O le toʻatele o tamaiti aʻoga i aso nei ua aʻoʻoga mai i le fale. Pe afai o loo e iai i lenā tulaga, e faapefea ona e maua ai aogā? O nisi nei o fautuaga. a

•  Ni fautuaga se lima e fesoasoani iā te oe e maua ai aogā

•  Tala a isi talavou

•   Ia fai se faasologa. Ia taumafai e tausisi i se faasologa masani e pei ona e faia pe a e alu i le aʻoga. Ia faatulaga se taimi patino mo meaaʻoga, feʻau ma isi mea tāua. E mafai ona toe fetuunaʻi lau faasologa pe a manaʻomia.

   Mataupu silisili faale-Tusi Paia: ‘Ia faia mea uma i se tulaga maopoopo.’—1 Korinito 14:40.

   “Ia faatulaga lou aso e pei lava o loo e alu i le aʻoga. E iai taimi patino e manaʻomia ona fai ai se mea.”—Katie.

   Ia manatunatu i ai: Aiseā o se faiga atamai ai le tusi o lau faasologa ma faapipii i se mea e faigofie ona e iloa?

•   Ia atiaʻe le amio pulea. Ina ia avea o se tagata taʻumatuaina e iai taimi e tatau ai ona fai galuega e manaʻomia ona fai, e tusa lava pe e te lē manaʻo e fai. Aua le faimeatuu!

   Mataupu silisili faale-Tusi Paia: “Aua le faifaiaga i a outou galuega.”—Roma 12:11.

   “O le luʻi pito sili ona faigatā o le pulea o oe lava. E faigofie ona fai faamolemolega ma manatu ai, ‘Seʻi uma fai laʻu meaaʻoga.’ Ae uma ane ua lē faia le meaaʻoga ma ua tele foʻi mea e manaʻomia ona fai.”—Alexandra.

   Ia manatunatu i ai: E faapefea ona atiaʻe le pulea o oe lava i le faia o au meaaʻoga i se nofoaga ma se taimi patino i aso taʻitasi?

•   Ia iai se nofoaga e fai ai au meaaʻoga. Ia faamautinoa ua iai uma mea e te manaʻomia. Ia toʻafilemu lenā nofoaga, ae e lē toʻafilemu tele lea e iʻu ai ina e moe. Pe afai e lē mafai ona maua se nofoaga patino e fai ai au meaaʻoga atonu e mafai ona faaaogā le laulauʻai po o se potu e fai ai au meaaʻoga i le aso.

   Mataupu silisili faale-Tusi Paia: “O fuafuaga a le tagata toʻaga e manuia ai o ia.”—Faataoto 21:5.

   “Ia tuu ese meataalo, taaloga vitiō, se meafaifaaili ma faaleo laʻitiiti lau telefoni. E tāua tele le leai o se mea e faalavelavea ai.”—Elizabeth.

   Ia manatunatu i ai: O ā ni fetuunaʻiga e mafai ona e faia i le nofoaga e fai ai au meaaʻoga, ina ia faigofie ai ona e uaʻi atoatoa atu i au meaaʻoga?

•   Ia uaʻi atu. Ia uaʻi atu i le mea o loo e faia, ma aua le faia isi mea i le taimi lava lenā e tasi. Pe a e taumafai e faia isi mea i le taimi e tasi, e ono tele ai mea sesē e te faia ma umi ai le taimi e tau faauma ai.

   Mataupu silisili faale-Tusi Paia: “Ia outou faaaogā tatau le taimi.”—Efeso 5:16.

   “Sa faigatā ona ou uaʻi atu pe a iai laʻu telefoni. Na maʻimau ai le taimi i le faia o mea e lē aogā.”—Olivia.

   Ia manatunatu i ai: Pe e mafai ona faateleina le taimi e te uaʻi atu ai i se galuega se tasi?

•   Ia fai ma mālōlō. Ia fai sina savali, tiʻetiʻe i lau uila vilivae, pe faamalositino foʻi. E ono faafouina foʻi oe i le faia o se mea e te fiafia ai. Ua faapea mai le tusi School Power, “Ia fai muamua au meaaʻoga. O le a sili atu ona e fiafia i lou taimi avanoa pe afai ua uma mea e manaʻomia ona fai.”

   Mataupu silisili faale-Tusi Paia: “E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.”—Failauga 4:6.

   “E masani ona aʻoaʻoina le tāina o se meafaifaaili po o le tusiata i le aʻoga. Na ou misia na mea ina ua lē mafai ona ou toe alu i le aʻoga. O se mea lelei la le faia o nisi mea e te fiafia i ai e faaopoopo atu i au meaaʻoga.”—Taylor.

   Ia manatunatu i ai: O ā ituaiga o mālōlōga e fesoasoani iā te oe e toe faafouina ai le malosi e fai ai au meaaʻoga?