“I le vaipanoa ou te nofo ai, e toeitiiti o tagata uma e 25 tausaga ma lalo ifo e ulaula pe e faaaogāina sikareti e alu i le uila.”—Julia.

I lenei mataupu

•  Mea e tatau ona e iloa

•  Mea e mafai ona e faia

•  Pe e afāina le mariuana?

•  Tala a isi talavou

 Mea e tatau ona e iloa

•   E te oti i le tapaa. O le nikotini, o se vailaau oona e iai i le tapaa, lea e māfua ai ona fiafia pea le tagata e ulaula. Ua taʻua e se tasi o faalapotopotoga o le soifua mālōlōina i le Iunaite Setete, “o le ulaula tapaa, o se tasi lea o māfuaaga autū o le mamaʻi ma le vave maliliu o le toʻatele o tagata i le lalolagi aoao, e ui o se mea e mafai ona ʻalofia.”

   “O laʻu galuega o le faia o faata i le falemaʻi (sonographer) ma ua ou vaaia ai le telē o le aafiaga o le ulaula i tagata. Na matuā faateʻia aʻu i le tele o siama o loo i alātoto o tagata sa masani ona ulaula. Ou te lē fia ulaula ona ou te faapelepele i loʻu tino.”—Theresa.

   E te silafia? E pe ā ma le 7,000 vailaau o loo iai i le tapaa, ma o le tele o na vailaau e oona. I tausaga taʻitasi, e maliliu ai le faitau miliona o tagata ona o ni faamaʻi e māfua mai i le tapaa.

•   E iai vailaau oona i sikareti e alu i le uila. E talitonu tagata atamamai, o le faaaogāina o sikareti e alu i le uila, ua faaleagaina ai māmā o le toʻatele o tagata ma maliliu ai. I le pei o le tapaa, e iai foʻi i le sikareti e alu i le uila le vailaau o le nikotini. Talu ai o lenei vailaau e māfua ai ona fiafia pea se tagata e ulaula, o le mea lea ua taʻua ai e se pepa o faamatalaga e faatatau i le sikareti e alu i le uila, o le nikotini e mafai ona “faaosofia ai le naunau o talavou e faaaogā isi fualaau faasāina.”

   “E iai sikareti e alu i le uila e iai sona tofo suamalie e pei o le cotton candy ma le cherry, ma e tele ina fiafia i ai tamaiti ma talavou. O le tofo suamalie, e latou te lē manatu ai i aafiaga leaga.”—Miranda.

   E te silafia? E lē na o le vai o loo iai i le ausa mai i le sikareti e alu i le uila, ae o loo iai foʻi ma vailaau e matuā oona lea e mafai ona oo atu i ou māmā.

 Mea e mafai ona e faia

•   Ia iloa faamatalaga moni. Aua e te talitonugofie i faamatalaga uma e te faalogo i ai. O se faataʻitaʻiga, e fai mai isi e leai se afāina o le faaaogāina o le sikareti e alu i le uila, ma o se auala lelei e faateʻa ai le popole. Ia fai ni au oe lava saʻiliʻiliga, ma ia e faia se faaiʻuga atamai e fua i faamatalaga moni.

   Mataupu silisili o le Tusi Paia: “E talitonu le tagata ua leai se poto masani i upu uma, a o le tagata e iai le utaga mamao, e manatunatu i ona laasaga uma.”—Faataoto 14:15.

   “Pe a e mafaufau i aafiaga leaga o le tapaa ma sikareti e alu i le uila, o le a e iloa ai e tele atu aafiaga o na mea nai lo o le fiafia lea e manatu tagata lauiloa ma au aumea e maua mai ai.”—Evan.

   Ia mafaufau i ai: Po o fiafia moni lava talavou o loo ulaula ma faaaogāina sikareti e alu i le uila? Po ua faaleleia ai le auala e latou te fesagaʻia ai popolega o le olaga i le taimi lenei ma le lumanaʻi? Po o latou selesele mai ai le tele o faafitauli?

•    Saʻili auala aogā e fesagaʻia ai le popole. O isi auala lelei e faaitiitia ai le popole, e aofia ai le faia o ni mea e aogā iā te oe e pei o le faamalositino, faitau tusi, po o le faifaimea faatasi ma uō e faalaeiauina oe e faia mea lelei. Pe a tele mea lelei e te uaʻi i ai, o le a e lē lagona ai sou fia ula.

   Mataupu silisili o le Tusi Paia: “O popolega i le loto o le tagata e faavaivai ai le loto, a o tala lelei e olioli ai le loto.”—Faataoto 12:25.

   “E manatu tagata o le ulaula tapaa ma sikareti e alu i le uila e faateʻa ai le popole. Peitaʻi, e na o sina taimi puupuu e maua ai le fiafia mai i na mea, ae e umi se taimi o iai se aafiaga leaga iā te oe. E tele auala aogā e fesagaʻia ai popolega.”—Angela.

   Ia mafaufau i ai: O ā nisi auala aogā e mafai ai ona e feagai ma popolega? Pe a e manaʻomia se fesoasoani, tagaʻi i le mataupu “E Faapefea Ona Ou Feagai ma Popolega?” i le vaega “Ua Fesili Mai Talavou.”

•    Ia nofosauni e teena omiga mai aumea. O omiga e mafai ona ala mai i tamaiti o le aʻoga ma faafiafiaga e te fiafia i ai. E masani ona faaata mai i ata tifaga, polokalame i le TV, ma fesootaʻiga i le Initaneti, e pei e manaia ma maua le fiafia mai i le ulaula tapaa ma sikareti e alu i le uila.

   Mataupu silisili o le Tusi Paia: ʻO tagata matutua e faaaogā o latou mafaufau e iloa ai le mea saʻo ma le mea sesē ina ua aʻoaʻoina.’—Eperu 5:14.

   “A o ou iai i le aʻoga, e toʻatele aʻu aumea na faaaloalogia aʻu ona ou te leʻi ulaula pe tagofia sikareti e alu i le uila. Talu ai na ou faailoa manino atu iā i latou ou te lē ulaula, na oo ai lava ina latou fesoasoani mai e ala i le faailoa atu i isi o laʻu filifiliga. O lea, e mafai ona avea o se puipuiga le faailoa atu o lau filifiliga.”—Anna.

   Ia mafaufau i ai: Pe mafai ona e tetee atu i omiga mai i au aumea? Pe e mafai ona e mafaufau i ni taimi na e faia ai faapea? Pe a e manaʻomia se fesoasoani i lea vala, tagaʻi i le vaega “Peer-Pressure Planner” o loo i le mataupu 15 o le tusi Questions Young People Ask—Answers That Work, Tusi 2.

•   Ia filifili lelei au uō. E ono lē faaosoosoina oe e ulaula pe faaaogā sikareti e alu i le uila, pe afai e tutusa ou manatu ma au uō i na faiga.

   Mataupu silisili o le Tusi Paia: “Ia faauō i tagata atamamai ona e atamai ai lea. O le filifili e faauō i ē vālea o le a e iʻu ai i faafitauli.”—Faataoto 13:20, Easy-to-Read Version.

   “E tele aogā o le faauō i tagata e iai uiga e pei o le pulea totino ma le faamaoni. Pe a e vaai atu o loo iʻu lelei o latou olaga, o le a uunaʻia ai foʻi oe ia pei o i latou.”—Calvin.

   Ia mafaufau i ai: Po o lagolagoina e au uō vavalalata lou ola i se olaga lelei ma mamā, po o latou faafaigatā lou faia faapea?

 Pe e afāina le mariuana?

 E toʻatele e faapea mai e lē leaga le mariuana. Ae o se matuā pepelo lenā tala!

•   O talavou e faaaogāina le mariuana, e iai le lamatiaga o le a avea o se masaniga e lē mafai ona toe tuua. Ua faaalia i suʻesuʻega, o le faaaogāina o le mariuana e mafai ona faaleagaina atoatoa ai lou faiʻai, lea e aofia ai ma le auala e te mafaufau ai.

•   Na taʻua e se isi faalapotopotoga mo le soifua mālōlōina i le Iunaite Setete, “ua faailoa mai i suʻesuʻega, o tagata e faaaogāina le mariuana, e telē le avanoa e ono iai ni faafitauli i a latou faiā ma isi, lē taulau i aʻoaʻoga, lē iʻu lelei a latou galuega, ma lē maua le faamalieina i le olaga.”

   “Na ou manaʻo e ula le mariuana ona na ou fia maua se mapusaga mai faalogona popole. Peitaʻi, ina ua ou mafaufau e ono avea lenei mea o se masaniga e lē mafai ona ou toe tuua, tele tupe o le a alu ai, ma e tele aafiaga leaga o le a iai i loʻu soifua mālōlōina, na ou iloa ai o le ulaina o le mariuana o le a faateteleina ai oʻu popolega.”—Judah.