Уӕздан ӕмӕ ӕгъдауджын куы уай, уӕд дын уый царды баххуыс кӕндзӕн ӕртӕ хъуыддаджы:

1.   Хорз ном дын уыдзӕн. Иннӕтӕн куыд дӕ, уымӕй кӕнгӕ у, адӕмы раз дын хорз ном уыдзӕн ӕви нӕ. Ӕгъдауджын куы уай, уӕд дӕ нымайдзысты, ӕууӕнк кӕуыл ис, ахӕм адӕймагыл ӕмӕ дын иннӕты цӕсты кад уыдзӕн ӕмӕ дӕм хорз зӕрдӕ дардзысты. Фӕлӕ тызмӕг куы уай, уӕд афтӕ хъуыды кӕндзысты, ӕмӕ ӕрмӕст дӕхи мӕт кӕныс. Уый тыххӕй дын куыст ссарын зын уыдзӕн, стӕй ӕндӕр хъуыддӕгты дӕр ӕнтыстджын нӕ уыдзынӕ. Библийы фыст ис: «Ӕгъатыр адӕймаг... йӕхицӕн знаг у» (Ӕмбисӕндтӕ 11:17).

2.   Ӕмбӕлттӕ дын фӕзындзӕн. Библийы фыст ис: «Уарзондзинад [уӕм уӕд], уымӕн ӕмӕ уый хуызӕн ницы иу кӕны ӕмӕ ницы бӕтты кӕрӕдзийыл» (Колоссӕгтӕм 3:14). Афтӕ хъуамӕ уа ӕмбӕлтты ’хсӕн дӕр. Уӕздан ӕмӕ ӕгъдауджын чи у, уыдонимӕ иннӕтӕн ӕхсызгондӕр вӕййы рӕстӕг ӕрвитын. Ӕмӕ ӕцӕгдӕр, кӕмӕн фӕцӕудзӕн йӕ зӕрдӕмӕ тызмӕг ӕмӕ ӕнӕхсӕст адӕймаг?

3.   Иннӕтӕ дӕм хорз цӕстӕй кӕсдзысты. Иу чызг, Дженнифер, зӕгъгӕ, загъта: «Уӕздан куы уай, уӕд дӕм, чи зоны, фӕстӕдӕр цыфӕнды тызмӕг адӕймаг дӕр хорз зӕрдӕ дарын райдайа». Фӕлӕ тызмӕг куы уай, уӕд хорзӕй мацӕмӕ ӕнхъӕлмӕ кӕс. Библи зӕгъы: «Уӕхӕдӕг цы барӕнӕй барат, ахӕм барӕнӕй бардзысты сымахӕн дӕр» (Матфейы 7:2).

 Цавӕр хатдзӕг ис скӕнӕн. Алы бон дӕр адӕмыл ӕмбӕлӕм. Ӕмӕ нӕхи куыд дарӕм, уымӕй кӕнгӕ вӕййы, цы цӕстӕй нӕм кӕсдзысты ӕмӕ нӕм цы зӕрдӕ дардзысты, уый. Цыбыр дзырдӕй, адӕймаг уӕздан ӕмӕ ӕгъдауджын куы уа, уӕд ын уый пайда ӕрхӕсдзӕн.

1.   Ахъуыды кӕн, уӕздан ӕмӕ ӕгъдауджын дӕ ӕви нӕ. Дӕхимӕ ахӕм фарстатӕ ратт: «Хистӕрты нымайын ӕмӕ сын аргъ кӕнын? Иннӕтӕн арӕх фӕдзурын „бузныг “, „табуафси“, „бахатыр кӕн“? Искӕимӕ куы фӕныхас кӕнын, уӕд ӕм лӕмбынӕг фӕхъусын ӕви ме ’ргом ӕндӕр истӕмӕ аздахын, зӕгъӕм, СМС-тӕ фӕкӕсын кӕнӕ сӕ мӕхӕдӕг искӕмӕ фервитын? Мӕ ныййарджытӕн ӕмӕ мӕ хотӕ ӕмӕ ме ’фсымӕртӕн аргъ кӕнын ӕмӕ сӕ нымайын? Ӕви хатт, цы не ’мбӕлы, уыдӕттӕ сӕм бауӕндын, зӕгъгӕ, мӕ бинонтӕ сты, ӕмӕ мӕ бамбардзысты?

    Библи зӕгъы: «Кӕрӕдзийӕн кад кӕнынмӕ-иу иу иннӕйы разӕй фӕуӕд» (Ромӕгтӕм 12:10).

2.   Дӕ разы-иу нысан сӕвӕр. Ныффысс, цавӕр ӕртӕ хъуыддаджы хъуамӕ фӕхуыздӕр уай. Зӕгъӕм, 15-аздзыд чызг Эллисон бамбӕрста, ӕрмӕст йӕхӕдӕг кӕй хъуамӕ ма дзура, фӕлӕ иннӕтӕм хъусын дӕр кӕй хъуамӕ сахуыр уа. 19-аздзыд Давид та зӕгъы, зӕгъгӕ, бамбӕрстон, мӕхиуыл хӕцын мӕ кӕй хъӕуы, цӕмӕй-иу СМС-тӕ ма фыссон, мӕ хиуӕттимӕ ӕмӕ ме ’мбӕлттимӕ куы фӕныхас кӕнын, уӕд. Давид зӕгъы: «Уый аив нӕу, уымӕн ӕмӕ афтӕ уайы, цыма дӕ семӕ ныхӕс кӕнын нӕ фӕнды». 17-аздзыд Эдвард та йӕхи тыххӕй зӕгъы, иннӕтӕ куы фӕдзурынц, уӕд-иу сын сӕ ныхас ӕрдӕгыл хъуамӕ ма аскъуынон, зӕгъгӕ. Уӕлдӕр кӕй кой кодтам, уыцы чызг, Дженнифер, загъта: «Раздӕр-иу ацӕргӕтимӕ куы ныхас кодтон, уӕд-иу сын ӕрмӕст салам радтон ӕмӕ-иу ӕфсон ссардтон, цӕмӕй-иу мӕхи ме ’мбӕлттӕм айстаин. Ныр та фӕархайын, цӕмӕй сӕ хуыздӕр базонон. Ӕмӕ уый фӕрцы уӕздандӕр сдӕн».

    Библи цы зӕгъы. «Уӕхицӕн куыд хуыздӕр уа, ӕрмӕст ууыл ма хъуыды кӕнут, фӕлӕ, иннӕтӕн куыд хуыздӕр уа, ууыл дӕр» (Филиппӕгтӕм 2:4).

3.   Цы дын бантыст, ууыл ахъуыды кӕн. Иннӕтимӕ куыд фӕныхас кӕныс ӕмӕ дӕхи куыд фӕдарыс, уымӕ иу мӕйы дӕргъы дӕ хъус дар ӕмӕ-иу ахъуыды кӕн, цы дӕ хъӕуы фӕхуыздӕр кӕнын. Мӕйы кӕрон-иу дӕхимӕ ахӕм фарстатӕ ратт: «Уӕздан ӕмӕ ӕгъдауджын кӕй уыдтӕн, уый мыл хуыздӕрырдӕм куыд фӕзынд? Цы ма мӕ хъӕуы фӕхуыздӕр кӕнын?» Кӕд ма дӕ исты фӕхуыздӕр кӕнын хъӕуа, уӕд-иу дӕ разы нысан сӕвӕр.

    Библи зӕгъы: «Куыд уӕ фӕнды, цӕмӕй уын адӕм уой, афтӕ сын ут уӕхӕдӕг дӕр» (Лукайы 6:31).