Génesis 2:1-25
2 Bey túun úuchik u beetaʼal tuláakal le baʼaxoʼob yanoʼob teʼ kaʼanoʼoboʼ bey xan teʼ luʼumoʼ.+
2 Teʼ día siete túunoʼ Dioseʼ tsʼokaʼaniliʼ u tsʼoʼoksik le meyaj táan u beetik kaʼachoʼ, yéetel káaj u jeʼelel teʼ día siete tiʼ tuláakal le meyaj táan u beetik kaʼachoʼ.+
3 Dios túuneʼ tu bendecirtaj le día sieteoʼ ka tu yaʼaleʼ le día jeʼelaʼ santo, tumen desde teʼ día jeʼelaʼ káaj u jeʼelel tiʼ tuláakal le baʼaxoʼob tu chʼaʼtuklaj u beetkoʼ.
4 Lelaʼ u tsikbalil bix úuchik u yantal kaʼan yéetel luʼum teʼ día ka beetaʼaboʼob tumen Jéeoba* Diosoʼ.+
5 Way luʼum kaʼacheʼ mix junkúul chan cheʼ yaan yéetel mix junkúul xíiw káajak u jóokʼoliʼ, tumen Jéeoba Dios kaʼacheʼ maʼ u beet u kʼáaxal jaʼiʼ mix u beet máak utiaʼal ka u meyajt le luʼumaʼ.
6 Chéen baʼaleʼ Dioseʼ ku beetik kaʼach u jóokʼol teʼ luʼum junpʼéel baʼal bey sereno utiaʼal u chʼulik tuláakal baʼal yaan yóokʼol le luʼumoʼ.
7 Jéeoba Dios túuneʼ tu chʼaʼaj le luʼumoʼ ka tu beetaj le máakoʼ,+ ka tsʼoʼokeʼ tu yustaj iikʼ tu niʼeʼ+ ka suunaj juntúul kuxaʼan máak.+
8 Tsʼoʼoleʼ Jéeoba Dioseʼ tu beetaj junpʼéel jardín tu lakʼinil* Edén.+ Teʼeloʼ tiʼ tu tsʼáaj le máak tu beetoʼ.+
9 Bey túun úuchik u beetik Jéeoba Dios u jóokʼol tuláakal u jejeláasil jatsʼuts cheʼob maʼalob u yichoʼob utiaʼal jaantbil. Tu chúumukil xan le jardínoʼ tu beetaj u jóokʼol u cheʼil le kuxtaloʼ,+ bey xan le cheʼ utiaʼal u kʼaj óoltaʼal baʼax uts yéetel baʼax kʼaasoʼ.+
10 Teʼ Edén túunoʼ yaan junpʼéel río ku jóoyabtik le jardínoʼ, tiʼ le ríoaʼ ku jóokʼol uláakʼ kanpʼéel ríoʼobiʼ.
11 U kʼaabaʼ le yáaxoʼ Pisón, lelaʼ ku baʼpachtik tuláakal u luʼumil Avilá, le tuʼux yaan orooʼ.
12 Le oro yaan teʼ luʼumaʼ jach maʼalob. Tiʼ yaan xan le bedelio* yéetel le jatsʼuts tuunich ku kʼaabaʼtik óniceoʼ.*
13 U kʼaabaʼ le kaʼapʼéel ríooʼ Guiyón, lelaʼ ku baʼpachtik tuláakal u luʼumil Cus.
14 U kʼaabaʼ le óoxpʼéel ríooʼ Idekel,*+ lelaʼ tiʼ yaan tu lakʼinil Asiriaeʼ.+ Yéetel u kʼaabaʼ le kanpʼéel ríooʼ Éufrates.+
15 Jéeoba Dios túuneʼ tu chʼaʼaj le máakoʼ ka tu tsʼáaj tu jardínil Edén utiaʼal ka u meyajte bey xan utiaʼal ka u kanáante.+
16 Tsʼoʼoleʼ Jéeoba Dioseʼ tu yaʼalaj tiʼ le máakoʼ: «Tuláakal u yich le cheʼob yaan teʼ jardínaʼ jeʼel u páajtal a jaantik tak ken naʼajchajkecheʼ.+
17 Chéen baʼaleʼ maʼ unaj a jaantik u yich le cheʼ utiaʼal u kʼaj óoltaʼal baʼax uts yéetel baʼax kʼaasoʼ, tumen le kʼiin ken a jaanteʼ yaan a kíimil».+
18 Ka tsʼoʼokeʼ Jéeoba Dioseʼ tu yaʼalaj: «Maʼ maʼalob ka seguernak u pʼáatal le máak chéen tu juunaloʼ. Yaan in beetik u núup, juntúul máax utiaʼal áantik».+
19 Jéeoba Dios túuneʼ láayliʼ táan kaʼach u beetik yéetel luʼum u jejeláas baʼalcheʼiloʼob kʼáaxeʼ bey xan le jejeláas baʼalcheʼob ku xikʼnaloʼoboʼ.* Kéen tsʼoʼokkeʼ ku taasik túun tu yiknal le máak utiaʼal ka u tsʼáa u kʼaabaʼoboʼ. Le kʼaabaʼ ku tsʼáaik le máak tiʼ le baʼalcheʼoboʼ letiʼe ku pʼáatal tiʼ letiʼoboʼ.+
20 Le máak túunoʼ tu tsʼáaj u kʼaabaʼ tuláakal le baʼalcheʼob ku yalakʼtaʼaloʼoboʼ, le baʼalcheʼob ku xikʼnaloʼoboʼ bey xan u baʼalcheʼiloʼob kʼáax. Chéen baʼaleʼ le máakoʼ minaʼan kaʼach u núup, minaʼan juntúul máax utiaʼal áantik.
21 Jéeoba Dios túuneʼ tu beetaj u tʼúubul u wenel le máakoʼ. Le táan u weenloʼ tu jóoʼsaj junpʼéel u baakel u chʼalaʼatel, yéetel le ka tsʼoʼokeʼ tu kʼalaj u bakʼel.
22 Tiʼ le u baakel u chʼalaʼatel tu chʼaʼajtiʼoʼ Jéeoba Dioseʼ tu beetaj juntúul koʼolel. Ka tsʼoʼokeʼ tu taasaj tu yiknal le máakoʼ.+
23 Le máak túunoʼ le ka tu yileʼ tu yaʼalaj:
«¡Lelaʼ jach tu jaajileʼ u baakel in baakel,yéetel u bakʼel in bakʼel!
Letiʼeʼ yaan u kʼaabaʼtik Koʼoleltumen tiʼ le xiib chʼaʼaboʼ».+
24 Tu yoʼolal lelaʼ le xiiboʼ yaan u pʼatik u papá yéetel u maama utiaʼal u pʼáatal* yéetel u yatan, tu kaʼatúulaloʼob túuneʼ yaan u suutoʼob junpʼéeliliʼ wíinklil.+
25 Le máak yéetel u yatanoʼ tak teʼ súutukoʼ minaʼan u nookʼoʼob+ táan u máanoʼob, kex beyoʼ maʼ suʼlakoʼobiʼ.
Notas
^ Way ku yáax chíikpajal u kʼaabaʼ Dioseʼ: יהוה (YHWH). Ilawil «Jéeoba», página 2566.
^ Wa «este».
^ Lelaʼ u yiits jujunpʼéel clase cheʼob jach kiʼiboktak.
^ Ilawil página 2575.
^ Wa «Tigris».
^ Le tʼaanaʼ ich hebreoeʼ maʼ xaaneʼ táan u tʼaan tiʼ chʼíichʼoʼob yéetel tiʼ uláakʼ baʼaloʼob ku xikʼnaloʼob jeʼex le insectoʼoboʼ.
^ Wa «u nupkuba».
