O le ā sou manatu?

•   Pe e iai se afāina o lou saʻili atu i fetu, tagata vavalo, po o nisi mea e fesootaʻi i faiga faataulāitu?

•   Pe o tala i faiga faataulāitu ua na o ni tala faafagogo​—o se tala faafaatusa i le va o le lelei ma le leaga​—pe o se mea e moni ma sili atu ona mataʻutia?

 O le a talanoaina i lenei mataupu le māfuaaga e mafai ona taaʻina ai oe e faiga faaagaga, ma le māfuaaga e ao ai ona e faaeteete.

•  O le ā le faatosinaga?

•  Aiseā e ao ai ona faaeteete?

•  O mea e mafai ona e faia

•  Tala a isi talavou

 E tele tupe ua maua e i latou e faia faafiafiaga mai le faaaogāina o vaaiga o faiga faataulāitu e avea o ni vaega autū i a latou ata tifaga, polokalame o le TV, taaloga vitiō, ma tusi. O le iʻuga, ua atiaʻe ai e le toʻatele o talavou le fiafia i mea e pei o le saʻili i fetu, temoni, tagata e mimitiina toto o isi tagata, ma faataulāitu. Aiseā? O māfuaaga e aofia ai le:

•   Fia iloa o se mea: E saʻili pe e iai moni ni agelu ma ni temoni

•   Popole: E taumafai e saʻili pe o le ā o le a tupu i le lumanaʻi

•   Fesootaʻiga: E taumafai e talanoa ma sē e pele ua maliu

 Atonu e lē sesē iā i latou na māfuaaga. Mo se faataʻitaʻiga, o se uiga masani le mafaufau i le lumanaʻi pe misia foʻi sē pele ua maliu. Ae e iai lamatiaga e manaʻomia ona e mataala i ai.

 O loo i le Tusi Paia le tele o lapataʻiga malolosi e faasaga i so o se mea e fesootaʻi ma faiga faaagaga. Mo se faaaʻoaʻoga, o loo taʻua ai:

 “Aua neʻi maua iā te oe . . . o sē e faia valovaloga faataulāitu, o sē e faia faiga faaagaga, po o se tasi e saʻili i ni faailoilo o mea o le a tutupu po o se faataulāitu, po o se tasi e na te faalauatau i isi, po o se tasi e alu atu i sē e saʻili i agaga, po o lē e vavalo i mea e tutupu i le lumanaʻi, po o se tasi e fesili atu i ē ua oti. E inosia e Ieova i latou uma e faia na mea.”​—Teuteronome 18:10-12.

 Aiseā e matuā taʻusalaina ai e le Tusi Paia faiga faaagaga?

•   O faiga faaagaga e uunaʻia ai fesootaʻiga ma temoni. Ua aʻoaʻoina i le Tusi Paia o nisi agelu na fouvale i le Atua ma avea ai i latou ma ona fili. (Kenese 6:2; Iuta 6) O nei agelu amioleaga, ia ua taʻua o temoni, ua latou faasesēina tagata e ala i faiga faaagaga, tagata vavalo, ma i latou e iloa mea e tutupu i le lumanaʻi ma ē saʻili i fetu. O le faia o ia mea ua avea ai i tatou ma uō a fili o le Atua.

•   O faiga faaagaga e faaauiluma ai le talitonuga sesē e iai tagata e mafai ona latou valoia le lumanaʻi. Peitaʻi, e na o le Atua lava e mafai ona fetalai: “O Lē ua taʻu mai talu mai le amataga le iʻuga, ma taʻu mai foʻi talu mai aso anamuā mea e leʻi faia.”​—Isaia 46:10; Iakopo 4:13, 14.

•   O faiga faaagaga e faaauiluma ai le talitonuga sesē e mafai ona fesootaʻi mai ē ua maliliu i ē o loo ola pea. Peitaʻi, ua faapea mai le Tusi Paia: “O ē ua oti, latou te lē iloa se mea . . . E leai se galuega, po o ni fuafuaga, po o le poto, po o le atamai i le Tuugamau.”​—Failauga 9:5, 10.

 Ona o na māfuaaga, e teena ai e Molimau a Ieova faiga e fesootaʻi atu i faiga faaagaga. E latou te ʻalofia foʻi faafiafiaga e faaalia mai ai ni tagata ua feoti ae toe feola mai o ni aitu, tagata e mimitiina toto o isi tagata ma ni vaaiga e faaaogā ai ni mana uigaese. Ua faapea mai se teine talavou e igoa iā Maria, “Afai e aofia ai so o se mea e fesootaʻi i faiga faaagaga, e lē tatau la ona ou matamata ai.” a

•   Ia e maumauaʻi ina “ia maua se lotofuatiaifo lelei” i luma o Ieova, e ala i le ʻalofia o so o se faiga po o faafiafiaga o loo aafia ai faiga faataulāitu.​—Galuega 24:16.

•   Ia tiaʻi ese so o sau meatotino e iai se fesootaʻiga ma faiga faataulāitu. Faitau le Galuega 19:19, 20, ma mātau le faaaʻoaʻoga lelei na faataatia e Kerisiano i le uluaʻi senituri i lenei vala.

 Manatua: Pe a e teena faiga faataulāitu ma faafiafiaga, e manino mai ai o loo e lagolagoina le itu a Ieova. Ma ua e faafiafia ai lona finagalo!​—Faataoto 27:11.