“A o oʻu aʻoga, pe a fai mai se tamaitiiti na ia faia feusuaʻiga ma se isi, o le a mananaʻo foʻi isi tamaiti e fai lenā mea. E leai lava ma se isi e manaʻo e lagona e pei ua faaesea o ia.”—Elaine, 21.

 Pe na iai se taimi na faaosoosoina ai oe e faia feusuaʻiga ona o le mea foʻi lenā o loo faia e le toʻatele?

 Pe na iai se taimi na faaosoosoina ai oe e sē e te alofa i ai e lua te faia feusuaʻiga?

 Pe afai o le tulaga lenā, o le a fesoasoani lenei mataupu iā te oe e tetee atu ai i faaosoosoga mai i isi e faia feusuaʻiga, po o ou lava tuʻinanauga e faia faapea. O le iʻuga, o le a e faia ai ni filifiliga atamai.

•  Talafatu ma tala moni

•  Auala e tetee atu ai pe a faaosoosoina e faia feusuaʻiga

•  Tala a isi talavou

 TALAFATU: O loo faia e tagata uma feusuaʻiga (seʻi vaganā ai aʻu).

 TALA MONI: I se tasi o suʻesuʻega, e mai i le toʻatolu talavou e taʻi 18 tausaga, e toʻalua na faapea mai ua la faia feusuaʻiga. O lona uiga, e silia i le 30 pasene i latou e leʻi faia ni feusuaʻiga, o se fuainumera telē. O lea, e lē o “tagata uma” o loo faia feusuaʻiga.

 TALAFATU: O le faia o feusuaʻiga o le a faamalosia ai le ta faigāuō.

 TALA MONI: E ono faia e nisi tama lenā faamatalaga ina ia ioe mai ai le teine e la te faia feusuaʻiga, ae e lē moni lenā tala. E masani lava ona faauma e le tama se faigāuō, pe a uma ona la faia feusuaʻiga ma se teine. E matuā tigā ai faalogona o le teine, auā na manatu e alofa moni ma faamaoni le tama iā te ia. a

 TALAFATU: Ua faapea mai le Tusi Paia e sesē le faia o feusuaʻiga.

 TALA MONI: O loo faalaeiauina i le Tusi Paia ina ia iai se vaaiga saʻo i feusuaʻiga, ae e na o le tane ma le fafine ua uma ona faaipoipo e tatau ona faia feusuaʻiga.—Kenese 1:28; 1 Korinito 7:3.

 TALAFATU: E na o le faanoanoa e iʻu i ai pe a mulimuli i taʻiala a le Tusi Paia.

 TALA MONI: Pe a e faatali seʻi e faaipoipo ona faatoʻā fai lea o feusuaʻiga, e te lagona le fiafia ona ua e lē tofo ai i popolega, faalogona nofosala, ma le lē mautonu ona o le faia o feusuaʻiga a o leʻi faaipoipo.

 Le manatu autū: O le faatali seʻi faaipoipo ona faatoʻā fai lea o feusuaʻiga, e leʻi oo ai lava i se tasi ni faalogona tigā. Ae o le faia o feusuaʻiga a o leʻi faaipoipo, e mafai ona oo ai i se tasi na faalogona.

•   Ia faamalosia ou talitonuga i le mea saʻo ma le mea sesē. Ua taʻua i le Tusi Paia o tagata e taʻumatuaina, “ua faaaogā o latou mafaufau e iloa ai le mea saʻo ma le mea sesē ina ua aʻoaʻoina.” (Eperu 5:14) Talu ai e malolosi o latou talitonuga, e lē faigofie foʻi la ona latou lolo atu i faaosoosoga.

   “Ou te taumafai malosi e faia le mea saʻo ma ia iai soʻu talaaga lelei, ma ou te lē manaʻo e faia se gaoioiga e faalēaogāina ai na taumafaiga.”—Alicia, 16.

   Ia mafaufau i ai: O le ā le ituaiga talaaga e te manaʻo e iloa ai oe e tagata? Faamata e fetaui le taʻuleagaina o lou talaaga tau ina ia faamalieina ai le isi tagata?

•   Mafaufau i iʻuga e oo i ai. Ua faapea mai le Tusi Paia: “O le mea e lūlūina e le tagata, o le mea lava lea e na te seleseleina mai.” (Kalatia 6:7) Ia mafaufau i le ituaiga olaga o le a e ola ai faapea le isi tagata, pe afai e te lolo atu e faia feusuaʻiga i le taimi lenei. b

   “E masani lava o ē faia feusuaʻiga a o leʻi faaipoipo e oo i ai lagona o le nofosala, lē mautonu, ma e lē alofagia i latou. E ono maua foʻi i se maʻitaga e leʻi faatalitalia po o se faamaʻi pipisi mai i feusuaʻiga.”—Sienna, 16.

   Ia mafaufau i ai: O le fesili lenei mai i le tusi Sex Smart: “Pe a tauanau oe e au uō e fai se mea e oo ai iā te oe tigā, pe e tatau ona e faauō i na ituaiga tagata ma faalogo i a latou fautuaga i mataupu tāua o le olaga?”

•   Ia iai se vaaiga saʻo i feusuaʻiga. E lē o se mea leaga le faia o feusuaʻiga, auā ua faapea mai le Tusi Paia e tatau i ulugalii faaipoipo ona fiafia i lea vala o le la mafutaga.—Faataoto 5:18, 19.

   “O feusuaʻiga o se vala matagofie lea o le foafoaga a le Atua. E finagalo o ia ina ia tatou maua ai le fiafia, pe afai e faia i le faatulagaga na ia faavaeina, o le faaipoipoga.”—Jeremy, 17.

   Ia mafaufau i ai: O le a mafai ona e faia feusuaʻiga pe a e faaipoipo. O le a e maua le fiafia i lea vala o le faaipoipoga, e aunoa ma le tofo i iʻuga lē lelei na taʻua muamua.