Pe afai e lē o pasi lau matematika, atonu e te mafaufau e tatau ona e toʻaga e fai au meaaʻoga. Pe afai e te lē lelei i taaloga, atonu e te mafaufau e tatau ona e toʻaga e toleni. Ae o le mea moni, atonu o le mea e manaʻomia ona e faia, o le lava o lau moe. Seʻi o tatou talanoaina ni māfuaaga e tāua ai ona faia faapea.

•  Aiseā e manaʻomia ai ona lava lau moe?

•  O ā mea e faafaigatā ai ona e moe?

•  E faapefea ona lava lau moe?

•  Tala a isi talavou

 Ua faapea mai tagata e iai tomai faapitoa, e manaʻomia e le toʻatele o talavou ona momoe mo le valu i le sefulu itula i pō taʻitasi. Aiseā e tāua ai ona lava lau moe?

•   E ala ai lou mafaufau. E tai pei le moe o se “meaʻai mo le mafaufau.” E mafai ona fesoasoani iā te oe ina ia lelei ai le auala e fai ai au meaaʻoga, lelei ai lau taalo, ma le auala e te foʻia ai faafitauli.

•   E faaleleia ai ou uiga. O le mea moni, o tagata e lē lava le mālōlō, e fesuisuiaʻi o latou uiga mai i lea taimi i lea taimi, e pei o le maitaita, faanoanoa, pe lotovaivai. E faigatā foʻi ona faifaimea faatasi ma isi.

•   E te ave ai ma le saogalemu le taavale. Na iloa mai i se suʻesuʻega sa faia i le Iunaite Setete, o avetaavale i le vā o le 16 ma le 24 tausaga le matutua, e matuā lagona le fia moe i le taimi e lavea ai le taavale nai lo o avetaavale e i le vā o le 40 ma le 59 tausaga.

•   E te ola mālōlōina ai. O le lava o le moe, e fesoasoani e faaleleia ma faatumauina ai pea le lelei o sela, alātoto, ma isi vaega o lou tino. E faaitiitia ai foʻi le avanoa e te maua ai i le tino puta, maʻi suka, ma le pē o le tino.

 E ui e iai aogā o le lava o le moe e pei ona taʻua muamua, ae e toʻatele talavou e lē o lava le moe. O se faataʻitaʻiga, ua faapea mai se talavou e 16 tausaga e igoa iā Elaine:

 “Na fesili mai le matou faiaʻoga po o ā taimi e masani ona matou momoe ai. O le toʻatele e fai atu po o le 2 i le vaveao, ae o isi o le 5 i le vaveao. E na o le toʻatasi le tamaitiiti na fai atu e moe i le 9:30 i le pō.”

 Aiseā e faigatā ai i nisi ona lava le moe?

 Tafaoga ma evaevaga. “E faigofie tele ona ou ala umi i le pō, aemaise lava pe a matou tafafao ma aʻu uō.”—Pamela.

 Tele mea e fai. “Ou te fiafia e moe, ae a tele loa mea e fai, e faigatā ona lava saʻu moe.”—Ana.

 Masini faaonapōnei. “Ou te fiu e taumafai e moe, ae e faigatā ona e tele ina ou tago siaki laʻu telefoni.”—Anisa.

•   Ia fesili ifo pe aiseā e tāua ai ona lava lau moe. Ua faapea mai le Tusi Paia: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.” (Failauga 4:6) E manaʻomia ona lava lau moe. Auā a leai, o le a lē lelei le auala e faia ai au galuega ma e lē maua ai le fiafia.

•   Ia iloa le māfuaaga e lē o lava ai lau moe. O se faataʻitaʻiga, pe e umi ona tou eva ma au uō? Po ua tele naʻuā au meaaʻoga ma feʻau e fai? Pe e umi ona e ala ona o le siakiina o lau telefoni ma faigatā ai ona e moe?

 Ia mafaufau i ai: E ui e tele taumafaiga e manaʻomia ina ia e manumalo ai mai i lenā luʻi, ae o le a sili atu aogā e te maua mai ai. Ua faapea mai le Faataoto 21:5: “O fuafuaga a le tagata toʻaga e manuia ai lava o ia.”

 Atonu o le auala e fetaui i le isi e lē fetaui i le isi. O se faataʻitaʻiga, e faapea mai nisi e lelei la latou moe i le pō, pe a fai sina moeiini i se taimi o le aso. Ae faapea mai isi, e lē aogā lenā auala iā i latou. O lea, vaai po o lē fea e fetaui ma oe. O nisi nei o fautuaga e mafai ona fesoasoani iā te oe:

•   Ia faia se gaoioiga e fesoasoani iā te oe ina ia vave ai ona e moe. O lou faia o lenā mea a o leʻi oo i le taimi e te moe ai, o le a vave ai ona e fia moe.

   “O le vave faia o feʻau ma isi tiute tauave, o le a e lē popole ai i na mea pe a oo i le taimi e te moe ai.”—Maria.

•   Ia tausolomua. Nai lo o le pulea o oe i au mea e fai, ae ia e faatulaga lelei mea e te faia ina ia lava ai lau moe.

   “E manaʻomia ona valu itula ou te moe ai i pō taʻitasi. O lea, pe afai ou te vave ala nai lo o le taimi e masani ona ou ala ai, ona ou tau lea i tua o le taimi, ina ia iloa ai po o le ā le taimi e manaʻomia ona ou moe ai.”—Vincent.

•   Ia taumafai e moe i se taimi patino. E lē mafai ona e iloa le aogā o le moe i se taimi patino, seʻi vaganā ua e taumafai e faamasani i ai. Ua fautuaina e tagata atamamai, ina ia taumafai e moe ma ala i se taimi patino i aso taʻitasi. Ia faataʻitaʻi lenā mea mo se masina e tasi, ma o le a e lagona le faafouina o lou malosi.

   “Pe afai e te moe i se taimi patino i pō taʻitasi, e oo ane i le aso e sosoo ai e te lagona le faafouina o lou mafaufau. O le a fesoasoani iā te oe e faia ai ma le tiotio so o se galuega.”—Jared.

•   Ia paleni i a outou evaevaga ma isi. Ua faapea mai le Tusi Paia ina ia “pulea [a tatou] amio,” ma e aofia ai mea e te faia i taimi paganoa.—1 Timoteo 3:2, 11.

   “Ua ou iloa faaitiitia le taimi e faaalu mo evaevaga i afiafi. Pe a ou lē faia lenā mea, o le a aafia ai le auala ou te faia ai mea, e pei o le lē lava ai o laʻu moe.”—Rebecca.

•   Ia ki lau telefoni i se tulaga e lē faalavelavea ai a o e moe. Pe a itiiti ane i le itula a o leʻi oo i le taimi e te moe ai, ʻalofia le toe faaaogā o le Initaneti pe lafo ni feʻau tusitusia i au uō i le leva o le pō. O le mea moni, ua lapataʻi mai nisi tagata atamamai, e faafaigatā ona e moe ona o le malamalama mai i se telefoni, televise, po o se tablet.

   “E faatalitalia e tagata e mafai ona e ala i so o se taimi. Peitaʻi, ina ia lava lelei lau mālōlō, e manaʻomia ona tapē lau telefoni.”—Julissa.