Цӕмӕ дӕ фӕндид афтӕ бакӕнын? Фӕнды дӕ де ’мбӕлтты дисы бафтауын, ома мыл мӕ ныййарджыты бар нал цӕуы. Афтӕ дӕм кӕсы, ӕмӕ дӕ ныййарджытӕй зондджындӕр дӕ ӕмӕ хъуыддаг уыдонӕй хуыздӕр ӕмбарыс (Ӕмбисӕндтӕ 14:18).

 Цы дӕм ӕнхъӕлмӕ кӕсы? Чи зоны, де ’мбӕлтты ӕцӕгдӕр дисы бафтауай. Фӕлӕ ма уымӕй уӕлдай фендзысты, дӕ ныййарджыты кӕй сайыс, уый дӕр, ӕмӕ дыл нал ӕууӕнддзысты. Хъуыды кӕндзысты, зӕгъгӕ, йӕ ныййарджыты кӕм сайы, уым мах дӕр куыннӕ сайдзӕн. Стӕй ӕнӕфӕрсгӕйӕ кӕй ацыдтӕ, уый дӕ ныййарджытӕ куы базоной, уӕд сын тынг зын уыдзӕн, сайдӕй сыл кӕй рацыдтӕ, уый, ӕмӕ дӕ никуыдӕмуал уадздзысты (Ӕмбисӕндтӕ 12:15).

 Цӕмӕ дӕ фӕндид афтӕ бакӕнын? Дзӕбӕх ахъуыды кодтай ӕмӕ ахӕм хатдзӕгмӕ ӕрцыдтӕ, ӕмӕ де ’мбӕлттӕ уым цы кусдзысты, уый кӕнын дын де ’фсарм бар нӕ дӕтты кӕнӕ дзы чи уыдзӕн, уыдонӕй алкӕй хорз ӕмбал схонӕн нӕй (1 Коринфӕгтӕм 15:33; Филиппӕгтӕм 4:8). Йе та дӕ, чи зоны, фӕнды ацӕуын, фӕлӕ дӕм уыйбӕрц ныфс нӕй, цӕмӕй дӕ ныййарджытӕй зӕгъай.

 Цы дӕм ӕнхъӕлмӕ кӕсы? Кӕд уый тыххӕй нӕ цӕуыс, ӕмӕ йӕ зоныс, хорзӕй дзы ницы ис, уӕд дын ӕнцондӕр уыдзӕн де ’мбӕлттӕн бамбарын кӕнын, цӕуылнӕ ӕрбацыдтӕ, уый. Фӕлӕ кӕд уый тыххӕй нӕ цӕуыс, ӕмӕ дӕм ныфс нӕ разынд дӕ ныййарджыты бафӕрсынмӕ, уӕд хӕдзары тӕргайхуызӕй баддзынӕ, ӕмӕ дӕм афтӕ кӕсдзӕн, цыма дӕу йеддӕмӕ иууылдӕр сӕхицӕн сӕ рӕстӕг дзӕбӕх ӕрвитынц.

 Цӕмӕ дӕ фӕндид афтӕ бакӕнын? Уымӕн ӕмӕ йӕ ӕмбарыс, дӕ ныййарджытӕм кӕй хъуамӕ хъусай ӕмӕ сын сӕ хъуыдыйӕн кӕй хъуамӕ аргъ кӕнай (Колоссӕгтӕм 3:20). Дӕ ныййарджыты уарзыс, ӕмӕ дӕ нӕ фӕнды хӕдзарӕй сусӕгӕй ацӕуын, уымӕн ӕмӕ сын уӕд сӕ зӕрдӕ фӕриссын кӕндзынӕ (Ӕмбисӕндтӕ 10:1). Стӕй сӕ куы бафӕрсай, уӕд сын дӕ бон бамбарын кӕнын уыдзӕн, цӕмӕн дӕ фӕнды ацӕуын, уый дӕр.

 Цы дӕм ӕнхъӕлмӕ кӕсы? Дӕ ныййарджытӕ йӕ фендзысты, кӕй сӕ уарзыс ӕмӕ сӕ кӕй нымайыс. Ӕмӕ йӕ куы уыной, кӕдӕм дӕ фӕхуыдтой, уым дын тӕссаг ницӕмӕй у, уӕд дӕ, ӕвӕццӕгӕн, ауадздзысты.

 Йӕ иу аххосаг цы у, уый бамбарын кӕнӕн ис ахӕм цӕвиттонӕй. Денджызы был дӕхицӕн найӕн бынат куы агурай, уӕд цавӕр бынат равзарис? Ӕвӕццӕгӕн, адӕмы ирвӕзынгӕнджытӕ кӕм ис, ахӕм бынат. Цӕмӕн? Адӕймаг йӕхи куы фӕнайы, уӕд афтӕ къӕрцхъус нал вӕййы ӕмӕ йын тӕссаг цӕмӕй у, уый нӕ бафиппайы. Фӕлӕ, ирвӕзынгӕнджыты куыст чи кӕны, уыдон та бӕрзонд фӕбадынц ӕмӕ хорз фӕуынынц, кӕмӕн цӕмӕй тӕссаг у. Афтӕ дӕ ныййарджытӕ дӕр, тӕссаг дын цӕмӕй у, уый хуыздӕр уынынц, уымӕн ӕмӕ дӕуӕй зондджындӕр сты ӕмӕ царды дӕр фылдӕр федтой. Дӕ ныййарджытӕн сӕ нысан уый нӕу, ӕмӕ дӕ ирхӕфсӕнтӕй ӕнӕхай фӕкӕной. Уыдоны фӕнды, тӕссаг дын цӕмӕй у, уыдӕттӕй дӕ бахизын, цӕмӕй дӕ цард ма фенад уа.

 Иннӕ аххосаг та уый у, ӕмӕ дӕ ныййарджытӕн сӕ сӕйраг мӕт у, куыд дӕ бахъахъхъӕной, уый. Кӕй дӕ уарзынц, уый тыххӕй дын фӕзӕгъынц «о» – сӕ бон куы вӕййы, уӕд. Фӕлӕ сын ӕндӕр гӕнӕн куы нӕ вӕййы, уӕд та дын фӕзӕгъынц «нӕ». Искуыдӕм сӕ дӕхи куы фӕкурыс, уӕд ахъуыды кӕнынц, куы йӕ ауадзӕм, уӕд стӕй нӕхи фӕсмонӕй нӕ хӕрдзыстӕм, зӕгъгӕ. Ӕмӕ йӕ кӕд фидарӕй фӕзонынц, тӕссаг дын ницӕмӕй уыдзӕн, уӕд фыццаг «о» фӕзӕгъынц сӕхицӕн, уый фӕстӕ та – дӕуӕн.

Дӕ бон цы у аразын

 Сайгӕ ма кӕн. Дӕхи бафӕрс: «Цӕмӕ мӕ фӕнды ацӕуын? Цы дзы араздзысты, уый уарзын ӕви ме ’мбӕлттӕй хицӕн кӕнон, уый мӕ нӕ фӕнды? Йе та мӕ кӕд уый тыххӕй фӕнды ацӕуын, ӕмӕ мӕ зӕрдӕмӕ цы чызг (кӕнӕ лӕппу) цӕуы, уый дӕр уым уыдзӕн?». Дӕ ныййарджыты сайгӕ ма кӕн. Уыдон дӕр кӕддӕр дӕ карӕн уыдысты, ӕмӕ йӕ хорз ӕмбарынц, цы дӕ хъӕуы, уый. Ӕмӕ сӕ сайынвӕнд куы скӕнай, уӕддӕр дын дзы ницы рауайдзӕн. Уӕдӕ сын алцыдӕр ӕргом куы радзурай, уӕд сын сӕ зӕрдӕ барухс кӕндзынӕ, уыдон та дын хорз уынаффӕ ратдзысты (Ӕмбисӕндтӕ 7:1, 2). Асайынмӕ сӕ куы хъавай, уӕд та дыл бынтондӕр нал ӕууӕнддзысты ӕмӕ дӕ уадзгӕ дӕр никуыдӕмуал кӕндзысты.

 Хуыздӕр рӕстӕг равзар. Дӕ ныййарджытӕ фӕскуыст фӕлладӕй куы ’рбацӕуой кӕнӕ сӕ хъуыдытӕ ӕндӕр хъуыддӕгтыл куы уой, уӕд уый бынтон хорз рӕстӕг нӕу, цӕмӕй сӕм бацӕуай ӕмӕ сӕ бар ракурай. Хуыздӕр рӕстӕгмӕ банхъӕлмӕ кӕс. Фӕлӕ дӕ ныййарджытӕм фӕстаг минут куы бауырдыг уай, ауадзут мӕ, зӕгъгӕ, уӕд уый дӕр сӕ зӕрдӕмӕ нӕ фӕцӕудзӕн. Рагацау сын ӕй зӕгъ, цӕмӕй сын ахъуыды кӕнынӕн рӕстӕг уа.

 Бӕлвырд бамбарын кӕн, цы кусдзыстут, уый. Дӕлӕ-уӕлӕ ныхӕстӕ сын ма кӕн, фӕлӕ сын бӕстон радзур, цы кусдзыстут, уый тыххӕй. Куы дӕ фӕрсой: «Чи дзы уыдзӕн?», «Бадтмӕ хистӕртӕй йӕ хъус чи дардзӕн?» кӕнӕ «Хӕдзармӕ цафон ӕрбацӕудзынӕ?», уӕд сын афтӕ ма зӕгъ, мӕгъа, нӕ йӕ зонын, зӕгъгӕ. Ныййарджытӕ нӕ уарзынц, сӕ фарстатӕн сын ахӕм дзуаппытӕ куы фӕдӕттынц, уый.

 Раст цӕстӕнгас дын уӕд. Дӕ ныййарджытӕм ахӕм цӕстӕй ма кӕс, цыма де знӕгтӕ сты. Афтӕ йӕ нымай, цыма дӕ фарс сты, уымӕн ӕмӕ уый ӕцӕгдӕр афтӕ у. Ахӕм цӕстӕй сӕм куы кӕсай, уӕд дӕ семӕ тох кӕнын нӕ фӕнддзӕн, ӕмӕ уыдон дӕр демӕ ӕнцондӕрӕй разы кӕндзысты.

 Дӕ ныййарджытӕ цавӕрфӕнды уынаффӕ ма рахӕссой, уӕддӕр ыл дыууӕ мауал зӕгъ ӕмӕ афтӕмӕй равдис, сывӕллон кӕй нал дӕ. Афтӕ куы бакӕнай, уӕд дын уыдон дӕр аргъ кӕндзысты. Ӕмӕ дӕ иннӕ хатт искуыдӕм ацӕуын куы фӕнда, уӕд дӕ ӕнцондӕрӕй ауадздзысты.