Le māfuaaga e te ono faia ai lenei filifiliga: E te manaʻo e faaofo au uō i le iloa, e pule lava oe iā te oe. Ua e manatu e sili atu lou iloa i lo o ou mātua, pe e te lē faaaloalo foʻi i lo la tulaga pule.—Faataoto 15:5.

 Iʻuga: Atonu e ofo au uō, ae o le a latou iloa ai foʻi e te pepelo. Pe afai na e pepelo i ou mātua, e te ono pepelo foʻi la i au uō. Pe a iloa e ou mātua, o le a tigā o la faalogona ma manatu ua e lē amanaʻia i laʻua, ma atili ai ona mumusu e faataga oe i mea e te fia alu i ai!—Faataoto 12:15.

 Le māfuaaga e te ono faia ai lenei filifiliga: Ua e manatu e lē talafeagai le valaaulia ma mataupu silisili ua e aʻoaʻoina, pe ua e iloa foʻi, o nisi o loo valaaulia e lē o ni aumea lelei. (1 Korinito 15:33; Filipi 4:8) Ae i le isi itu, e te fia alu, ae e te lē lototele e fai i ou mātua.

 Iʻuga: Pe afai ua e lē alu ona e te iloa e lē o se faatasiga lelei, o le a e matuā mautinoa i lau tali e fai atu i au uō. Ae afai e te lē alu ona e te lē lototele e fai i ou mātua, atonu o le a e mafaufau pea i le valaaulia, ma manatu e na o oe lava lea e lē o maua le fiafia.

 Le māfuaaga e te ono faia ai lenei filifiliga: E te iloa e pule ou mātua iā te oe, ma e te faaaloalo i lo la tulaga pule. (Kolose 3:20) E te alofa i ou mātua ma e te lē fia faatigā iā i laʻua, e ala i le sola ae lē faanoi. (Faataoto 10:1) Ua e maua ai foʻi le avanoa e faamatala atu ai le mea o loo e manaʻo ai.

 Iʻuga: Ua iloa e ou mātua e te alofa ma faaaloalo iā i laʻua. Ma afai e la te iloa e talafeagai le mea o loo e manaʻo ai, atonu o le a la faataga oe e te alu.

 O se tasi lenei o māfuaaga. Mo se faataʻitaʻiga: Pe a faataga oe, e tai pei o le a e taʻele i le sami e iai tagata e vaavaaia le saogalemu o le ʻau tāʻeele. Aiseā? Auā a o e taʻele, e te lē iloa atu mea e lamatia ai. Ae o ē e vaavaaia le saogalemu, e latou te iloa lelei vaega o le sami e lamatia. E faapena foʻi ou mātua. Ona e sili atu lo la iloa ma le poto masani, e la te iloa lelei mea e lamatia ai, ia e te lē o iloa atu. I le pei o ē e vaavaaia le saogalemu i le matafaga, o le sini o ou mātua, o le fesoasoani iā te oe e ʻalofia mea e lamatia ai, ma lē maua ai le fiafia i le olaga.

 O se isi māfuaaga: O le faanaunauga sili o ou mātua, ia puipuia oe. O le alofa, e uunaʻia ai i laʻua e fai atu ioe pe a mafai, ae leai pe afai e lē tatau. Pe a e faanoi i ou mātua i se mea e te manaʻo e fai, e la te fesili ifo iā i laʻua lava pe mafai ona la faataga oe, ma e tuuaʻia i laʻua i ni mea e tutupu mulimuli mai. Pe afai ua mautinoa e ou mātua e leai se mea e afāina ai oe, ona la ioe loa lea ma faataga oe.

E fa auala

 Faamaoni: Muamua, ia fesili ifo ma le faamaoni iā te oe lava: ʻAiseā ou te fia alu ai? Pe ona ou te fiafia i le mea lea e fai, po ou te manaʻo ia fiafia mai aʻu uō iā te aʻu? Pe ona o le a iai i inā se tasi ou te fiafia i ai?’ Ia tautala saʻo i ou mātua. Sa talavou foʻi i laʻua, ma e la te iloa lelei oe. E la te iloa lelei foʻi māfuaaga moni e te faia ai mea. E la te talisapaia lou faamaoni, ma o le a e maua aogā mai i lo la atamai. (Faataoto 7:1, 2) I le isi itu, afai e te lē faamaoni, ua lē maufaatuatuaina oe, ma e lē maua ai se faatagaga mai i ou mātua.

 Taimi: Aua e te tauanauina ou mātua i mea e te manaʻo i ai, pe afai o lea faatoʻā la taunuu mai i le galuega, po o uaʻi atu i isi mataupu. Talanoa atu iā i laʻua pe afai ua mālōlō. Ae aua e te faatali seʻi oo i le taimi mulimuli, ona e taumafai lea e tauanau i laʻua ia tali mai. E lē mananaʻo ou mātua e faia se faaiʻuga faatopetope. Ia vave fai i ai, ma o le a la talisapaia lou magafagafa.

 Faamatala saʻo atu mea uma: Faamatala atu mea uma e tatau ona iloa e ou mātua. Faamatala atu le mea tonu o loo e manaʻo e fai. E lē fiafia mātua pe a e tali atu, “Ou te lē iloa,” aemaise pe a la fesili mai: “O ai o le a iai i inā?” “Po o le a iai se tagata matua maufaatuatuaina?” ma “O le ā le taimi e uma ai?”

 Uiga: Aua e te manatu i ou mātua, o ni fili. Ia manatu i ai o nisi e tou te ʻau, auā o i laʻua e iloiloina mea uma. Pe afai e te manatu i ou mātua o se ʻau, e te lē faatautee atu la i ai, ma o le a outou galulue felagolagomaʻi.

 Ia faailoa atu i ou mātua ua lava lou matua e talia ai ma amanaʻia la la faaiʻuga. Pe a e faia faapea, o le a la faaaloalo atu iā te oe. Ma i se isi taimi, o le a la lē faatalatū e ioe atu e te alu.