Failauga 4:1-16
4 Ua ou toe manatunatu i gaoioiga sauā uma o loo faia i lalo o le lā. Ua ou iloa loimata o ē o loo sauāina, ma ua leai se tasi e faamāfanafana iā i latou.+ Ua iai fo‘i le pule i ē e sauāina i latou, ma ua leai ai se tasi e faamāfanafana iā i latou.
2 Ua ou iloa e sili atu ona manuia ē ua oti nai lo o ē o loo ola.+
3 Ae e sili atu iā i latou na o lē e leʻi fanau mai,+ o lē e leʻi vaai i galuega tigā ua faia i lalo o le lā.+
4 Ua ou vaai fo‘i i le tele o taumafaiga* ma galuega ua faia i le tomai, ona o le faatautavā o tagata;+ e i‘uvale foʻi lea mea, ma o le ʻai a le matagi.
5 Ua piilima le tagata valea ma faaleagaina ai lona lava tino.*+
6 E sili le luuga e tasi o le mālōlō, nai lo o luuga e lua o galuega mamafa ma le ʻai a le matagi.+
7 Ona ou toe manatunatu ai lea i se isi faaa‘oa‘oga o se mea e i‘uvale i lalo o le lā:
8 E iai le tagata ua na o ia e aunoa ma se uō; e leai sona atalii po o sona uso, ae e lē uma ana galuega mamafa uma. E lē faamalieina lava ona mata i ‘oa.+ Ae pe e fesili ifo o ia, ‘Ou te galue mamafa ea mo ai ma taofia ai a‘u mai i le fiafia i mea lelei’?+ E i‘uvale foʻi lea mea, ma o se galuega e māfua ai tigā.+
9 E sili ona lelei o le toʻalua nai lo o le toʻatasi,+ auā ua iā i laʻua se taui lelei* o la laʻua galuega mamafa.
10 Auā afai e paʻū le tasi, e mafai e le isi ona fesoasoani e toe faatūina o ia. Ae o le ā e tupu i lē e paʻū ae e leai se isi e fesoasoani e toe faatūina o ia?
11 E lē gata i lea, afai e taooto faatasi le toʻalua, o le a māfanafana i laʻua, ae e faapefea ona māfanafana pe afai e na o le toʻatasi?
12 E ono manumalo se tasi i le tagata e toʻatasi, ae e mafai e le toʻalua ona tetee atu iā te ia. O le maea sautuatolu fo‘i e lē vave motusia.*
13 E sili ona lelei o se tamaitiiti mativa ae e atamai, nai lo o le tupu e toeaina ae e valea,+ e lē o toe lava lona poto e amanaʻia ai lapataʻiga.+
14 Auā ua alu ese o ia* mai i le falepuipui ina ia fai ma tupu,+ e ui lava na mativa o ia ina ua fanau mai i lea malo.+
15 Na ou manatunatu iā i latou uma o loo feola ma fesavaliaʻi i lalo o le lā, faapea le tupu talavou ua tula‘i atu e suitulaga i le isi.
16 E ui lava e to‘atele pea tagata e lagolagoina o ia, ae e mulimuli ane o le a lē toe fiafia tagata iā te ia.+ E i‘uvale foʻi lea mea, ma o le ʻai a le matagi.
Faamatalaga Pito i Lalo
^ Po o le “i galuega mamafa.”
^ Epe., “ma ʻai e ia lona lava tino.”
^ Po o “se faamanuiaga sili.”
^ Po o le “e lē faigofie ona motusia.”
^ Atonu e faasino atu i le tamaitiiti atamai.
