Génesis 1:1-31
-
Ku beetaʼal kaʼan yéetel luʼum (1, 2)
-
Seis días táan u preparartaʼal le luʼumoʼ (3-31)
-
Día 1: ku beetaʼal sáasil, día yéetel áakʼab (3-5)
-
Día 2: ku beetaʼal le baʼax jatsik le jaʼoboʼ (6-8)
-
Día 3: ku beetaʼal tikin luʼum, xíiwoʼob yéetel cheʼob (9-13)
-
Día 4: ku beetaʼal le baʼaloʼob ku sáasilkunajoʼoboʼ (14-19)
-
Día 5: ku beetaʼal kayoʼob yéetel chʼíichʼoʼob (20-23)
-
Día 6: ku beetaʼal baʼalcheʼob bey xan wíinikoʼob (24-31)
-
1 Tu káajbaleʼ Dioseʼ tu beetaj le kaʼanoʼoboʼ bey xan le luʼumoʼ.+
2 Le luʼum kaʼachoʼ minaʼan u forma yéetel mix baʼal yaniʼ, chuup yéetel jaʼ*+ yéetel jach éeʼjochʼeʼen. U poder Dios*+ xaneʼ tiʼ ku péek yóokʼol le jaʼoʼ.+
3 Dios túuneʼ tu yaʼalaj: «Yanchajak sáasil». Ka túun yanchaj le sáasiloʼ.+
4 Ka tsʼoʼokeʼ Dioseʼ tu yileʼ jach maʼalob le sáasiloʼ ka tu jatsaj tiʼ le éeʼjochʼeʼeniloʼ.
5 Tiʼ le sáasil túunoʼ Dioseʼ tu tsʼáaj u kʼaabaʼt Día, yéetel tiʼ le éeʼjochʼeʼeniloʼ tu tsʼáaj u kʼaabaʼt Áakʼab.+ Bey yanchajik tarde yéetel jaʼatskab teʼ yáax díaoʼ.
6 Ka tsʼoʼokeʼ Dioseʼ tu yaʼalaj: «Yanak junpʼéel baʼal*+ chúumuk tiʼ le jaʼoʼ utiaʼal ka u jatsuba le jaʼoʼ».+
7 Dios túuneʼ tu beetaj u yantal junpʼéel baʼal utiaʼal u jatskuba le jaʼoʼ. Junjaats tiʼ le jaʼoʼ tu tsʼáaj kaʼanal, uláakʼ junjaatseʼ tu pʼataj kabal.+ Bey túun béeychajik le baʼax tu yaʼaloʼ.
8 Le baʼax tu beetaj Dios u yantaloʼ tu tsʼáaj u kʼaabaʼt Kaʼan. Bey yanchajik tarde yéetel jaʼatskab teʼ kaʼapʼéel díaoʼ.
9 Dios túuneʼ tu yaʼalaj: «Le jaʼ yaan kabaloʼ ka juntarnak junpʼéeliliʼ tuʼux, yéetel ka chíikpajak tuʼux tikin».+ Bey túun béeychajik le baʼax tu yaʼaloʼ.
10 Le tuʼux tikinoʼ Dioseʼ tu tsʼáaj u kʼaabaʼt Luʼum,+ yéetel tiʼ le jaʼob tu juntartoʼ tu tsʼáaj u kʼaabaʼt Kʼáaʼnáaboʼob.+ Dios túuneʼ tu yileʼ le baʼax tu beetoʼ jach maʼalob.+
11 Ka tsʼoʼokeʼ Dioseʼ tu yaʼalaj: «Ka jóokʼok u clasesil xíiwoʼob yóokʼol le luʼumoʼ, xíiwoʼob yéetel cheʼob ku tsʼáaik u semillaʼob, yéetel cheʼob ku tsʼáaik u yichoʼob yaan u semillaʼob». Bey túun béeychajik le baʼax tu yaʼaloʼ.
12 Teʼ luʼum túunoʼ káaj u jóokʼol u clasesil xíiwoʼobiʼ, xíiwoʼob ku tsʼáaik u semillaʼob,+ yéetel cheʼob ku tsʼáaik u yichoʼob yaan u semillail. Dios túuneʼ tu yileʼ le baʼax tu beetoʼ jach maʼalob.
13 Bey yanchajik tarde yéetel jaʼatskab teʼ óoxpʼéel díaoʼ.
14 Dios túuneʼ tu yaʼalaj: «Ka yanak baʼaloʼob ku sáasilkunajoʼob+ teʼ kaʼanoʼ utiaʼal ka u jatsoʼob le día tiʼ le áakʼaboʼ,+ utiaʼal ka yanak jejeláas épocaʼob, utiaʼal ka xoʼokok le díasoʼ bey xan le añosoʼ.+
15 Teʼ kaʼan kun antaloʼob utiaʼal u sáasilkuntikoʼob le luʼumaʼ». Bey béeychajik le baʼax tu yaʼaloʼ.
16 Dios túuneʼ tu beetaj ka chíikpajak le Kʼiin yéetel le Lunaoʼ.* Le maas nojochoʼ utiaʼal u sáasilkunaj de día,+ yéetel le maas chichanoʼ utiaʼal u sáasilkunaj de áakʼab. Tu beetaj xan u chíikpajal le estrellaʼoboʼ.+
17 Bey tsʼaʼabikoʼob tumen Dios teʼ kaʼanoʼ utiaʼal ka juulnak u sáasiloʼob yóokʼol le luʼumaʼ,
18 utiaʼal xan ka juulnakoʼob de día yéetel de áakʼab yéetel utiaʼal u jatsik le sáasil tiʼ le éeʼjochʼeʼeniloʼ.+ Dios túuneʼ tu yileʼ le baʼax tu beetoʼ jach maʼalob.
19 Bey túun yanchajik tarde yéetel jaʼatskab teʼ kanpʼéel díaoʼ.
20 Tsʼoʼoleʼ Dioseʼ tu yaʼalaj: «Yanak u clasesil baʼalcheʼob ichil le jaʼoʼ bey xan u clasesil baʼalcheʼob ku xikʼnaloʼob* teʼ kaʼanoʼ».*+
21 Ka tsʼoʼokeʼ Dioseʼ tu beetaj u nukuch baʼalcheʼiloʼob le kʼáaʼnáaboʼ, le u clasesil baʼalcheʼob kuxaʼanoʼob ichil le jaʼoʼ bey xan le u clasesil baʼalcheʼob ku xikʼnaloʼoboʼ. Dios túuneʼ tu yileʼ le baʼax tu beetoʼ jach maʼalob.
22 Ka tsʼoʼokeʼ Dioseʼ tu bendecirtoʼob táan u yaʼalik: «Yanak a mejnileʼex, yaʼabchajkeʼex yéetel chupeʼex le kʼáaʼnáaboʼ.+ Yaʼabchajak xan teʼ luʼum le baʼalcheʼob ku xikʼnaloʼoboʼ».
23 Bey túun yanchajik tarde yéetel jaʼatskab teʼ día cincooʼ.
24 Dios túuneʼ tu yaʼalaj: «Yanak u clasesil+ baʼalcheʼob way luʼumeʼ, baʼalcheʼob ku jíiltikubaʼob, baʼalcheʼob utiaʼal alakʼtbil bey xan u baʼalcheʼiloʼob kʼáax». Bey túun béeychajik le baʼax tu yaʼaloʼ.
25 Ka túun tu beetaj Dios u clasesil u baʼalcheʼiloʼob kʼáax yéetel u clasesil baʼalcheʼob ku yalakʼtaʼal bey xan u clasesil baʼalcheʼob ku jíiltikubaʼob. Dios túuneʼ tu yileʼ le baʼax tu beetoʼ jach maʼalob.
26 Dioseʼ tu yaʼalaj xan: «Koʼox+ beetik le máak jeʼex toʼoneʼ,+ utiaʼal ka pʼáatak chíikaʼan tiʼ toʼon.+ Ka yanak tuláakal le luʼum tu yáanal u páajtaliloʼ, bey xan le kayoʼob yanoʼob teʼ kʼáaʼnáaboʼ, le baʼalcheʼob ku xikʼnaloʼoboʼ, tuláakal baʼalcheʼ ku yalakʼtaʼal bey xan tuláakal baʼalcheʼ ku jíiltikuba».+
27 Dios túuneʼ tu beetaj máak jeʼel bix letiʼeʼ utiaʼal ka pʼáatak chíikaʼan tiʼ letiʼ. Tu beetaj xiib bey xan koʼolel.+
28 Ka tsʼoʼokeʼ Dioseʼ tu bendecirtoʼob táan u yaʼalik: «Yanchajak a paalaleʼex yéetel yaʼabchajkeʼex, chupeʼex le luʼumaʼ+ yéetel kanáanteʼex.*+ Yanak yáanal a páajtalileʼex+ le kayoʼob yanoʼob teʼ kʼáaʼnáaboʼ, le baʼalcheʼob ku xikʼnaloʼoboʼ bey xan tuláakal baʼal kuxaʼan way luʼumeʼ».
29 Dios túuneʼ tu yaʼalaj: «Ilawileʼex, way luʼumeʼ tsʼoʼok in tsʼáaik utiaʼal a jaanteʼex tuláakal xíiw ku tsʼáaik u semilla bey xan tuláakal cheʼ ku tsʼáaik u yich yaan u semillail.+
30 Yéetel tiʼ tuláakal u baʼalcheʼiloʼob kʼáaxeʼ kin tsʼáaik utiaʼal ka u jaantoʼob tuláakal le xíiwoʼob yéetel le cheʼoboʼ. Lelaʼ kin tsʼáaik xan utiaʼal ka u jaant tuláakal baʼalcheʼ ku xikʼnal bey xan tuláakal baʼal kuxaʼan teʼ luʼumoʼ».+ Bey túun béeychajik le baʼax tu yaʼaloʼ.
31 Ka tsʼoʼokeʼ Dioseʼ tu yilaj tuláakal baʼax tsʼoʼok u beetik, ka tu yileʼ jach táaj maʼalob.+ Bey túun yanchajik tarde yéetel jaʼatskab teʼ día seisoʼ.
Notas
^ Wa «jaʼ táan u woʼoltikuba».
^ Wa «U espíritu santo Dios».
^ Wa «junpʼéel espacio».
^ Ich hebreoeʼ ku yaʼalaʼal kaʼach «le kaʼapʼéel nojoch baʼaloʼob ku sáasilkunajoʼoboʼ».
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.
^ Wa «teʼ kaʼanoʼ, le kaʼan yaan yóokʼol le luʼumoʼ».
^ Ich hebreoeʼ ku yaʼalaʼal kaʼach «dirigirteʼex».
