Aneɛ fofolɛ ɛzukoalɛ bahola azɔ bɛnwozohomolɛ nee abotane mɔɔ ɛlɛ la anlea. Asoo ɔhyia kɛ ɛsukoa aneɛ fofolɛ ɔ? Mgbavolɛ nee mbɛlɛra dɔɔnwo baha kɛ ɛhɛe! Edwɛkɛ ɛhye bahilehile deɛmɔti bɛyɛ zɔ la anu.

•  Duzu ati a ɔwɔ kɛ ɛsukoa a?

•  Ngyegyelɛ boni mɔ a ɛbayia bɛ a?

•  Nvasoɛ boni mɔ a ɛbanyia a?

•  Mɔɔ ɛ tipɛnema ka la

Menli dɔɔnwo sukoa aneɛ fofolɛ ɔluakɛ ɔboka ninyɛne mɔɔ ɔwɔ kɛ bɛsukoa ye wɔ sukulu la anwo. Debie bie ati a bie mɔ noko sukoa a. Kɛ neazo la:

• Bɛlɛra bie mɔɔ bɛfɛlɛ ye Anna mɔɔ ɔwɔ Australia la zile kpɔkɛ kɛ ɔbazukoa ye mame aneɛ Latvian. Ɔka kɛ, “Yɛ abusua ne ɛyɛ ngyehyɛleɛ kɛ yɛkɔ Latvia, na mekpondɛ kɛ yɛkɔ a me nee me mbusuafoɔ mɔɔ wɔ ɛkɛ ne la di adwelie.”

• Gina, Gyihova Dasevolɛ bie mɔɔ ɔwɔ United States la zukoale America Mumule Aneɛ (ASL) na ɔdule ɔhɔle Belize amaa yeadɛlɛ ye ɛzonlenlɛ gyima ne anu. Ɔka kɛ, “Menli ekyi bie ala a mumulema kola nee bɛ tendɛ a. Saa meka mekile menli kɛ menzukoale ASL ne amaa meahola meahilehile bɛ Baebolo ne a, bɛ nye die kpalɛ!”

Asoo ɛze? Baebolo ne ka kɛ bɛbabɔ Nyamenle Belemgbunlililɛ ne anwo edwɛkpa ne nolo bɛahile “maanle nee mbusua nee aneɛ kɔsɔɔti.” (Yekile 14:6) Gyihova Alasevolɛ mgbavolɛ nee mbɛlɛra dɔɔnwo ɛzukoa aneɛ gyɛne amaa bahola bɛayɛ dɔɔnwo wɔ daselɛlilɛ gyima ne anu wɔ bɛ sua zo anzɛɛ ɛleka fofolɛ.

Ɔnla aze kɛ ɛbazukoa aneɛ fofolɛ. Bɛlɛra bie mɔɔ bɛfɛlɛ ye Corrina la ka kɛ, “Ɛnee meze kɛ edwɛkɛ agbɔkɛ bie ala a mebazukoa a, noko menwunle ye kɛ ɔwɔ kɛ mesukoa amaamuo fofolɛ na mesuzu ninyɛne nwo wɔ adenle fofolɛ zo. Ɔdie mekɛ na wɔazukoa aneɛ fofolɛ.”

Eza ɔwɔ kɛ ɛbɛlɛ ɛ nwo aze. Kpavolɛ bie mɔɔ bɛfɛlɛ ye James mɔɔ zukoale Spanish la ka kɛ, “Ɔwɔ kɛ ɛsukoa kɛ ɛbazele ɛ nwo ɔluakɛ ɛbayɛ nvonleɛ dɔɔnwo. Noko ɔboka debiezukoalɛ nwo.”

Nɔhalɛ edwɛkɛ: Saa ɛkola ɛgyinla ngyegyelɛ nee nvonleɛ mɔɔ bamaa ɛ nyunlu agua aze la anloa a​—ɛbahola wɔazukoa aneɛ fofolɛ ne kpalɛ.

Nzuzulɛ: Mmamaa ɛ sa nu to saa ɛnwu ye kɛ awie mɔ ɛlɛnyia anyuhɔlɛ adɛla wɔ a. Baebolo ne ka kɛ: “Bɛmaa awie biala ɛnleɛnlea ɔdaye ye nyɛleɛ nu, na yeanyia debie yeava yeadu ɔ nwo, na ɔmmafa ɔ nwo ɔtoto awie mɔ anwo.”​—Galeehyeama 6:4.

Nvasoɛ mɔɔ ɛbanyia ye wɔ aneɛ fofolɛ ɛzukoalɛ zo la zonle. Kɛ neazo la, bɛlɛra bie mɔɔ bɛfɛlɛ ye Olivia la ka kɛ, “Saa ɛsukoa aneɛ fofolɛ a, ɔmaa ɛbikye menli dɔɔnwo na ɛnyia agɔnwolɛma fofolɛ.”

Bɛlɛra bie mɔɔ bɛfɛlɛ ye Mary la ɛnwu kɛ aneɛ fofolɛ ɛzukoalɛ ɛmaa yenyia anwodozo. Ɔka kɛ, “Ɔyɛ se kɛ mebava debie bie mɔɔ meyɛ la meadu me nwo, noko kɛkala mɔɔ melɛsukoa aneɛ fofolɛ la, saa mesukoa edwɛkɛkpɔkɛ ko biala a me nye die. Ɔmaa menyia ahomeka kpole.”

Gina, mɔɔ yɛlimoa yɛha ɔ nwo edwɛkɛ la ɛnwu ye kɛ mumule aneɛ ne mɔɔ ɔvale ɔhilehilele awie mɔ Baebolo ne la ɛmaa ɔ nye ɛlie ye ɛzonlenlɛ gyima ne anwo. Ɔka kɛ, “Nyilalɛ mɔɔ tɛla biala la a le kɛ mebanwu kɛ awie mɔ anye ɛlie ɔluakɛ me nee bɛ ɛlɛka bɛ aneɛ la ati.”

Nɔhalɛ edwɛkɛ: Aneɛ fofolɛ mɔɔ ɛbazukoa la bamaa wɔanyia agɔnwolɛma fofolɛ, wɔanyia anwodozo na wɔ ɛzonlenlɛ gyima ne anyia anyuhɔlɛ. Ɔle adenle titili ko mɔɔ yɛdua zo yɛka edwɛkpa ne yɛkile “maanle maanle nee mbusua nee menli nee aneɛ ngakyile” a.​—Yekile 7:9.