UA FESILI MAI TALAVOU
Foafoaga po o le Evolusione?—Vaega 2: Aiseā e Fesiligia ai le Moni o le Evolusione?
Ua lē mautonu Aleki. E talitonu o ia i le Atua ma le foafoaga. Ae o lea ua faapea mai lona faiaʻoga, o le evolusione o se aʻoaʻoga e moni ma e iai ni ona faamaoniga maufaatuatuaina. E lē manaʻo Aleki e foliga atu e pei e na te lē iloa se mea. O lea ua ia faapea ifo ai, ʻAfai o lea ua faamaonia e saienitisi e moni le evolusione, aiseā la o le a ou fesiligia ai?’
Pe na iai se taimi na tupu ai se mea faapena iā te oe? Atonu na e talitonu i lou olaga atoa i le manatu o le Tusi Paia e faapea: “Na foafoaina e le Atua le lagi ma le lalolagi i le amataga.” (Kenese 1:1) Peitaʻi, e leʻi leva talu ai nei ona taumafai tagata e faatalitonu oe, o le foafoaga ua na o se talafatu ma e moni le evolusione. Pe e tatau ona e talitonu iā i latou? Aiseā e tatau ai ona e fesiligia pe e moni le evolusione?
Māfuaaga e lua e fesiligia ai le moni o le evolusione
E lē ioe saienitisi i le evolusione. E ui ua tele tausaga o suʻesuʻe e saienitisi le evolusione, ae e lē o tutusa lava o latou manatu i le auala e faamatala ai le evolusione.
Ia mafaufau i ai: Afai o saienitisi, o tagata na e sili ona atamamai, ae e lē o ioe e faatatau i le auala e faamatala ai le evolusione, e leai foʻi la se afāina o le tatou fesiligia o le moni o le evolusione.—Salamo 10:4.
E tāua mea e tatou te talitonu ai. Ua faapea mai se tama talavou e igoa iā Zachary: “Pe afai na teʻi lava ua iai le ola, o lona uiga la e leai se fuafuaga o le olaga o le tagata ma isi mea uma i le vateatea.” E fetaui lenā manatu, auā pe afai e moni le evolusione, o lona uiga la e leai se fuafuaga tumau o le olaga. (1 Korinito 15:32) I le isi itu, pe afai e moni le foafoaga, e mafai la ona tatou maua ni tali faamalieloto e faatatau i le uiga o le olaga ma lo tatou lumanaʻi.—Ieremia 29:11.
Ia mafaufau i ai: E faapefea ona aafia o tatou olaga, i le iloaina o le mea moni e faatatau i le evolusione ma le foafoaga?—Eperu 11:1.
Fesili e iloilo
TALA A ISI: ʻNa māfua ona iai mea uma i le vateatea ona o se pasae telē.’
O ai ma o le ā na faapogaia lenā pasae telē?
O le ā le manatu e sili ona fetaui? O le manatu na te’i lava ua iai le ola ma mea uma o iai, po o le manatu na iai se mea po o se tasi na faia na mea?
TALA A ISI: ʻNa maua tagata mai i manu.’
Pe afai na tupuga mai tagata i manu e pei o manukī, aiseā la ua matuā eseese ai lava le tomai o tagata mai i manu? a
Aiseā e matuā lavelave ai le fausaga o meafaiola e pito sili ona faatauvaa? b
TALA A ISI: ʻUa faamaonia le moni o le evolusione.’
Pe na faia ni saʻiliʻiliga a i latou o loo faia lenei tala, e iloa ai po o le ā le mea e moni?
E toʻafia ni tagata ua talitonu i le evolusione, ona ua latou faalogo o le mea lenā e talitonu ai tagata atamamai uma?
a E ono faapea mai nisi, e ala ona atamamai atu tagata ona e tetelē atu o latou faiʻai nai lo o manukī. Ae ina ia iloa māfuaaga e lē fetaui ai lenā manatu, tagaʻi i le polosiua The Origin of Life—Five Questions Worth Asking, itulau 28.
b Tagaʻi i le polosiua The Origin of Life—Five Questions Worth Asking, itulau 8-12.
E te Ono Fiafia Foʻi
UA FESILI MAI TALAVOU
Foafoaga po o le Evolusione?—Vaega 1: Aiseā e Talitonu ai i le Atua?
Pe e te manaʻo e maua le lototele e faamatala atu ai le māfuaaga e te talitonu ai i le Atua? Ia mātau nisi o fesoasoani i le auala e tali atu ai i nisi e fesiligia ou talitonuga.
UA FESILI MAI TALAVOU
Foafoaga po o le Evolusione?—Vaega 3: Aiseā e Talitonu ai i le Foafoaga?
Afai e te talitonu i le foafoaga, po o lona uiga la e te tetee i le faasaienisi?
