Mgbavolɛ nee mbɛlɛra dɔɔnwo ɛndwenle kɛzi bɛnea wuliravolɛ la anwo. Bɛsuzu kɛ, ɔbahyɛ na bɛ awovolɛ anwo ado bɛ.

Noko saa wɔ papa anzɛɛ wɔ mame anwo to ye wɔ mekɛ mɔɔ ɛtɛyɛle kpanyinli la ɛ? Suzu ngakula mbɛlɛra nwiɔ mɔɔ bɛyiale ngyegyelɛ ɛhye bie la anwo.

•  Emmaline anloa nu edwɛkɛ

•  Emily anloa nu edwɛkɛ

Me mame lɛ ewule bie mɔɔ ɛnlɛ ye ayile mɔɔ maa ye mbowule nee ye ndinli nu yɛɛ ɔ nwo nane fofo ye a. (Bɛfɛlɛ ewule ɛhye Ehlers-Danlos syndrome anzɛɛ EDS)

Ewule ɛhye ɛnlɛ ye ayile yɛɛ me mame ewule ne ɛmaa ɔ nwo ɛhyele ye too ɛvolɛ bulu. Nɔhalɛ nu, ɔdwu mekɛ ne bie a ye mogya zo te kpalɛ mɔɔ asɛɛ yewu a yɛɛ ɔyɛ a ewule ne nyane ne ati ɔ kunlu a anrɛɛ ɔnde aze.

Yɛle Gyihova Alasevolɛ yɛɛ asafo ne anu amra ɛkyekye yɛ rɛle kpalɛ! Kɛ neazo la, kakula raalɛ bie mɔɔ me nee ye sɛ atipɛne la vale kaade bie rɛlɛle yɛ abusua ne kɛ ɛkulo yɛ edwɛkɛ kpalɛ. Eza ɔhanle kɛ mekɛ biala mɔɔ yɛbahyia ye moalɛ la ɔbaboa yɛ. Me nye die kɛ melɛ agɔnwolɛ zɛhae a!

Baebolo ne ɛboa me kpole kpalɛ. Kɛ neazo la, ngɛlɛlera mɔɔ me nye die nwo kpalɛ la ko la a le Edwɛndolɛ 34:18 mɔɔ ka kɛ: ‘Gyihova bikye mɔɔ nyane ɛha ye la.’ Bieko noko a le Hibuluma 13:6 mɔɔ se: “Awulae le me boavolɛ, menrɛzulo ɛhwee” la.

Me nwu ye kɛ ndelebɛbo wɔ ngɛlɛlera ne mɔɔ li awieleɛ la anu. Debie mɔɔ ka me ɛzulolɛ la a le kɛ me mame bawu. Me kulo ye edwɛkɛ kpalɛ yɛɛ me nye die kɛ dahuu me nee ye de a. Baebolo ngyɛnu ɛhye maa menwu kɛ mebahola meanyia anwodozo wɔ kenle bie ɔnva nwo edwɛkɛ biala mɔɔ ɔbazi la.

Noko eza mesulo debie bieko. Saa awie lɛ EDS ewule ne bie na ɔwo a, ɔ ra ne banyia bie. Me mame nyianle ye vile ye mame ɛkɛ yɛɛ ɔdaye noko yeva yewo me. Yemɔti melɛ EDS ewule ne bie. Noko Hibuluma 13:6 maa me anwodozo kɛ Gyihova bayɛ “me boavolɛ” wɔ ɛhye anwo.

Noko akee, memaa me nye sɔ ɛbɛlabɔlɛ mɔɔ kɛkala me wɔ nu la yɛɛ mendwenle mɔɔ bazi kenle bie la anwo. Saa mefa mɔɔ me mame ɛngola ye yɛ la metoto mɔɔ ɛnee ɔkola ɔyɛ la anwo a, ɔbamaa meadwenledwenle. Saa yɛfa dahuu ngoane nwo anyelazo mɔɔ ewule ɛnle nu la yɛtoto ngyegyelɛ mɔɔ kɛkala yɛyia ye la anwo a, Baebolo ne ka kɛ ɔle “nyane sikalɛ ekyi” bie ala.​—2 Kɔlentema 4:17; Yekile 21:1-4.

Dwenle ɛhye anwo: Nzɔne a boale Emmaline maanle ɔnyianle adwenle kpalɛ a? Kɛ ɔkɛyɛ na ɛlɛyia ngyegyelɛ a wɔanyia adwenle kpalɛ ɛ?

Mekɛ mɔɔ ɛnee mewɔ sukunwiɔ ne anu la yɛɛ me papa nyianle adwenle nu ewule a. Ɛnee ɔle kɛ asɛɛ tɛ me papa mɔɔ meze ye dɛba la ɔ na emomu awie gyɛne ɔ. Ɔvi zɔhane mekɛ ne, dahuu me papa arɛle bɔ, ɔsulo debie, yɛɛ adwenleadwenle ɛdɔ ɔ nwo. Ɛhye ɛhɔ zo too ɛvolɛ 15. Ɔyɛ nyane kɛ dahuu ɔrɛle bɔ ɔnva nwo kɛ ɔnlɛ ngyinlazo biala a!

Yɛle Gyihova Alasevolɛ yɛɛ yɛ asafo ne anu amra ɛboa yɛ kpalɛ. Yɛ mediema diedima lɛ atiakunlukɛnlɛma, bɛte edwɛkɛ bo yɛɛ bɛmmaa me papa ɛnde nganeɛ kɛ ɔ nwo ɛnlɛ nvasoɛ wɔ asafo ne anu. Saa menwu kɛzi me papa ɛlɛgyinla ngyegyelɛ ɛhye anloa la a, ɔmaa mekulo ye edwɛkɛ kpalɛ.

Me nwo ɛlɛdɔ mekɛ mɔɔ ɛnee adwenleadwenle ɛtɛtɔle me papa anwo, ɔnde nyane na ɔ nye die la. Ɔyɛ me nyane kɛ dahuu ɔwɔ kɛ ɔ nee adwenle nu ewule ɛhye mɔɔ le ye kpɔvolɛ la ko a.

Noko akee, me papa bɔ mɔdenle ɛsesebɛ kɛ ɔbanyia adwenle kpalɛ dahuu. Saa ewule ne anu yɛ se bɔbɔ a, ɔyɛ ye adwenle kɛ ɔbagenga Baebolo ne foa bie alehyenlɛ biala. Ɛhye maa ye anwosesebɛ kpole. Mekɛ ekyii zɔhane te ye adwenleadwenle ne azo. Me nye die me papa anwo wɔ mekɛ zɛhae mɔ anu.

Me nye die ngɛlɛlera mɔɔ wɔ Nihɛmaya 8:​10 mɔɔ ka kɛ: ‘Fɛlɛkolilɛ ne mɔɔ Gyihova fa maa la le bɛ anwosesebɛ’ la anwo. Ɛhye le nɔhalɛ bɔkɔɔ. Saa mekɔ debiezukoalɛ na mefa me nwo mewula nu a, ɔmaa me ahonle di fɛlɛko na me rɛle fi me ngyegyelɛ ne mɔ. Ɛhye maa me nye die kenle ne anu amuala. Me papa neazo ne ɛmaa menwu ye kɛ ɔnva nwo ngyegyelɛ biala mɔɔ ɛbayia ye la, Gyihova baboa wɔ dahuu.

Dwenle ɛhye anwo: Kɛzi Emily ɛboa ye papa wɔ ye anwodolɛ mekɛ nu ɛ? Kɛzi ɛbaboa awie mɔɔ ɛnyia adwenle nu ngyegyelɛ la ɛ?