Génesis 7:1-24
7 Ka tsʼoʼokeʼ Jéeobaeʼ tu yaʼalaj tiʼ Noé: «Ooken teʼ arcaoʼ, teech yéetel le máaxoʼob yanoʼob ta wotochoʼ, tumen tiʼ tuláakal le máakoʼob kuxaʼanoʼob bejlaʼoʼ teech beetik baʼax maʼalob tin táan.+
2 Tiʼ cada clase baʼalcheʼ limpio tin táaneʼ unaj a woksik siete u túulaliʼ,*+ u xiibil bey xan u x-chʼuupil. Yéetel tiʼ cada clase baʼalcheʼ maʼ limpio tin táaneʼ chéen kaʼatúul unaj a woksikiʼ, u xiibil yéetel u x-chʼuupil.
3 Tiʼ cada clase baʼalcheʼ ku xikʼnal xaneʼ unaj a woksik siete u túulaliʼ,* u xiibil yéetel u x-chʼuupil, utiaʼal maʼ u saʼatal le clase baʼalcheʼ teʼ luʼumoʼ.+
4 Tumen kéen máanak siete díaseʼ yaan in beetik u kʼáaxal jaʼ+ durante 40 días, bul kʼiin yéetel bul áakʼab,+ yéetel yaan in xuʼulsik tiʼ tuláakal baʼal kuxaʼan in beetmaj teʼ luʼumoʼ».+
5 Noé túuneʼ tu beetaj tuláakal le baʼax aʼalaʼabtiʼ tumen Jéeobaoʼ.
6 Noéeʼ 600 años yaantiʼ le ka taal le búulkabal way yóokʼol kaaboʼ.+
7 Noé túuneʼ ook teʼ arca yéetel u hijoʼob, u yatan bey xan u yiliboʼob antes u káajal le búulkabaloʼ.+
8 Tiʼ cada clase baʼalcheʼ limpio tu táan Dios bey xan le maʼ limpiooʼ, le baʼalcheʼob ku xikʼnaloʼoboʼ bey xan le ku jíiltikubaʼoboʼ,+
9 a kaʼakaʼatúulil úuchik u yookloʼob ichil le arca yéetel Noéoʼ, u xiibil yéetel u x-chʼuupil, jach jeʼex úuchik u yaʼalik Dios tiʼ Noéoʼ.
10 Ka máan siete días túuneʼ káaj le búulkabaloʼ.
11 Le yaan 600 años tiʼ Noéoʼ, tiʼ le día 17 tiʼ le kaʼapʼéel mesoʼ,* chéen ka jeʼepaj u joonajiloʼob le kaʼanoʼ ka káaj u kʼáaxal le yaʼabkach jaʼ yaan teʼeloʼ.+
12 Le jaʼ túunoʼ kʼáax durante 40 días, bul kʼiin yéetel bul áakʼab.
13 Teʼ kʼiin jeʼeloʼ Noéeʼ ook teʼ arca junmúuchʼ yéetel u hijoʼoboʼ, u kʼaabaʼobeʼ Sem, Cam yéetel Jafet.+ Ook xan u yatan yéetel u yóoxtúul yiliboʼob.+
14 Letiʼobeʼ ookoʼob yéetel u clasesil u baʼalcheʼiloʼob kʼáax, u clasesil baʼalcheʼob ku yalakʼtaʼaloʼob, u clasesil baʼalcheʼob ku jíiltikubaʼob, u clasesil baʼalcheʼob ku xikʼnaloʼob,* jejeláas chʼíichʼoʼob yéetel jeʼel baʼalak kuxaʼan yaan u xiikʼeʼ.
15 Tuláakal túun baʼax ku chʼaʼik u yiikʼeʼ ookoʼob a kaʼakaʼatúulil ichil le arca yéetel Noéoʼ.
16 Bey túun úuchik u yokol tuláakal le baʼalcheʼob ichil le arcaoʼ, u xiibiloʼob yéetel u x-chʼuupiloʼob, jach jeʼex tu yaʼalil Dios tiʼ Noéeʼ. Ka tsʼoʼokeʼ Jéeobaeʼ tu kʼalaj u joonajil le arcaoʼ.
17 Seguernaj u kʼáaxal le jaʼ durante 40 díasoʼ ka kaʼanchaj le jaʼoʼ ka tu chʼúuyaj le arcaoʼ, lelaʼ joʼopʼ túun u máan yóokʼol le jaʼoʼ.
18 Le luʼumoʼ jach búuli yéetel jach kaʼanchaj u jaʼil. Chéen baʼaleʼ le arcaoʼ tiʼ ku máan yóokʼol le jaʼoʼ.
19 Táaj kaʼanchaj le jaʼoʼ, hasta tu pixaj tuláakal le montañaʼob maas kaʼanaltak yanoʼob teʼ luʼumaʼ.+
20 Le jaʼoʼ kex seis metros y medio* píitmáan tiʼ u kaʼanlil le montañaʼoboʼ.
21 Bey túun kíimik tuláakal baʼal kuxaʼan teʼ luʼumoʼ:+ le baʼalcheʼob ku xikʼnaloʼoboʼ,* le baʼalcheʼob ku yalakʼtaʼaloʼoboʼ, u baʼalcheʼiloʼob kʼáax, tuláakal u jejeláasil baʼal kuxaʼan, bey xan tuláakal máak.+
22 Tuláakal baʼax ku chʼaʼik u yiikʼ ku máan yóokʼol tikin luʼumeʼ kíimi.+
23 Dios túuneʼ tu xuʼulsaj tiʼ tuláakal baʼal kuxaʼan yóokʼol le luʼumoʼ, tu xuʼulsaj tiʼ máak, tiʼ baʼalcheʼ, tiʼ le baʼalcheʼob ku jíiltikubaʼoboʼ bey xan tiʼ le ku xikʼnaloʼoboʼ.* Láaj xuʼulsaʼaboʼob,+ chéen Noé, u láakʼtsiloʼob bey xan le baʼalcheʼob yanoʼob teʼ arca maʼ kíimoʼoboʼ.+
24 Le luʼum túunoʼ xáanchaj 150 días láayliʼ kaʼanal u jaʼileʼ.+
Notas
^ Uláakʼ bix u traducirtaʼaleʼ «siete pares tiʼ cada baʼalcheʼ limpio tu táan Dios».
^ Uláakʼ bix u traducirtaʼaleʼ «siete pares tiʼ cada baʼalcheʼ ku xikʼnal».
^ Le u kaʼapʼéel mes ku yaʼalaʼaloʼ ku abarcartik óoliʼ táanchumuk tiʼ u mesil octubre tak u táanchumukil noviembre. Ilawil página 2692.
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.
^ Ich hebreoeʼ ku yaʼalaʼal kaʼach «15 codos».
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.