Faataoto 10:1-32
10 O faataoto a Solomona.+
O le atalii atamai e na te faafiafiaina lona tamā,+A o le tama valea e faanoanoa ai lona tinā.
2 E lē aogā ʻoa e maua i amioga leaga,A o le amiotonu o le a laveaʻiina ai mai i le oti.+
3 E lē tuua e Ieova le tagata amiotonu ia matelāina,+Ae e na te teena manaʻoga o tagata amioleaga.
4 O lima e paiē e i‘u ai i le mativa,+Ae o lima e toʻaga e mauʻoa ai.+
5 O le atalii e iai le tofā mamao, e na te faaputuina fua i le tau māfanafana,Ae o le atalii e tupu ai le mā, e moegase o ia a o faia le seleselega.+
6 Ua i luga o le ulu o lē e amiotonu o faamanuiaga,+A o gutu o ē e amioleaga, e ufiufi ai faiga sauā.
7 O le talaaga* o lē e amiotonu e maua ai le faamanuiaga,+A o igoa o ē e amioleaga e pala ia.+
8 O lē ua atamai lona loto o le a ia talia faatonuga,*+A o lē ua tautala ma le valea o le a solia o ia i lalo.+
9 O lē e savali ma le faamaoni o le a savali ma le saogalemu,+A o lē e faapiʻopiʻo ona ala, o le a maua o ia.+
10 O lē e faa‘ivi lona mata ma le faa‘ole‘ole e na te faatupu le tigā,+Ma o lē ua tautala ma le valea o le a solia o ia i lalo.+
11 O le gutu o le tagata amiotonu o le puna lea o le ola,+A o le gutu o lē e amioleaga, e ufiufi ai faiga sauā.+
12 O le ʻinoʻino e tupu ai feeseesea‘iga,A o le alofa e ufiufi ai mea sesē uma.+
13 E iloa le atamai i laugutu o le tagata e iai le faautaga loloto,+A o le laau, e sasa ai le tua o lē ua leai sona mafaufau.*+
14 O i latou e atamamai e teu i o latou loto le poto,+A o le gutu o le tagata valea ua lata ina faaumatia.+
15 O le tamaoaiga o le tagata mauʻoa,* o lona aai malupuipuia lea.
O le fanoga o tagata matitiva, o lo latou mativa lea.+
16 O galuega a le tagata amiotonu e iʻu i le ola;A o mea e maua e le tagata amioleaga e iʻu i le agasala.+
17 O lē e usiusita‘i i le a‘oa‘iga, o le ala lea i le ola,*A o lē e lē amana‘ia le aʻoaʻiga, e na te taʻitaʻisesēina tagata.
18 O lē e ufiufi lona ʻinoʻino, e tautala o ia i pepelo,+Ma o lē e faasalalauina tala taufaaleaga,* e valea o ia.
19 O le tele o upu e lē asa ai ma se mea sesē,+A o lē e na te pulea ona laugutu e gaoioi o ia ma le faautauta.+
20 O le laulaufaiva o le tagata amiotonu e pei o le siliva e sili ona lelei,+A o le loto o le tagata amioleaga e faatauvaa lea.
21 O laugutu o le tagata amiotonu e fesoasoani i* le toʻatele,+Ae o ē e valelea ua feoti i latou ona ua leai se mafaufau.+
22 O le faamanuia a Ieova e faatamaoaiga ai,+Ma e na te lē faaopoopo i ai se tigā.*
23 Ua pei le faia o amioga matagā o se taaloga i le tagata valea,A o le tagata e iai le faautaga loloto e iā te ia le atamai.+
24 O le mea e fefe ai le tagata amioleaga, o le mea lea e oo iā te ia;Ae o mea e mananaʻo ai tagata amiotonu e tuuina atu iā i latou.+
25 E lē toe iai le tagata amioleaga pe a mavae atu le matagi malosi,+A o le tagata amiotonu e pei o se faavae e tumau e faavavau.+
26 E pei o le vineta i nifo, e pei foʻi o le asu i mata,E faapena le tagata paiē i lē ua auina atu o ia.*
27 O le mataʻu iā Ieova e faafualoaina ai le ola,+A o tausaga o ē e amioleaga, e faaitiitia ia.+
28 O le faamoemoe o tagata amiotonu o le olioli lea,+Ae o le faamoemoe o tagata amioleaga e lē faataunuuina.+
29 O le ala o Ieova o le malosi lea mo lē e lē ponā,+A o le faaumatiaga mo ē e faia mea leaga.+
30 O le tagata amiotonu e lē tautevateva lava o ia,+Ae o ē e amioleaga e lē nonofo pea i latou i le lalolagi.+
31 O le gutu o le tagata amiotonu e fua mai ai le atamai,*A o le laulaufaiva faapiʻopiʻo e vavaeeseina lea.
32 O laugutu o le tagata amiotonu e tautala i mea e logolelei,A o le gutu o le tagata amioleaga e faapiʻopiʻo lea.
Faamatalaga Pito i Lalo
^ Epe., “faamanatuina.”
^ Epe., “poloaʻiga.”
^ Po o le “ua leai se uunaʻiga lelei o le loto.”
^ Po o le “O ʻoa a le tagata mauʻoa.”
^ Pe atonu “ua iai i le ala o le ola.”
^ Po o “tala feaveaʻi.”
^ Po o le “taʻitaʻiina ai.”
^ Po o “faanoanoaga; faigatā.”
^ Po o “i lona pule.”
^ Po o le “e fua mai ai le fua o le atamai.”
