faapena foʻi ona outou fiafia ma olioli faatasi ma aʻu.
19 Ou te faamoemoe i le Alii o Iesu e vave ona ou auina atu Timoteo+ iā te outou, ina ia faalaeiauina aʻu pe a ou maua se tala e faatatau iā te outou.
20 Auā e lē o iā te aʻu se tasi e mafaufau lelei e pei o ia, o lē e manatu mamafa moni iā te outou.
21 Ua saʻili e isi uma o latou lava lelei, ae e lē o mea e faatatau iā Iesu Keriso.
22 Ae ua outou iloa le faamaoniga ua ia tuuina mai e faatatau iā te ia lava, i le pei o se atalii+ ma lona tamā, na ma pologa faatasi i le faalauteleina o le tala lelei.
23 O lea la, o ia lea ua ou faamoemoe e auina atu pe a ou iloa le mea e tupu iā te aʻu.
24 O le mea moni, ua ou mautinoa e lē o toe umi ona ou alu atu lea, pe afai e finagalo i ai le Alii.+
25 Peitaʻi, ua ou manatu e tatau ona auina atu iā te outou o Epaferoti, o loʻu uso ma o lē na ma galulue faatasi, ma o le uso a fitafita, ma o la outou avefeʻau, ma o laʻu lava auauna e fesoasoani mai i oʻu manaʻoga,+
26 talu ai ua naunau o ia e fia vaai iā te outou uma, ma ua mafatia o ia ona ua outou faalogo ua maʻi o ia.
27 O le mea moni, sa maʻi o ia ma na toetoe lava a oti; ae ua alofa mutimutivale le Atua iā te ia, e lē gata iā te ia ae faapea foʻi ma aʻu, ina neʻi oʻu faanoanoa ai ma atili ai ona ou faanoanoa.
28 O le mea lea, ou te matuā faavave ai ona auina atu o ia iā te outou, ina ia outou toe olioli pe a toe vāai iā te ia, ma faaitiitia ai foʻi loʻu popole.
29 O lea, ia talia o ia ma le olioli, e pei ona masani ai ona outou taliaina o soo o le Alii, ma ia faaauau ona faapelepele i tane faapena,+
30 auā na toetoe a oti o ia ona o le galuega a Keriso,* na lamatia ai lona ola ina ia fesoasoani mai iā te aʻu, auā e leʻi mafai ona outou fesoasoani mai.+
Faamatalaga Pito i Lalo
^ Ele., “afai e fefaasoaaʻi i le agaga.”
^ Po o le “lotogatasi.”
^ Ele., “avea ai o ia e pei o se tagata.”
^ Ele., “ina ua ia iloa o ia lava ua foliga o se tagata.”
^ Tagaʻi i le Uiga o Upu.
^ Po o le “auaunaga i le lautele.”
^ Pe atonu “o le galuega a le Alii.”
