CWESTIYNAU POBL IFANC

Pam Mynd i’r Cyfarfodydd yn Neuadd y Deyrnas?

CHWARAE

Ddwywaith yr wythnos, mae Tystion Jehofa yn cynnal cyfarfodydd yn eu mannau addoli, sy’n cael eu galw’n Neuaddau’r Deyrnas. Beth sy’n mynd ymlaen yno, a sut gelli di elwa o fynd i’r cyfarfodydd?

Beth sy’n digwydd yn Neuadd y Deyrnas?

Canolfan sy’n canolbwyntio ar addysg Feiblaidd ymarferol yw Neuadd y Deyrnas. Gall y cyfarfodydd sy’n cael eu cynnal yno dy helpu di:

dysgu’r gwir am Dduw.
deall arwyddocâd beth sy’n mynd ymlaen yn y byd.
dod yn berson gwell.
cael hyd i ffrindiau o’r math gorau

Oeddet Ti’n Gwybod? Mae man cyfarfod Tystion Jehofa yn cael ei alw’n Neuadd y Deyrnas am fod Teyrnas Dduw yn cael ei thrafod yno yn aml iawn.—Mathew 6:9, 10; 24:14; Luc 4:43.

Pam dylet ti fynychu?

Bydd y wybodaeth yn dy helpu. Bydd egwyddorion y Beibl sy’n cael eu trafod yng nghyfarfodydd Tystion Jehofa yn dy helpu i “fod yn ddoeth.” (Diarhebion 4:5) Mae hynny’n golygu gall y Beibl dy helpu i wneud penderfyniadau da yn dy fywyd. Gall hefyd dy helpu i gael hyd i atebion i gwestiynau mawr bywyd, fel:

Dyma syniad o rhai o’r anerchiadau sy’n cael eu traddodi yn ystod ein cyfarfodydd penwythnos:

Pam Dilyn Cyngor y Beibl?
Lle Gallwch Gael Cymorth Mewn Amserau Anodd?
Yr Hyn Mae Teyrnas Dduw yn ei Wneud i Ni Nawr.

“Daeth cyd-ddisgybl imi i un o’n cyfarfodydd. Eisteddodd efo’n teulu, a rhannodd ein llyfrau efo ni. Ar ôl y cyfarfod, dywedodd fod y sylwadau a glywodd gan bobl yn y sesiwn holi ac ateb wedi gwneud cryn argraff arno. Dywedodd hefyd nad oedd gan ei eglwys ddeunydd astudio tebyg i ni.”—Brenda.

Oeddet Ti’n Gwybod? Mae mynediad i Neuadd y Deyrnas am ddim, a does ’na fyth gasgliad.

Bydd y cwmni yn dy galonogi di. Yn ôl y Beibl, un rheswm y dylai Cristnogion gydgyfarfod yw “i annog ein gilydd.” (Hebreaid 10:24, 25) Mae cwmni da ymhlith pobl sy’n rhoi Duw ac eraill yn gyntaf yn eu bywydau yn dipyn o donic yn yr hen fyd hunanol hwn.

“Ar ôl diwrnod hir, fydda i’n aml wedi blino’n lân ac yn teimlo’n isel, ond mi fydd pobl Neuadd y Deyrnas bob amser yn gwneud imi deimlo’n well. Ac ar fy ffordd adref ar ôl y cyfarfod, bydda i’n teimlo’n hapus ac yn barod i wynebu diwrnod arall.”—Elisa.

Oeddet Ti’n Gwybod? Mae ’na fwy na 120,000 o gynulleidfaoedd o Dystion Jehofa o gwmpas y byd, yn cyfarfod mewn mwy na 60,000 o leoliadau. Bob blwyddyn, ar gyfartaledd, mae tua 1,500 o Neuaddau’r Deyrnas yn cael eu hadeiladu ar gyfer y cynnydd yn y rhai sy’n mynychu. a

Barn dy gyfoedion

“Pan oeddwn i yn yr ysgol uwchradd, daeth cyd-ddisgybl imi i rai o’n cyfarfodydd. Roedd gweld cymaint o fyfyrwyr y Beibl o wahanol oedrannau i gyd yn dysgu ar y cyd wedi creu argraff arni. Yn fwy diweddar daeth fy nghyflogwr, a synnodd wrth weld y Beibl yn cael ei ddefnyddio gymaint. Gwnaeth gweld ei werthfawrogiad o’r cyfarfod gynyddu fy ngwerthfawrogiad innau!”—Jessica.

“Dw i’n teimlo bod y cyfarfodydd yn rhoi rhyddhad imi oddi wrth ofalon a phryderon bob dydd. ’Dyn ni’n dysgu sut i gael boddhad allan o fywyd, sut i fod yn berson gwell, a llawer mwy. Mi fydda i wastad yn gadael Neuadd y Deyrnas yn teimlo fy mod i wedi cael fy nghalonogi a’m hadfywio.”—Timothy.

“Ar ôl iddo fod i gyfarfod am y tro cyntaf, dywedodd un dyn: ‘Des i i’r cyfarfod dim ond i brofi eich daliadau’n ffals. Ond mae’n troi ma’s taw fy naliadau i oedd yn anghywir!’ Mi wnaeth cyfeillgarwch Tystion Jehofa wneud argraff arno hefyd. Dywedodd: ‘Er mai hyn oedd y tro cyntaf imi gwrdd â chi, wnaethoch chi fy nhrin fel petasech chi wedi fy nabod i ers blynyddoedd!’”—Jacob.

“Mae ’na adegau wedi bod pan o’n i’n meddwl, ‘Wna i jest adael cyn gynted ag y mae’r cyfarfod wedi gorffen.’ Ond yn ystod y cyfarfod mae’r teimlad hwnnw yn diflannu. Ar ôl y cyfarfod, bydda i’n siarad â phobl a does dim syniad gen i pam o’n i’n teimlo fel oeddwn i gynnau. Heb y cyfarfodydd, fyddai’r fath ffrindiau gwych sydd gen i nawr ddim gen i o gwbl.”—Madison.