Eyokuqala Eya KwabaseKorinte 1:1-31
1 Mna Pawulos owabizwa nguYesu Kristu ngokokuthanda kukaThixo ukuba ndibe ngumpostile,+ kunye noSosithene umzalwana wethu,
2 sibhalela ibandla likaThixo eliseKorinte,+ nina eniye nenziwa ngcwele ukuze nibe ngabalandeli bakaKristu uYesu,+ nakhethwa ukuba nibe ngabangcwele, kunye nabantu bazo zonke iindawo ababiza egameni leNkosi yethu sonke, uYesu Kristu:+
3 Kwanga uThixo onguTata wethu neNkosi uYesu Kristu banganenzela ububele* baze baninike uxolo.
4 Ndisoloko ndimbulela uThixo ngani ngenxa yobubele* awanenzela bona ngoKristu Yesu;
5 kuba uye wanityebisa kuyo yonke into esebenzisa uKristu, waninika amandla okuthetha nolwazi oluninzi,+
6 kanye njengokuba niye nandiva ndishumayela ngoKristu+ naza nomelela,
7 ukuze kungabikho sipho ningenaso, ngoxa nikulinde ngamehlo abomvu ukutyhilwa kweNkosi yethu uYesu Kristu.+
8 Uza kuniqinisa de kube sekugqibeleni, ukuze ningamangaleleki ngemini yeNkosi yethu uYesu Kristu.+
9 UThixo owanibiza ukuba nimanyane* noNyana wakhe uYesu Kristu iNkosi yethu, nguThixo othembekileyo.+
10 Ndiyanicela bazalwana egameni leNkosi yethu uYesu Kristu, ukuba nonke nivumelane ngento eniyithethayo, kungabikho nto inixabanisayo,+ kodwa nicinge ngendlela efanayo.+
11 Kuba amanye amalungu osapho lukaKlowe aye andixelela ngani, esithi niyaxabana apho.
12 Ndithetha ngento yokuba nisithi: “Mna ndingokaPawulos,” “Mna ndingoka-Apolo,”+ “Mna ndingokaKefas,”* “Mna ndingokaKristu.”
13 Wahlulelene na uKristu? Andithi ayingoPawulos owabethelelwa esibondeni ngenxa yenu? Okanye ngaba nabhaptizwa egameni likaPawulos?
14 Ndiyambulela uThixo kuba kungekho mntu ndimbhaptizileyo kuni ngaphandle kukaKrispo+ noGayo,+
15 ukuze kungabikho mntu kuni othi ubhaptizwe egameni lam.
16 Ewe kona, ndabhaptiza nendlu kaStefana.+ Ngaphandle kwaba, andikhumbuli ndibhaptiza omnye umntu.
17 Kuba uKristu akazange andithume ukuba ndihambe ndibhaptiza, kodwa wandithuma ukuba ndihambe ndishumayela iindaba ezilungileyo,+ ndingathethi ngobuciko, ukuze isibonda sokungcungcutheka* sikaKristu singenziwa singabi namsebenzi.
18 Kuba imfundiso engesibonda sokungcungcutheka* ibubudenge kubantu abaza kutshabalala,+ kodwa kuthi basindiswayo ingamandla kaThixo.+
19 Kuba kubhaliwe kwathiwa: “Ndiza kubuphelisa ubulumko bezilumko, ndingabamkeli* nobukrelekrele babantu abakrelekrele.”+
20 Siphi na isilumko? Uphi umbhali?* Uphi na umntu othanda ukuphikisa weli hlabathi?* Akabujikanga na uThixo ubulumko beli hlabathi baba bubudenge?
21 Kuba ekubeni uThixo enobulumko, ubulumko behlabathi+ abuzange bulincede limazi.+ UThixo wabona kulungile ukuba asindise abo bakholwayo esebenzisa umyalezo obonakala ububudenge+ ehlabathini.
22 Kaloku amaYuda afuna ukubona imimangaliso,+ wona amaGrike akhangela ubulumko;
23 kodwa thina sishumayela ngokubethelelwa kukaKristu esibondeni, nto leyo ewakhubekisayo amaYuda kodwa ebubudenge ezintlangeni.+
24 Noko ke, kwabo bakhethiweyo, abangamaYuda nabangamaGrike, amandla kaThixo nobulumko bakhe abonakala kuKristu.+
25 Kaloku into ebubudenge kaThixo inobulumko kunabantu, yaye into engenamandla kaThixo inamandla kunabantu.+
26 Niyabona bazalwana ukuba xa wayenikhetha, abaninzi kuni babengezozilumko ebantwini,+ bengenamandla, bengazalwa ngabantu ababalulekileyo,*+
27 kodwa uThixo wakhetha izinto ezibubudenge zehlabathi ukuze ahlazise izilumko, yaye wakhetha izinto ezingomelelanga zehlabathi ukuze ahlazise izinto ezomeleleyo;+
28 yaye uThixo wakhetha izinto ezingenamsebenzi zehlabathi nezinto ezijongelwa phantsi, izinto ezingekhoyo, ukuze atshabalalise ezo zikhoyo,+
29 ukuze kungabikho mntu uqhayisayo phambi koThixo.
30 Kodwa kungenxa yakhe le nto niye namanyana noKristu Yesu, oye wasibonisa ubulumko nobulungisa+ bukaThixo, wasenza saba ngcwele+ waza wasikhulula ngokusihlawulela,+
31 ukuze kube njengokuba kanye kubhaliwe kwathiwa: “Lowo uqhayisayo, makaqhayise ngoYehova.”*+
Umbhalo osemazantsi
^ Okanye “ububele obungasifanelanga.”
^ Okanye “yobubele obungasifanelanga.”
^ Okanye “nabelane.”
^ Okwabizwa ngokuba nguPetros.
^ Okanye “isibonda sentuthumbo.” Funda Ingcaciso Yamagama.
^ Funda Ingcaciso Yamagama.
^ Okanye “ndibukhabele kude.”
^ Oko kukuthi, incutshe yoMthetho.
^ Funda Ingcaciso Yamagama.
^ Okanye “bengaphumi kwiintsapho ezibalulekileyo.”
^ Funda Isihlomelo A5.