O le Tusi i le Faapotopotoga i Roma 14:1-23
14 Ia talia lē ua vaivai i le faatuatua,+ ae aua le faamasinosino i manatu eseese.*
2 Ua talitonu le tasi tagata e lelei ona ʻai i mea uma, a o le tagata e vaivai, e na o fualaau faisua e ʻai ai.
3 O lē e ʻai, ia aua neʻi manatu faatauvaa i lē e lē o ʻai, ma o lē e lē o ʻai, aua neʻi faamasino atu i lē o ʻai,+ auā ua talia o ia e le Atua.
4 O ai ea oe e te faamasinosino ai i le auauna a le tasi tagata?+ Auā e pule lona lava matai pe tū pe paʻū o ia.+ E moni, e tū o ia auā e mafai e Ieova* ona faatūina o ia.
5 E manatu le tasi tagata e tāua le isi aso nai lo o isi aso;+ ae e manatu le isi tagata e tutusa aso uma;+ ia taʻitasi le tagata ma matuā mautinoa i lona lava mafaufau.
6 O lē e na te tausia le aso, e tausia e ia ina ia faamamaluina ai Ieova.* O lē foʻi e ʻai, e ʻai ina ia faamamaluina ai Ieova,* auā ua faafetai atu o ia i le Atua;+ ma o lē e lē o ʻai, ua lē ʻai o ia ina ia faamamaluina ai Ieova,* ae ua faafetai atu o ia i le Atua.+
7 O le mea moni, e leai se tasi o i tatou e ola mo ia lava,+ ma e leai foʻi se tasi e oti mo ia lava.
8 Auā afai tatou te ola, e tatou te ola mo Ieova,*+ ma afai tatou te oti, e tatou te oti mo Ieova.* O lea la, pe tatou te ola pe tatou te oti, ae ua tuuina atu o tatou ola iā Ieova.*+
9 O le mea lea ua maliu ai Keriso ma toe soifua mai, ina ia avea o ia ma Alii o ē ua oti ma ē ua ola.+
10 Ae aiseā e te faamasinosino ai fua i lou uso?+ Pe aiseā foʻi e te manatu faatauvaa ai i lou uso? Auā tatou te tutū uma lava i luma o le nofoa faamasino o le Atua.+
11 E pei ona tusia: “Ua fetalai mai Ieova,* ‘O loo ola aʻu,+ e tootuli tulivae uma i oʻu luma, ma e taʻutaʻu atu e laulaufaiva uma o aʻu o le Atua.’”+
12 O le mea lea, e taʻitasi ai i tatou uma ma tala atu lana amio i le Atua.+
13 O lea la, aua tatou te toe faamasinosino le tasi i le isi,+ ae nai lo o lea, ia maumauaʻi e aua le faia se mea e tausuai ai pe tautevateva ai se uso.+
14 Ua ou iloa ma talitonu i le Alii o Iesu, e leai lava se mea e lē mamā;+ seʻi vaganā ua manatu se tagata e lē mamā, ona lē mamā lea iā te ia.
15 Auā afai o meaʻai ua tigā ai lou uso, ua e lē toe savali la e tusa ma le alofa.+ Aua neʻi afāina* lou uso o lē na maliu ai Keriso ona o au meaʻai.+
16 O lea la, aua neʻi faia se mea e taʻuleagaina ai e se tasi mea lelei ua outou faia.
17 Auā e lē faasino atu le Malo o le Atua i le ʻai ma le inu,+ ae e faasino atu i le amiotonu, ma le filemu, ma le olioli, atoa foʻi ma le agaga paia.
18 E tusa ai ma lenei mea, o so o se tasi e pologa mo Keriso, e taliaina o ia e le Atua, ma e fiafia foʻi i ai tagata.
19 O lea, seʻi o tatou tausisi i mea e faatupu ai le filemu,+ ma mea e atiaʻe ai e le tasi le isi.+
20 Aua le lepetia galuega a le Atua ona o meaʻai.+ E moni e mamā mea uma, ae e leaga* pe a ʻai se tagata ma tausuai ai le isi.+
21 E sili ona lelei pe a lē ʻai i aano o manu pe inu i le uaina, po o le faia o so o se mea e tausuai ai lou uso.+
22 Ia e tausisi pea i lou faatuatua e tusa ai ma le silafaga a le Atua. E fiafia le tagata e lē faamasinosino e ia o ia lava e tusa ma mea ua tonu i lona manatu.
23 Ae afai e masalosalo o ia, e taʻusalaina o ia pe a ʻai, auā e lē o ʻai o ia ona o lona faatuatua. O le mea moni, o mea uma e lē tusa ma le faatuatua, o le agasala lea.
Faamatalaga Pito i Lalo
^ Pe atonu “i masalosaloga o le loto.”
^ E faasino atu i le afāina po o le lepetia o lona faatuatua, po o lona faamoemoe mo le ola e faavavau.
^ Po o le “sesē.”
