Faataoto 21:1-31
21 O le loto o le tupu ua pei o alāvai i le aao o Ieova.+
E na te faatonutonuina e tusa ma so o se mea ua Ia finagalo i ai.+
2 O ala uma o le tagata e saʻo i lona lava manatu,+A o Ieova e na te su‘esu‘eina loto.*+
3 O le faia o le mea e sa‘o ma tonu,E sili lea iā Ieova nai lo o le taulaga.+
4 O mata faamaualuga ma le lotofaasausili,O le molī e ta‘ita‘iina ai ē e amioleaga, o le agasala lea.+
5 O fuafuaga a le tagata toʻaga e manuia ai lava o ia,+A o i latou uma e vave gaoioi ae lē mafaufau muamua, e iʻu ai i le mativa.+
6 O le mauaina o ‘oa e ala i se laulaufaiva pepelo,Ua pei o le puao ua mou atu, ma o se mailei e oti ai.*+
7 O le faasauā o ē e amioleaga e tafiesea ai i latou,+Auā ua latou mumusu e faia le faamasinogatonu.
8 O le ala o le tagata ua nofosala e faapi‘opi‘o lea,A o galuega a le tagata mamā, e tonu ia.+
9 E sili le nofo i le tulimanu o le taualuga,Nai lo o le nonofo ma se avā e faamisa* i le fale e tasi.+
10 Ua manaʻo le tagata amioleaga i mea leaga;+E lē alofa o ia i lona tuaoi.+
11 Pe a faasalaina lē e tauemu, e atili ai ona atamai lē ua leai se poto masani,Ma pe a talia e le tagata atamai le tofā mamao, ona maua ai lea e ia o le poto.*+
12 E uaʻi atu Lē e Amiotonu* i le fale o le tagata amioleaga;E na te lafotūina o ē e amioleaga ina ia fano ai i latou.+
13 O sē e punitia ona taliga mai i le alaga a le tagata faatauvaa,E valaau atu foʻi o ia ae e lē taliaina.+
14 O se meaalofa faalilolilo e fai ifo ai le ita,+Ma o se foaʻi faaalatua ua natia,* e fai ifo ai le matuā lotoa.
15 O se mea fiafia i le tagata amiotonu le faia o le mea tonu,+A o se mea leaga lea iā i latou e faia le mea leaga.
16 O le tagata e sē ese mai i le ala o le tofā mamao,O le a mālōlō o ia faatasi ma ē ua feoti.+
17 O lē e matuā naunau i mea faafiafia e i‘u ina mativa;+O lē e matuā naunau i le uaina ma le suāuu e lē tamaoaiga o ia.
18 E fai le tagata amioleaga ma togiola mo lē e amiotonu,Ma e suitulaga le tagata taufaa‘ole‘ole i lē e amio saʻo.+
19 E sili le nofo i le toafa*Nai lo o le nonofo faatasi ma se avā e faamisa* ma itaitagofie.+
20 O le ʻoa tāua ma le suāuu ua maua i le fale o le tagata atamai,+A o le tagata valea e na te faataugā* mea ua iā te ia.+
21 O sē e na te tuliloaina le amiotonu ma le alofa faamaoni,E maua e ia le ola, o le amiotonu, ma le mamalu.+
22 E mafai ona aʻea* e le tagata atamai le aai o tagata malolosi,Ma faavaivaia le malosi o lo latou faatuatuaga.+
23 O lē e pulea lona gutu ma lona laulaufaiva,Ua ia ‘alofia faafitauli.+
24 O le tagata gugutu, faamaualuga, ma faasausili, o ta‘u iaO le tagata e gaoioi ma le faamaualuga e aunoa ma le mafaufau lelei.+
25 O le mea e manaʻo i ai le tagata paiē e oti ai o ia,Auā ua lē fia galulue ona lima.+
26 O le aso atoa ua ia mana‘ona‘o ma le matape‘ape‘a i isi mea,A o lē e amiotonu e foaʻi atu e aunoa ma le taofia o se mea.+
27 O le taulaga a lē e amioleaga o se mea lea e inosia.+
E sili atu la ona inosia pe a ia ofoina atu ma se faanaunauga leaga!*
28 O le a faaumatia le molimau pepelo,+A o le tagata e faalogo, e taulau lana molimau.*
29 O le tagata amioleaga e foliga mautinoa,+A o le tagata e amio saʻo e mautinoa lona ala.+
30 E leai se atamai, po o se faautaga loloto, po o se fautuaga e tetee atu iā Ieova.+
31 Ua saunia le solofanua mo le aso o le taua,+A o le faaolataga o loo iā Ieova lea.+
Faamatalaga Pito i Lalo
^ Po o “uunaʻiga o le loto.”
^ Pe atonu “mo i latou o loo saʻili i le oti.”
^ Po o le “tomumu.”
^ Po o le “ona ia iloa lea o le mea e fai.”
^ E faasino atu iā Ieova.
^ Epe., “se foa‘i faaalatua mai i le fatafata.”
^ Tagaʻi i le Uiga o Upu.
^ Po o le “tomumu.”
^ Epe., “foloina.”
^ Po o le “faatoʻilaloina.”
^ Po o le “a o ia faia amioga matagā!”
^ Epe., “e tautala e faavavau.”
