Ɔyɛ se kɛ ɛbali sua nu mɛla bie azo ɔ? Edwɛkɛ ɛhye nee gyimayɛlɛ kɛlata mɔɔ boka nwo la baboa wɔ amaa ɛ nee wɔ awovolɛ aha nwolɛ edwɛkɛ.

•  Nyia adwenle kpalɛ

•  Di nwolɛ gyima kpalɛ

•  Mɔɔ ɛ tipɛnema ka la

Adalɛ edwɛkɛ: Saa ɛfi sua nu a, mɛla biala ɛnrɛkyekye wɔ bieko.

Nɔhalɛ edwɛkɛ: Saa ɛfi sua nu bɔbɔ a, ɛbahɔ zo wɔali mɛla zo. Bie a ɛbali mɛla mɔɔ wɔ gyimamenle, wɔ suamenle anzɛɛ arane ne bayɛ la azo. Danielle mɔɔ ɛnyia ɛvolɛ 19 la ka kɛ, “Menwu ye kɛ menli mɔɔ bɛnli mɛla zo wɔ sua nu anwo kyele bɛ kpalɛ wɔ mekɛ mɔɔ bɛbade bɛ nwo la.

Baebolo ne ka kɛ: “Bɛyɛ tieyɛ bɛmaa arane nee tumivolɛma.” (Taetɛse 3:1) Saa ɛdi mɛla mɔɔ wɔ awovolɛ ɛhyehyɛ wɔ sua nu la azo a, ɔbatete wɔ yeamaa wɔali mɛla biala azo wɔ mekɛ mɔɔ ɛbayɛ kpanyinli la.

Mɔɔ ɛbahola wɔayɛ: Fa wɔ adwenle sie nvasoɛ mɔɔ wɔ mɛla ne azo la azo. Kpavolɛ bie mɔɔ bɛfɛlɛ ye Jeremy la ka kɛ, “Mɛla mɔɔ me awovolɛ hyehyɛle la boale me maanle menwunle kɛzi mebakpa agɔnwolɛ na meanlea me mekɛ zo boɛ la. Eza ɛnee mɛla na ɛmmaa menzɛkye mekɛ dɔɔnwo wɔ TV nee vidio games nwo amaa meanyia mekɛ meayɛ ninyɛne mɔɔ anwo hyia la​—me nye tɛdie ninyɛne ɛhye mɔ anwo.”

Na saa ɛnnwu nvasoɛ mɔɔ wɔ mɛla bie azo ɛ? Kɛ neazo la, bɛlɛra bie mɔɔ bɛfɛlɛ ye Tamara la ka kɛ: “Me awovolɛ maanle mendule adenle mengɔle maanle gyɛne zo, noko membale sua nu la bɛammaa meangɔ sua bie mɔɔ ye tendenle le mitini 20 pɛ la azo!”

Saa ɛwɔ tɛnlabelɛ ɛhye bie anu a, nvonleɛ wɔ nwo kɛ ɛ nee wɔ awovolɛ badendɛ ɔ? Kyɛkyɛ! Mɔɔ baboa la a le kɛ ɛbanwu mekɛ nee kɛzi ɔwɔ kɛ ɛ nee bɛ ka nwolɛ edwɛkɛ la.

Mekɛ. Bɛlɛra bie mɔɔ bɛfɛlɛ ye Amanda la ka kɛ, “Saa ɛyɛ tieyɛ na ɛmaa wɔ awovolɛ nyia wɔ nu anwodozo a yɛɛ ɛbahola ɛ nee bɛ aha mɛla bie anwo edwɛkɛ a.

Kakula raalɛ bie mɔɔ bɛfɛlɛ ye Daria la nee ye yɛ adwenle. Ɔka kɛ, “Mekɛ mɔɔ me mame nwunle kɛ meyɛ tieyɛ memaa ye la yɛɛ ɔliele ɔdole nu kɛ ɔbahakyi mɛla ne a.” Kakye kɛ mɔɔ ɛbayɛ la a bamaa banyia wɔ nu anwodozo a na tɛ mɔɔ ɛbaha la.

Baebolo ne ka kɛ: “Di ɛ ze mɛla zo, yɛɛ mmamaa ɛ rɛle fi ɛ nli ngilehilelɛ.” (Mrɛlɛbulɛ 6:​20) Ɛdi folɛdulɛ ɛhye azo a, ɛbamaa wɔ awovolɛ anyia wɔ nu anwodozo na ɔnrɛyɛ se kɛ ɛ nee bɛ badendɛ.

Kɛzi. Kpavolɛ bie mɔɔ bɛfɛlɛ ye Steven la ka kɛ, “Saa ɛbu wɔ awovolɛ na ɛtendɛ bɛtɛɛ ɛkile bɛ a ɔmaa ɛkola ɛ nee bɛ tendɛ tɛla kɛ ɛbadeɛdea nu la.”

Daria mɔɔ yɛlimoa yɛha ɔ nwo edwɛkɛ la nee ye yɛ adwenle. Ɔka kɛ, “Saa me nee me mame su kpolera a, nvasoɛ biala ɛmba zo. Nɔhalɛ nu, yemɔ bɔbɔ a maa ɔmia mɛla ne anu a.”

Baebolo ne ka kɛ: “Koasea fa ɛya a, ɔye ɔkile, na nrɛlɛbɛvolɛ fa ɛya a, ɔkomo ɔ nwo zo.” (Mrɛlɛbulɛ 29:11) Saa ɛnyia bɛnwozohomolɛ a, ɔbaboa wɔ kpole kpalɛ wɔ sua nu, sukulu nu, gyima nu nee ɛleka gyɛne.

Mɔɔ ɛbahola wɔayɛ: Dwenle kolaa na wɔadendɛ. Ɛyavalɛ bahola azɛkye anwodozo mɔɔ bɛlɛ ye wɔ wɔ nu la. Ɔnyɛ nwanwane kɛ Baebolo ne ka kɛ “sonla mɔɔ ɔkyɛ na yeava ɛya la ndelebɛbo le kpole.”​—Mrɛlɛbulɛ 14:29.

Mɔɔ baboa: Dua gyimayɛlɛ kɛlata ne mɔɔ boka nwo la azo suzu mɛla ne anwo, na saa ɔkɛyɛ boɛ a, ɛ nee wɔ awovolɛ ɛha nwolɛ edwɛkɛ.