O loo e fiafia tele i sau faigāmālōlōga, ma e te manaʻo e faailoa atu i au uō! Ae e faapefea? Po o le a e

1.  (A) lafo atu i ai se postcard?

2.  (E) lafo i ai se imeli?

3.  (I) tuu ata i luga o le initaneti?

 A o pei o oe le matutua o mātua o ou mātua, e mautinoa lava e na o le “lafo atu o se postcard” le mea na mafai ona fai.

 A o pei o oe le matutua o ou mātua, atonu na mafai ona “lafo i ai se imeli.”

 I aso nei, o le toʻatele o talavou ua iai le faatagaga e latou te “tuuina ata i luga o le initaneti” e latou te faia lenā mea. Ae ā oe? Afai o lau tali foʻi lea, o le a fesoasoani lenei mataupu iā te oe e ʻalofia ai nisi o lamatiaga.

•  O ā aogā?

•  O ā lamatiaga?

•  Mea e mafai ona e faia

•  Tala a isi talavou

 E televave. “Pe afai e manaia saʻu malaga pe e matou te fiafia faatasi ma aʻu uō, o le taimi lava lenā ou te tuuina ai ata i luga o le initaneti.”​—Melanie.

 E faigofie. “E ese le faigofie ona matamata i ata fou o loo tuu e aʻu uō i luga o le initaneti, nai lo o le imeli ai po o a latou mea o fai.”​—Jordan.

 E fesootaʻi ai pea. “O nisi o aʻu uō ma aiga e mamao le mea e nonofo ai. A latou tuua i taimi uma ata i luga o le initaneti ma ou siakiina i taimi uma, e pei a o lea ou te feiloaʻi i ai i aso uma!”​—Karen.

 E mafai ona lamatia ai oe. Pe afai o lau meapuʻeata e mafai ona maua ai faamatalaga e iloa ai le nofoaga na puʻe ai se ata, o lona uiga, o ata uma e te tuuina i luga o le initaneti, e lē na o le ata ua e faailoa atu i isi, ae ua e faailoa atu ai foʻi ma le nofoaga o loo e i ai. Na lipotia mai e le upega tafaʻilagi a le Digital Trends, “O le tuuina i luga o le initaneti o ata ma vitiō e iai faamatalaga e iloa ai le nofoaga na puʻe ai, e mafai ai e tagata leaga ona latou faaaogāina polokalame faakomepiuta e suʻe ai le nofoaga tonu o loo e i ai.”

 O le mea moni, o isi tagata leaga e sili atu ona latou fia iloa le nofoaga e te lē o i ai. Na lipotia mai e le Digital Trends se mea na tupu, e toʻatolu tagata gāoi na gaoia fale e 18 i le taimi e lē o i ai tagata i o latou fale. Na faapefea ona latou iloa le taimi e leʻi i ai nisi i le fale? Na latou ō i luga o le initaneti ma mataʻi ai gaoioiga a tagata e ona fale, o se metotia e taʻua o le cybercasing. Na latou gaoia ai meatotino e silia ma le $100,000 (tālā Amerika) le tau.

 E te vaai ai i ni ata e lē talafeagai. O nisi tagata e lē matamumuli e tuu so o se mea i luga o le initaneti e vaai uma i ai le lalolagi. Na faapea mai se talavou e igoa iā Sarah: “E tutupu faafitauli ona o lou matamata i itulau a tagata e te lē masani ai. E tai pei o loo e fealuaʻi i se aai e te lē masani ai e aunoa ma se faafanua. E mautinoa lava e te oo ai i se nofoaga e te leʻi fia alu i ai.”

 E tele lou taimi e alu ai. Na faapea mai Yolanda o se teine talavou, “E faigofie ona fai ma ou masani le siakiina o ata fou ma faitau i faamatalaga a tagata, ma e iʻu ai ina e siakiina i sekone uma lau telefoni mo ni ata fou.”

 Na ioe se talavou e igoa iā Samantha i lea tulaga. Na ia fai mai, “E tatau ona ou pulea le taimi ou te faaaluina e matamata ai i ata i luga o le initaneti.” Na ia faapea atili mai, “E manaʻomia ai la e se tagata le pulea o ia lava, pe a faapea o le a fai sana itulau e tuu ai ata i luga o le initaneti.”

•   Ia maumauaʻi e ʻalofia ata ma faamatalaga lē talafeagai. Ua faapea mai le Tusi Paia: “Ou te lē tuu i oʻu luma se mea e lē aogā.”​—Salamo 101:3.

   “E masani ona ou siakiina ata e tuu i luga o le initaneti e aʻu uō, ma ou te lē toe faauō i ai pe a ou iloa ua lē talafeagai a latou ata.”​—Steven.

•   ʻAlofia le fesootaʻi ma tagata e lē tutusa tou tapulaa, auā e latou te faaleagaina ai au tapulaa tauamio. Ua faapea mai le Tusi Paia: “Aua neʻi faasesēina outou. O aumea leaga e faaleagaina ai mea lelei ua masani ai tagata.”​—1 Korinito 15:33.

   “Aua e te faauō i itulau e iai ata o aʻega ona e lauiloa. E masani ona e vaaia i inā upu masoā, o ata telenonoa, ma isi ata e lē talafeagai.”​—Jessica.

•   Ia faatapulaa le taimi e te siakiina ai ata, ma le taimi e te tuuina ai ata i luga o le initaneti. Ua faapea mai le Tusi Paia: “Ia outou matuā faautauta ina neʻi outou savavali e pei o ē e vālea, ae ia pei o ē e atamamai, ia outou faaaogā tatau le taimi.”​—Efeso 5:15, 16.

   “Ua ou lē toe faauō i tagata e ‘soona tuu ata’ i luga o le initaneti. O se faaaʻoaʻoga, o se tagata o loo i le matafaga, e na te puʻeina ma tuu i luga o le initaneti ata e 20 o se figota e tasi. Oka, e matuā telē a le taimi alu e matamata ai inā ata uma!”​—Rebekah.

•   Ia faamautinoa o ata e te tuuina i luga o le initaneti, e lē faailoa atu ai e te manaʻo ia uaʻi mai ai tagata tau lava o oe. Na faapea mai Paulo, le tusitala o le Tusi Paia: “Ou te fai atu ai iā te outou taʻitoʻatasi, ina ia aua neʻi faasili le manatu o se tasi iā te ia lava.” (Roma 12:3) Aua neʻi e manatu o le a ofo au uō i au ata, ma ata o mea o loo e faia.

   “O isi tagata, e lē uma le tuuina o o latou lava ata e latou te puʻeina, i luga o le initaneti. Afai e ta te uō, ua ou iloa ou foliga, ou te lē manaʻomia la le tau faamanatu mai!”​—Allison.