UA FESILI MAI TALAVOU
E Faapefea pe a Faatigā Mai Laʻu Uō iā te Aʻu?
Mea e tatau ona e iloa
E leai se faiā faaletagata e aunoa ma ni faafitauli. Ona o le tulaga lē lelei atoatoa, e ono mafai e sau uō, po o sau uō vavalalata, ona faia se gaoioiga po o se tala e faatigā ai oe. E faapena foʻi oe. O lea la, pe e te manatua se taimi na e faatigā ai i se isi?—Iakopo 3:2.
E faigofie ona tigā ou faalogona ona o le Initaneti. Mo se faataʻitaʻiga, na faapea mai se talavou e igoa iā David: “Pe a e matamata i se tuātusi i le initaneti ma vaai i ni ata o au uō o faatasitasi, e amata ona e taumānatu, pe aiseā ua lē valaaulia ai oe. E te manatu ua lē amanaʻia oe ma lagona ai le faanoanoa.”
E mafai ona e iloa le auala e taulima ai le faafitauli.
Mea e mafai ona e faia
Ia iloilo oe lava. Ua faapea mai le Tusi Paia: “Aua neʻi vave ona tigā lou loto, auā o ē e vālea o i latou ia e tigā o latou loto.”—Failauga 7:9.
“O nisi taimi e te iloa mulimuli ane, o le mea na e lē fiafia ai e lē o se mea matuiā.”—Alyssa.
Mafaufau i le manatu lenei: Po ua e faamamafa naʻuā se mataupu? Pe mafai ona e onosaʻi i le tulaga lē lelei atoatoa o isi?—Failauga 7:21,22.
Iloilo aogā o le faamagalo atu. Ua faapea mai le Tusi Paia: “E matagofie . . . lona lē manatua o le agaleaga.”—Faataoto 19:11.
“E tusa pe iai se māfuaaga tatau o lou lē fiafia, ae e tāua le faamagalo atu ma le lotoatoa. Aua le toe taʻua soo lenā mea sesē ma faatalitalia o le a faatoese mai le tagata i taimi uma. O le taimi lava e te faamagalo atu ai, e uma ai i inā le mataupu.”—Mallory.
Mafaufau i le manatu lenei: Pe e tāua tele lenā mataupu? Pe e mafai ona e faamagalo atu ina ia tausia pea le filemu?—Kolose 3:13.
O le toe taʻua soo o se faafitauli i se faigāuō, e tai pei o le tatala soo o se faitotoʻa ma agi mai ai se savili malosi ma faaleagaina ai mea i totonu o le potu
Iloilo le tulaga o le isi tagata. Ua faapea mai le Tusi Paia: “Ia vaavaai ma le naunau e lē gata i au lava mea, ae i mea foʻi e lelei ai isi.”—Filipi 2:4.
“Pe a iai le alofa ma le faaaloalo i se faigāuō, o le a vave ona foʻia le faafitauli, ona o lea e te manaʻo e faaleleia pea lenā faigāuō. Sa tele au taumafaiga na alu i le atiaʻe o le lua faigāuō, ma e te lē manaʻo e maʻimau na taumafaiga.”—Nicole.
Mafaufau i le manatu lenei: Pe e iai se itu e lelei le manatu o lenā tagata?—Filipi 2:3.
O le manatu autū: O le iloaina o le auala e feagai ai ma faalogona tigā, o se tomai aogā mo oe pe a avea ma tagata matua. Aiseā e lē aʻoaʻoina ai lenā tomai i le taimi lenei?
E te Ono Fiafia Foʻi
UA FESILI MAI TALAVOU
Pe e Mafai Ona Faalautele Atu Laʻu Faauōga?
E ono lelei le iai o ni uō toʻalaiti, ae e lē o taimi uma e aogā ai. Aiseā?
TALIINA O FESILI FAALE-TUSI PAIA
O le ā le Manatu o le Tusi Paia i Faauōga?
O uō lelei e iai taaʻiga lelei i isi ma e faamalosia e le isi uiga lelei o le isi. Ia filifili lelei au uō!
VITIŌ O ATA TUSI
O ai le Uō Moni?
E faigofie ona maua ni uō e faafoliga, ae e faapefea ona e maua se uō moni?
TALIINA O FESILI FAALE-TUSI PAIA
O le ā e Uiga i ai le Faamagalo Atu?
O loo i le Tusi Paia ni vala se lima e fesoasoani iā te oe e faamagalo ai se tasi.
