Okubikkulirwa 3:1-22
3 “Malayika ow’omu kibiina ky’e Saadi muwandiikire nti: Oyo alina emyoyo gya Katonda omusanvu+ n’emmunyeenye omusanvu agamba bw’ati:+ ‘Mmanyi ebikolwa byo, nti omanyiddwa nti oli mulamu naye oli mufu.+
2 Tunula,+ era onyweze ebintu ebisigadde ebibadde bigenda okufa, kubanga nkizudde nti tewamaliriza mulimu Katonda wange gw’ayagala okole.
3 N’olwekyo, weeyongere okulowooza ku* ekyo kye wafuna ne kye wawulira, okikuumenga era weenenye.+ Bw’otazuukuka nja kujja ng’omubbi,+ era tojja kumanya kiseera kye nnajjiramu gy’oli.+
4 “‘Naye olinayo abantu batonotono* mu Saadi abataayonoona byambalo byabwe,+ era balitambula nange nga bambadde ebyambalo ebyeru+ kubanga ekyo kibagwanira.
5 Oyo awangula+ alyambazibwa ebyambalo ebyeru;+ era erinnya lye siririggya* mu kitabo eky’obulamu,+ naye ndyatula erinnya lye mu maaso ga Kitange ne mu maaso ga bamalayika be.+
6 Oyo alina okutu awulire omwoyo kye gugamba ebibiina.’
7 “Malayika ow’omu kibiina ky’e Firaderufiya muwandiikire nti: Omutukuvu+ era ow’amazima,+ alina ekisumuluzo kya Dawudi,+ aggulawo ne wataba ayinza kuggalawo era aggalawo ne wataba ayinza kuggulawo, agamba bw’ati:
8 ‘Mmanyi ebikolwa byo—laba! nkugguliddewo oluggi+ omuntu yenna lw’atayinza kuggalawo. Era nkimanyi nti olina amaanyi matono, era wanywerera ku kigambo kyange era wali mwesigwa eri erinnya lyange.
9 Laba! abo abava mu kkuŋŋaaniro lya Sitaani abeeyita Abayudaaya so nga si Bayudaaya+ naye nga balimba,—laba ndibaleeta ne bavunnama mu maaso g’ebigere byo era ndibasobozesa okukimanya nti nkwagala.
10 Olw’okuba wakuuma ekigambo ekikwata ku bugumiikiriza bwange,*+ nange ndikukuuma mu kiseera eky’okugezesebwa+ ekijja okutuuka ku nsi yonna, okugezesa abo abagibeerako.
11 Nzija mangu.+ Nyweza ky’olina waleme kubaawo n’omu atwala engule yo.+
12 “‘Oyo awangula—ndimufuula empagi mu yeekaalu ya Katonda wange era taligifulumamu nate, era ndimuwandiikako erinnya lya Katonda wange+ n’erinnya ly’ekibuga kya Katonda wange, Yerusaalemi Ekiggya+ ekikka okuva mu ggulu ewa Katonda wange, n’erinnya lyange eppya.+
13 Oyo alina okutu awulire omwoyo kye gugamba ebibiina.’
14 “Malayika ow’omu kibiina ky’e Lawodikiya+ muwandiikire nti: Oyo ayitibwa Amiina,+ omujulirwa+ omwesigwa era ow’amazima,+ omubereberye w’ebitonde bya Katonda, agamba bw’ati:+
15 ‘Mmanyi ebikolwa byo, nti tonnyogoga era toyokya. Waakiri wandibadde onnyogoga oba ng’oyokya.
16 N’olwekyo, olw’okuba oli wa kibuguumirize+ nga toyokya era nga tonnyogoga,+ ŋŋenda kukusesema.
17 Kubanga ogamba nti: “Ndi mugagga,+ nfunye eby’obugagga era seetaaga kintu kyonna,” naye tokimanyi nti oli munaku, asaasirwa, omwavu, omuzibe w’amaaso, era ali obwereere.
18 Nkuwa amagezi onguleko zzaabu alongooseddwa mu muliro ofuuke mugagga, era onguleko n’ebyambalo ebyeru obyambale abalala baleme kukulaba nti oli bukunya,+ n’oswala, era onguleko n’eddagala ly’okuteeka ku maaso+ osobole okulaba.+
19 “‘Abo bonna be njagala mbanenya era mbakangavvula.+ N’olwekyo, beera munyiikivu era weenenye.+
20 Laba! Nnyimiridde ku luggi nkonkona. Omuntu yenna bw’awulira eddoboozi lyange n’aggulawo, nja kuyingira mu nnyumba ye ndye naye eky’ekiro era naye akirye nange.
21 Oyo awangula+ ndimukkiriza okutuula nange ku ntebe yange ey’obwakabaka,+ nga nange bwe nnawangula ne ntuula wamu+ ne Kitange ku ntebe ye ey’obwakabaka.
22 Oyo alina okutu awulire omwoyo kye gugamba ebibiina.’”
Obugambo Obuli Wansi
^ Oba, “jjukira.”
^ Obut., “amannya matonotono.”
^ Oba, “siririsangula.”
^ Era kiyinza okuvvuunulwa, “wagoberera ekyokulabirako kyange eky’obugumiikiriza.”
