UA FESILI MAI TALAVOU
O le ā le Tele e Maufaatuatuaina ai Aʻu?
Ia iloilo oe lava!
Ou te . . . i taimi uma, i le tele o taimi, i nisi taimi, pe e lē taitai
faamaoni
maufaatuatuaina
tausi taimi
toʻaga
fai mea maopoopo
loto fesoasoani
lē faaituʻau
faaaloalo
manatu mamafa
O lē fea o nei uiga e tele ina e faaalia?
Ia faaauau pea ona faaalia lenā uiga lelei.—Filipi 3:16.
O lē fea uiga e manaʻomia ona faaleleia?
O faamatalaga o loo sosoo mai e fesoasoani iā te oe e faaleleia ai na uiga.
O le ā le uiga o le avea ma sē e maufaatuatuaina?
O tagata maufaatuatuaina e faataunuu o latou tiute tauave i le aiga, i le aʻoga, ma i galuega. E latou te iloa e tatau ona faataunuu a latou matafaioi. Pe a faia se mea sesē, e latou te faailoa atu, faatoese, ma taumafai e faasaʻo a latou mea sesē.
Ua faapea mai le Tusi Paia: “Auā e tauave e le tagata lava ia lana avega.”—Kalatia 6:5.
Aiseā ou te manaʻo ai e avea ma sē e maufaatuatuaina?
O se tagata maufaatuatuaina e faaaogā tatau ona tomai, e faaaloalogia o ia, e vaai iā te ia o sē faatagata matua, ma e na te mauaina le saʻolotoga ma faaeaga.
Ua faapea mai le Tusi Paia: “Po ua e tagaʻi ea i se tagata tomai i lana galuega? O le a tū o ia i luma o tupu.”—Faataoto 22:29.
O se tagata maufaatuatuaina e limafoaʻi ma e olioli i faauōga lelei.
Ua faapea mai le Tusi Paia: “Ia outou foaʻi atu pea, ona foaʻi mai lea o tagata iā te outou.”—Luka 6:38.
O se tagata maufaatuatuaina e na te lagona le faamalieina ma le olioli, lea e atiaʻe ai lona uiga mautinoa.
Ua faapea mai le Tusi Paia: “Ia taʻitasi le tagata ma faamaonia po o faapefea ana galuega, ona iai lea o se mea e mitamita ai iā te ia lava.”—Kalatia 6:4.
E faapefea ona matuā maufaatuatuaina aʻu?
Ina ia tali lena fesili, tagaʻi i faamatalaga a isi o loo taʻua i lalo. O lē fea o nei faamatalaga e tutusa ma lou tulaga?
“Ou te matuā lē fiafia pe vili soo mai oʻu mātua e fia iloa le mea ou te alu ai i taimi uma!”—Kerri.
“E masani ona faataga aʻu e oʻu mātua e matou te tafafao ma aʻu uō.”—Richard.
“Pe a ou vaai i isi tamaiti matou te tupulaga ma mea o loo latou faia, ou te mafaufau: ʻAiseā e lē faataga ai aʻu e oʻu mātua e faia mea o loo latou faia?’”—Annie.
“E faataga aʻu e oʻu mātua e fai le mea ou te manaʻo ai. Ou te faafetai iā i laʻua mo le saʻolotoga o loo oʻu maua.”—Marina.
O le manatu tāua: E tele atu le saʻolotoga e maua e isi talavou nai lo isi. Aiseā e eseese ai?
Le mea moni: O le tele o le saʻolotoga e te maua, e faalagolago i le tele e maufaatuatuaina ai oe.
Mo se faataʻitaʻiga, mātau faamatalaga a ni talavou se toʻalua na taʻua muamua.
Richard: “N iai le taimi na lē talitonuina ai e oʻu mātua le auala ou te faaaogā ai loʻu saʻolotoga. Ae ua la talitonuina aʻu i le taimi lenei ona na ou faaaogā tatau loʻu saʻolotoga. Ou te lē pepelo i oʻu mātua i mea ou te alu ai ma tagata matou te ō. O le mea moni, e masani ona ou taʻu atu i oʻu mātua aʻu fuafuaga e tusa pe e lē fesili mai.”
Marina: “E faalua ona ou pepelo i oʻu mātua, ma na la iloa loʻu pepelo i na taimi uma. Talu mai na taimi, ua ou faamaoni ai lava i oʻu mātua. O se faataʻitaʻiga, ou te taʻu atu iā i laʻua mea uma ou te faia ma faailoa i ai mea uma ou te alu ai. Ua la maufaatuatuaina aʻu i le taimi lenei.”
Pe e te fia pei o Richard ma Marina? Ia iloilo oe lava i vala nei:
OLAGA I LOU AIGA
Pe e te faia maeʻaeʻa au feʻau i le fale?
Pe e te tausisi i le taimi e tatau ai ona e oo i le fale?
Pe e te feutagaʻi ma ou mātua ma ou tei i se auala faaaloalo?
Pe e iai se vala e tatau ona e galue e faaleleia?
Ua faapea mai le Tusi Paia: “Ia usiusitaʻi i o outou mātua.”—Efeso 6:1.
I LAU AʻOGA
Pe e uma au meaaʻoga i le taimi e tatau ai ona uma?
Po o e taumafai e faaleleia ou togi i le aʻoga?
Pe e te fiafia e suʻesuʻe?
Pe e iai se vala e tatau ona e galue e faaleleia?
Ua faapea mai le Tusi Paia: “Ua fai le atamai ma puipuiga.” (Failauga 7:12) O le lelei o aʻoaʻoga e maua ai le atamai.
LOU TALAAGA
Pe e te faamaoni i ou mātua ma isi?
Pe e te faasoasoa lelei au tupe?
Pe e iai sou talaaga o se tagata faamoemoeina?
Pe e iai se vala e tatau ona e galue e faaleleia?
Ua faapea mai le Tusi Paia: “Ia oofu i le tagata fou.” (Efeso 4:24) E mafai ona faaleleia au masaniga ma lou talaaga.
Fautuaga: Filifili se uiga e manaʻomia ona e faaleleia. Talanoa i isi na taulau i lena uiga ma maua mai ai fautuaga. Ia tusi i lalo ni auala patino e te galue ai ina ia faaleleia lena uiga, ona fai lea o au taumafaiga mo se masina. Ia faamaumau itu ua e taulau ai ma itu e te lē o taulau ai. Ia iloilo au taumafaiga pe a uma le masina.