Америкӕйы Иугонд Штатты электронон хъӕзтытыл бакусынц миллиардгай доллӕртӕ.

1.   Уыцы бӕстӕйы электронон хъӕзтытӕй чи хъазы, уыдоныл рӕстӕмбис нымадӕй цал азы цӕуы?

   1.  А. 18

   2.  Б. 30

2.   Сӕ фылдӕр нӕлгоймӕгтӕ сты ӕви сылгоймӕгтӕ?

   1.  А. 55 проценты нӕлгоймӕгтӕ; 45 проценты сылгоймӕгтӕ

   2.  Б. 15 проценты нӕлгоймӕгтӕ; 85 проценты сылгоймӕгтӕ

3.   Электронон хъӕзтытӕй чи фӕхъазы, уыдонӕй фылдӕр чи сты?

   1.  А. 18 азы ӕмӕ уымӕй фылдӕр кӕуыл цӕуы, ахӕм сылгоймӕгтӕ

   2.  Б. 17 азы онг кӕуыл цӕуы, ахӕм нӕлгоймӕгтӕ

 Ацы бӕрӕггӕнӕнты фӕрцы фенӕн ис, электронон хъӕзтытӕй чи фӕхъазы, уый. Фӕлӕ уыдонӕй нӕ бамбардзынӕ, уыцы хъӕзтытӕ адӕймагыл куыд фӕзындзысты – хорзырдӕм ӕви ӕвзӕрырдӕм.

 Ӕркӕсӕм, электронон хъӕзтыты тыххӕй иннӕтӕ цы дзурынц, уымӕ. Кӕй ныхӕстимӕ дзы сразы уыдзынӕ?

•  «Уыдоны фӕрцы дӕ бинонтӕ ӕмӕ де ’мбӕлттимӕ кӕныс ӕнгомдӕр» (Айрин).

•  «Уыдоны фӕрцы дӕ дӕ зындзинӕдтӕ айрох вӕййынц» (Аннетт).

•  «Уыдоны фӕрцы адӕймаг свӕййы къӕрцхъусдӕр» (Кристофер).

•  «Уыдоны фӕрцы ахуыр кӕныс алыхуызон зын фарстатӕ скъуыддзаг кӕнын» (Эми).

•  «Уыдоны фӕрцы дӕ сӕры магъз хуыздӕр фӕкусы; хъуыды кӕнын ӕмӕ алцыдӕр пълан кӕнын сахуыр вӕййыс» (Энтони).

•  «Иуӕй-иу хъӕзтыты фӕрцы адӕймаг сахуыр вӕййы иннӕтимӕ ӕмгуыст кӕнын» (Томас).

•  «Кӕцыдӕр хъӕзтыты фӕрцы адӕймаг фӕкӕны змӕлгӕ, ӕмӕ йе уӕнгтӕ фӕфидардӕр вӕййынц» (Джейл).

 Мыййаг, ацы ныхӕстӕй иуӕй-иутимӕ йе та се ’ппӕтимӕ разы дӕ? Иуӕй-иу видеохъӕзтытӕ адӕймагӕн йӕ зондыл дӕр ӕмӕ йе ’нӕниздзинадыл дӕр хорзырдӕм фӕзынынц. Ӕмӕ кӕд кӕцыдӕр хъӕзтытӕ, дӕхи сӕ цы аирхӕфсай, ӕндӕр ницы пайда сты ӕмӕ, Аннетты загъдау, уыдоны фӕрцы адӕймагӕй «йӕ зындзинӕдтӕ айрох вӕййынц», уӕддӕр уый ӕнӕмӕнг ууыл дзурӕг нӕу, ӕмӕ ӕвзӕр сты

 ● Библи куыд зӕгъы, афтӕмӕй «арвы бын алы хъуыддагӕн дӕр ис йӕхи рӕстӕг», ӕмӕ уый зӕгъӕн ис ирхӕфсӕнтӕй дӕр (Екклесиаст 3:1–4).

 Электронон хъӕзтытӕ дын, мыййаг, дӕ рӕстӕг нӕ байсынц?

 «Хъазын куы райдайын, уӕд мын бауромӕн нал вӕййы. Мӕхицӕн фӕдзурын, мӕнӕ ма иу гыццыл, зӕгъгӕ. Ӕмӕ йӕ ӕмбаргӕ дӕр нӕ бакӕнын, цалдӕр сахаты куыд агӕпп кӕнынц!» (Аннетт).

 «Хатгай дын видеохъӕзтытӕ дӕ рӕстӕг хӕргӕ цы бакӕнынц, ӕндӕр ницы. Сахатгай фӕбадыс ӕмӕ дӕм афтӕ фӕкӕсы, цыма стыр хъуыддаг бакодтай, уымӕн ӕмӕ иу-фондз хъазты рамбылдтай. Фӕлӕ ӕцӕгӕй та дзӕгъӕл бадт фӕкодтай» (Серенӕ).

 Уӕдӕ цы ис зӕгъӕн. Ӕхца куы фесафай, уӕд сӕ, чи зоны, ссарай. Фӕлӕ, кӕй фесӕфтай, уыцы рӕстӕг нал раздахдзынӕ. Зӕгъӕн ис, ӕмӕ рӕстӕг ӕхцайӕ бирӕ зынаргъдӕр у. Уӕдӕ дын дӕ рӕстӕг мацы байсӕд!

 ● Библи зӕгъы: «Ут зондджын ӕмӕ уӕ рӕстӕгӕй, хуыздӕр куыддӕриддӕр у, афтӕ пайда кӕнут» (Колоссӕгтӕм 4:5).

 Электронон хъӕзтытӕ дын дӕ зондыл фӕзынынц?

 «Видеохъӕзтыты адӕймаг ӕнцонтӕй „саразы“, ӕнӕуи царды адӕймаджы ахӕстоны кӕй тыххӕй сбадын кӕнынц кӕнӕ йын мӕлӕты тӕрхон кӕй тыххӕй рахӕссынц, ахӕм фыдракӕндтӕ» (Сет).

 «Бирӕ хъӕзтытӕ ахӕмтӕ сты, ӕмӕ дзы цӕмӕй рамбулай, уый тыххӕй хъуамӕ де знӕгтыл фӕуӕлахиз уай. Ӕмӕ сын хъуамӕ алыхуызон фыдмитӕ бакӕнай ӕмӕ сӕ амарай» (Аннетт).

 «Хатгай дӕ уырнгӕ дӕр нӕ фӕкӕны, хъазгӕ-хъазын де ’мбӕлттӕн ахӕм цыдӕртӕ кӕй загътай, „ныммӕл“ кӕнӕ „ныртӕккӕ дӕ амардзынӕн“, зӕгъгӕ» (Нейтан).

 Уӕдӕ цы ис зӕгъӕн. Дӕхи хиз, фыддзинадмӕ, ӕнӕгъдаудзинадмӕ, спиритизммӕ ӕмӕ ӕндӕр ахӕм хъуыддӕгтӕм чи разӕнгард кӕны, уыцы хъӕзтытӕй. Хуыцау ахӕм хъуыддӕгтӕй йе сӕфт уыны (Галатӕгтӕм 5:19–21; Ефесӕгтӕм 5:10; 1 Иоанны 2:15, 16).

 ● Библи куыд зӕгъы, афтӕмӕй Йегъовӕ йе сӕфт уыны, «фыддзинад чи уарзы», уыдонӕй, аразгӕ йӕ чи кӕны, ӕрмӕст уыдонӕй нӕ, фӕлӕ (Псалом 11:5). Цы электронон хъӕзтытӕй фӕхъазыс, уымӕй, цавӕр адӕймаг дӕ рауайдзӕн, уый базонӕн нӕй, фӕлӕ уӕддӕр уымӕй бӕрӕг у, ныртӕккӕ цавӕр адӕймаг дӕ, уый.

 Иу чиныджы фыст ис: «Ӕгъатыр видеохъӕзтытӕ сывӕллӕттыл, телевизоры цы фӕуынынц, уымӕй тынгдӕр фӕзынынц, уымӕн ӕмӕ хъазгӕйӕ сывӕллӕттӕ, чидӕр иннӕты куыд цӕгъды, уымӕ ӕнӕуи нӕ фӕкӕсынц – сӕхӕдӕг свӕййынц сӕйраг архайджытӕ. Ахуыргӕнӕг йӕ ахуыргӕнинӕгты цӕуылдӕр куыд фӕахуыр кӕны, афтӕ ӕгъатыр хъӕзтытӕ дӕр сывӕллӕтты фӕахуыр кӕнынц ӕгъатырдзинадыл» (Getting to Calm). (Абар Исайы 2:4.)

 Ӕрыгӕттӕй бирӕтӕ сахуыр сты электронон хъӕзтытӕм раст цӕстӕй кӕсын. Ӕркӕсӕм-ма дыууӕ цӕвиттонмӕ.

 «Раздӕр-иу видеохъӕзтытӕй ӕмбисӕхсӕвмӕ фӕхъазыдтӕн ӕмӕ-иу мӕхицӕн дзырдтон: „Цӕй, фондз сахаты куы афынӕй кӕнон, уӕддӕр мын фаг уыдзӕн. Иу гыццыл ма ахъазон“. Фӕлӕ ныр сахуыр дӕн видеохъӕзтытӕм раст цӕстӕй кӕсын. Ныр мын видеохъӕзтытӕ сты, иуӕй-иу хатт рӕстӕг рахицӕн кӕнӕн кӕмӕн ис, ахӕм ирхӕфсӕнтӕ. Фӕлӕ алы хъуыддаджы дӕр хъӕуы бӕрц зонын» (Джозеф).

 «Видеохъӕзтытӕй кӕй нал фӕхъазын, уый фӕрцы ныр мӕ къухы фылдӕр цыдӕртӕ бафты! Мӕ лӕггад фӕхуыздӕр, мӕ бон у ме ’мбырды иннӕтӕн фылдӕр ӕххуыс кӕнын ӕмӕ ма суанг фортепианойыл цӕгъдын дӕр сахуыр дӕн. Ӕз бамбӕрстон, видеохъӕзтытӕ йеддӕмӕ ма царды бирӕ ӕндӕр хорз цыдӕртӕ кӕй ис!» (Дэйвид).

 ● Библи куыд зӕгъы, афтӕмӕй фӕлтӕрдджын нӕлгоймӕгтӕ ӕмӕ сылгоймӕгтӕ «хъуамӕ алцӕмӕй дӕр бӕрц зоной» (1 Тимофеймӕ 3:2, 11). Уыдон дӕр уарзынц сӕхи аирхӕфсын, фӕлӕ сты хиуылхӕцгӕ ӕмӕ зонынц, бауромын кӕд хъӕуы, уый (Ефесӕгтӕм 5:10).

 Уӕдӕ цы ис зӕгъӕн. Алцӕмӕн дӕр хъуамӕ уа йӕхи бынат, ӕмӕ уый хауы электронон хъӕзтытӕм дӕр. Ӕрмӕстдӕр сӕ уӕд уыдзӕн хорз ирхӕфсӕнтӕ схонӕн. Фӕлӕ ма бауадз, цӕмӕй-иу дын дӕ рӕстӕгӕй ӕгӕр бирӕ байсой кӕнӕ, царды ахсджиагдӕр цы у, уый дӕ ферох уа. Дӕ тыхтӕ иууылдӕр цавӕрдӕр хъазт рамбулынмӕ саразай, уымӕй бирӕ хуыздӕр уыдзӕн, ӕцӕг царды дӕ разы нысӕнттӕ куы ӕвӕрай ӕмӕ ӕппӕт тыхтӕй куы архайай, цӕмӕй дӕ къухы бафтой.