O faauōga e saosaolaumea i le fiafia ma le taulau manuia o le olaga. O uō lelei e iai taaʻiga lelei o le tasi i le isi, ma e faamalosia e le isi uiga lelei o le isi.—Faataoto 27:17.

 Peitaʻi, o loo faamatilatila mai i le Tusi Paia le tāua o le filifili lelei o uō. O loo lapataʻi mai i āuga o le faauō i uō leaga. (Faataoto 13:20; 1 Korinito 15:33) O na ituaiga uō e uunaʻia ai se tasi e faia ni filifiliga lē atamai ma faaleagaina ai uiga lelei.

I lenei mataupu

•  O ā uiga e tatau ona iai i se uō lelei?

•  O ā nisi o faaaʻoaʻoga o faauōga lelei o loo taʻua i le Tusi Paia?

•  Pe mafai ona avea se tasi ma uō a le Atua?

•  O mau o le Tusi Paia e faatatau i faauōga

 Ua aʻoaʻo mai i le Tusi Paia, o faauōga lelei e tatau ona faavae aʻe i uiga faa-Kerisiano nai lo le tutusa o mea e fiafia i ai. O se faataʻitaʻiga, ua faapea mai le Salamo 119:63: “Ua fai aʻu ma uō a i latou uma o ē e matataʻu iā te oe a, ma i latou foʻi o ē e tausi i au faatonuga.” Seʻi mātau le faamatalaga a le tusitala o le Tusi Paia, na filifili o ia e faauō i ē e matataʻu i le Atua ma naunau e ola e tusa ai ma tapulaa a le Atua.

 O loo faamatilatila mai foʻi i le Tusi Paia uiga e tatau ona iai i se uō lelei. O se faataʻitaʻiga:

•   “O le uō moni e alofa i taimi uma, ma o ia o se uso ua fanau mo taimi o puapuaga.”—Faataoto 17:17.

•   “E iai uō e toe lavea le tasi i le isi, ae e iai foʻi le uō e sili ona alofa faamaoni nai lo o le uso.”—Faataoto 18:24.

 O loo taʻua i nei mau o se uō lelei e faamaoni, alofa, agalelei ma limafoaʻi. O se uō lelei e mafai ona tatou faalagolago i ai i taimi o faafitauli. O se uō moni foʻi e lototele e talanoa mai pe a tatou uia se ala sesē po o le a amata ona faia se filifiliga sesē.—Faataoto 27:6, 9.

 O loo taʻua i le Tusi Paia faaaʻoaʻoga o faauōga lelei a tagata e eseese le matutua, talaaga, aganuu ma tulaga pule. Seʻi o tatou talanoaina ni faauōga se tolu.

•   Ruta ma Naomi. O Ruta o le avā a le tama a Naomi, ma atonu e telē se eseesega o la tausaga. E lē gata i lea, e ese le aganuu a Ruta mai iā Naomi. E ui i na eseesega, ae na la atiaʻe se faauōga māfana ma alofa.—Ruta 1:16.

•   Tavita ma Ionatana. E ui e 30 tausaga e matua ai Ionatana iā Tavita, ae o loo faapea mai le Tusi Paia, na ‘pipiimau le loto o Ionatana i le loto o Tavita.’—1 Samuelu 18:1.

•   Iesu ma ona aposetolo. Sa iā Iesu le pule i ona aposetolo, ona o ia o lo latou aʻoaʻo ma lo latou matai. (Ioane 13:13) Ae e leʻi vaai maulalo ai Iesu i ona aposetolo ma manatu e lē tatau ona avea i latou ma ana uō. Ae na māfana atu iā i latou na mulimuli i ana aʻoaʻoga. Na fetalai o ia: “Ua ou taʻua outou o uō, auā ua ou faailoa atu iā te outou mea uma na ou faalogo ai i loʻu Tamā.”—Ioane 15:14, 15.

 Ioe, e mafai e tagata ona faauō i le Atua. Ua faapea mai le Tusi Paia: “E mafuta vavalalata atu o Ia i ē ua amio saʻo.” (Faataoto 3:32) O lona uiga, e faauō atu le Atua iā i latou e taumafai e amio lelei, faamaoni, faaaloalo, ma maumauaʻi e faatatau i o latou olaga ana tapulaa o le mea saʻo ma le mea sesē. O se faataʻitaʻiga, o loo taʻua patino i le Tusi Paia le tane faamaoni o Aperaamo, o le uō a le Atua.—2 Nofoaiga a Tupu 20:7; Isaia 41:8; Iakopo 2:23.