Мыййаг дын тӕссаг у афтӕ бафӕллайынӕй, ӕмӕ дӕм хъару ӕппындӕр мауал уа? Кӕд о, уӕд дын ацы статья баххуыс кӕндзӕн.

•  Афтӕ цӕмӕн рауайы

•  Ацы фарста ахсджиаг цӕмӕн у

•  Дӕ бон цы у аразын

•  Де ’мгӕрттӕ цы дзурынц

•   Ӕгӕр бирӕ хъуыддӕгтӕ. Иу ӕрыгон чызг, Джули, загъта: «Алы ран дӕр нын дзурынц, цӕмӕй, цы аразӕм, уый ноджы хуыздӕр аразӕм, нӕхиуыл кусӕм, нӕ разы стырдӕр нысӕнттӕ ӕвӕрӕм ӕмӕ нын фылдӕр ӕнтыса. Ӕдзух ахӕм ныхӕстӕ хъусын ӕмӕ уыдӕттӕм тырнын тынг зын у!»

•   Технологитӕ. Абон смартфонты, планшетты ӕмӕ ӕндӕр технологиты фӕрцы адӕймагмӕ цыфӕнды афон дӕр ӕрбадзурӕн ис – бон дӕр ӕмӕ ӕхсӕв дӕр, къуыри авд боны. Уый тыххӕй адӕймаг ноджы тынгдӕр бафӕллайы ӕмӕ йӕм ӕппынфӕстаг хъаруйы мур нал баззайы.

•   Хуыссӕгхъуаг. «Ӕрыгӕтты фӕхъӕуы ахуыр кӕнын дӕр, кусын дӕр ӕмӕ улӕфын дӕр. Ӕмӕ сӕ уымӕ гӕсгӕ бирӕтӕ райсомӕй раджы сыстынц, хуысгӕ та ӕрӕгмӕ скӕнынц. Уый кӕд хорз нӕу, уӕддӕр бирӕтӕм афтӕ кӕсы, ӕмӕ ӕндӕр гӕнӕн нӕй»,– зӕгъы иу ӕрыгон чызг, Мирандӕ. Ахӕм царды уаг арӕх уымӕ ӕркӕны, ӕмӕ бафӕллайынц, ӕмӕ сӕм хъару ӕппындӕр нал баззайы.

 Библи куыд зӕгъы, афтӕмӕй адӕймаг куыстуарзаг уа, уый хорз у (Ӕмбисӕндтӕ 6:6–8; Ромӕгтӕм 12:11). Фӕлӕ дзы афтӕ никуы ис фыст, ӕмӕ адӕймагӕн куыст хъуамӕ алцӕмӕй сӕйрагдӕр уа, уыимӕ йе ’нӕниздзинадӕй дӕр.

 «Иухатт мӕ куыстытыл фӕдӕн, ӕмӕ ӕнӕхъӕн бон кӕй ницы бахордтон, уый ӕрмӕстдӕр изӕрӕй бамбӕрстон. Бамбӕрстон, алы хъуыддаг саразыныл дӕр-иу сразы уай, уый зондыл дзурӕг кӕй нӕу, уӕлдайдӕр та уый де ’нӕниздзинадӕн тӕссаг куы уа, уӕд» (Эшли).

 Библийы дзӕгъӕлы фыст нӕй: «Удӕгас куыдзӕн мард домбайӕ хуыздӕр у» (Екклесиаст 9:4). Алцыдӕр дӕхимӕ куы исай, уӕд дӕм, чи зоны, райдианы афтӕ кӕса, ӕмӕ домбайау тыхджын дӕ. Фӕлӕ афтӕ куы бафӕллайай, ӕмӕ дӕм хъару ӕппындӕр куы нал уа, уӕд уый де ’нӕниздзинадӕн зиан ӕрхӕсдзӕн.

•   «Нӕ» дзурын сахуыр у. Библийы фыст ис: «Зонд... ис бонзонгӕтӕм» (Ӕмбисӕндтӕ 11:2). Бонзонгӕ адӕм зонынц, сӕ бон цы у ӕмӕ цы нӕу, ӕмӕ сӕ бон цас вӕййы саразын, уымӕй фылдӕр хӕстӕ нӕ райсынц сӕхимӕ.

   «„Нӕ“ дзурын чи нӕ зоны, фыццаджыдӕр уыдонӕн у тӕссаг, ӕппындӕр сӕм хъару куы нал уа, уымӕй. Ахӕм адӕмы бонзонгӕ схонӕн нӕй. Абон уа ӕви райсом, афтӕ бафӕллайдзысты, ӕмӕ сӕм хъару ӕппындӕр нал уыдзӕн» (Джордан).

•   Фаг улӕф. Библийы фыст ис: «Дӕхи фыдӕбонӕй марыны бӕсты ӕмӕ дымгӕ сурыны бӕсты фӕлтау иу гыццыл баулӕф» (Екклесиаст 4:6). Цӕмӕй магъз хорз куса, уый тыххӕй хъуамӕ адӕймаг фаг фынӕй кӕна. Ӕмӕ кӕд ӕрыгӕтты 8–10 сахаты хъӕуы фынӕй кӕнын, уӕддӕр сӕ фылдӕр уыйбӕрц нӕ фӕфынӕй кӕнынц.

   «Иуафон уыйбӕрц куыстытӕ бакӕнын спълан кодтон, ӕмӕ фынӕй фаг нал кодтон. Фӕлӕ хатт хуыздӕр вӕййы иу сахат фылдӕр афынӕй кӕнын. Уӕд сӕр хуыздӕр фӕкусы ӕмӕ адӕймаг хъӕлдзӕгдӕр вӕййы» (Бруклин).

•   Дӕ хъуыддӕгтӕ пълан кӕн. Библийы фыст ис: «Алцыдӕр бӕстон чи кӕны, уымӕн йӕ фӕндтӕй ис пайда» (Ӕмбисӕндтӕ 21:5). Дӕ рӕстӕг ӕмӕ дӕ хъуыддӕгтӕ раст пълан кӕнын куы сахуыр уай, уӕд дын уый цӕрӕнбонты дӕр стыр ӕххуыс уыдзӕн.

   «Дӕ пълӕнттӕ-иу къӕлиндары куы фӕнысан кӕнай, уӕд-иу ӕнӕхъуаджы не стыхсдзынӕ. Дӕ график дӕ разы куы уа, уӕд-иу дын дӕ пълӕнтты ӕнцондӕр уыдзӕн цыдӕртӕ фӕивын, цӕмӕй ӕгӕр ма бафӕллайай» (Ванессӕ).