Ia malamalama i le tulaga moni e faatatau i le matamata i ata matagā taufeusuaʻiga. O le matamata i ata matagā taufeusuaʻiga, ua faaleagaina ai e tagata le mea na foafoaina e le Atua ina ia faamamaluina. O le malamalama lelei i le vala lenā, e fesoasoani iā i tatou e ‘ʻinoʻino ai i le leaga.’—Salamo 97:10.

 Iloilo āuga o au gaoioiga. O le matamata i ata matagā taufeusuaʻiga e taʻuleagaina ai tagata o loo iai i na ata, aemaise ai foʻi tagata o loo matamata ai. O le māfuaaga lenā ua faapea mai ai le Tusi Paia: “O lē ua iai le utaga mamao e na te iloa atu le lamatiaga ma lafi ai.”—Faataoto 22:3.

 Fai ni taumafaiga. Na faapea mai le tagata faamaoni o Iopu: “Ua ou osia se feagaiga ma oʻu mata ina ia aua neʻi oʻu manaʻonaʻo i se tamaʻitaʻi.” (Iopu 31:1, Today’s English Version) O nisi ia o “feagaiga” e mafai ona e faia:

•  Ou te lē faaaogāina le Initaneti pe a na o aʻu.

•  O le a vave ona ou tapēina so o se vaaiga lē mamā, po o tuatusi lē talafeagai e oso ane pe a ou faaaogāina le Initaneti.

•  O le a ou talanoa atu i se uō taʻumatuaina pe a ou toe lolo i lenei vaivaiga.

 Tatalo e faatatau i le faafitauli. Na tatalo le faisalamo iā Ieova le Atua: “Ia e liliuese oʻu mata mai i le vaai atu i mea e lē aogā.” (Salamo 119:37) E finagalo le Atua ia e taulau manuia, ma pe a e tatalo atu iā te ia, e na te foaʻi mai le malosi e faia ai le mea saʻo!—Filipi 4:13.

 Talanoa i se isi. E tāua tele lou talanoa i se tagata e te maufaatuatuaina e fesoasoani i lou faafitauli.—Faataoto 17:17.

 Ia manatua: O taimi uma lava e te teena ai le matamata i ata matagā taufeusuaʻiga, o lenā ua e manumalo. Ia e tatalo iā Ieova le Atua ma faafetai iā te ia mo le malosi na ia foaʻi mai, ua e manumalo ai. O lou teena o le matamata i ata matagā taufeusuaʻiga, ua e faafiafiaina ai lona finagalo!—Faataoto 27:11.